【校園／愛情】戀上鄰家女孩（布甸篇）: 17. 邂逅相遇適我願

「等埋吖，唔該～」 

記得啱啱升上中學嘅我，滿懷期待咁換好校服，準備搭𨋢落樓返學，入到𨋢之後忽然聽到有把女仔聲大嗌等埋吖唔該，迎面而來嘅竟然係一個著住同我一間學校嘅女裝校服，我下意識㩒住開門掣。 

「啊——」點知道度𨋢門毫不留情咁一嘢夾咗落個女仔度，搞到個女仔發出一陣嬌柔慘叫聲。 

弊在原來我㩒嘅居然係閂門掣，我即刻一邊單手幫佢擋開𨋢門，一邊瘋狂㩒爆個開門掣。 

「對唔住啊，有無事啊。」我連忙道歉。 





「無事無事，估唔到第一日返學就差啲俾部𨋢夾死。」個女仔雙手撥返好啲披頭散髮，我先發覺原來眼前呢個女仔眉清目秀，都幾靚女，只係目測好似仲高過我少少。 

我都估唔到第一日返學就發生啲咁瘀嘅事，仲要係對住女仔。 

「原來你都係第一日返學，我叫陳佑男。」 

「我叫黃子瑜。」 

跟住呢程𨋢，由始至終都係得我哋兩個人，我哋兩個尷尷尬尬咁你眼望我眼咁，直至到地𨋢門重新打開。 





「係呢，之前好似無見過你嘅？」返學第一日唔可以咁樣衰，於是乎我鼓起勇氣打開話匣子，希望可以留返個好印象俾呢位女同學。 

「我同屋企人早兩個禮拜搬過嚟㗎。」黃子瑜答道。 

「咁你係住邊個單位？」問完之後我即刻後悔，覺得自己唔應該咁問，好似對第一次見嘅女仔嚟講，呢條問題太過私隱。 

「咩啊，我住你對面㗎！搞錯啊，你都唔認得我之餘仲要差啲俾你夾死，好過份啊！」黃子瑜講完之後，兩邊兩邊金魚腮就會脹起咗，仲要嘟起個嘴，嬲爆爆咁望住我。 

慘到呢，我居然唔認得出佢就係最近搬過嚟我對面嘅嗰家人，我仲話要留個好印象俾人。 





我諗我留俾黃子瑜嘅印象，大概就係…一個住喺佢對面屋，但又無心肝唔認得隔離鄰舍，仲要第一日返學就想夾死佢嘅男仔。 

其實我好日都唔會諗返起呢段邂逅，但而家諗返起，原來咁就已經過咗三年，不知不覺間已經習慣咗屋企隔離住咗一個女仔，亦都習慣咗保守呢個秘密——屬於我同子瑜嘅秘密。 

連曉琳都唔知道。 

我校服都未除，放鬆全身攤咗喺梳化上面，腦海浮現返初中時期同子瑜相處嘅回憶，印象深刻嘅仲有嗰年中一聖誕聯歡會… 

忽然間褲袋傳來電話震動，我拎起一睇，來電顯示正正就係黃子瑜。 

「喂？」我向右撥開解鎖接聽。 

「喂！陳佑男，你快啲過嚟幫我，我就快要死喇！」聽筒嘅另一邊，唔係子瑜清脆悅耳嘅聲線，而係一把𡃁仔鬼鬼祟祟嘅聲，係連喉核都未生嘅𡃁仔聲。 

「快啲啦！趁黃子瑜仲煮緊飯，我開門俾你…」你條友仔未等我話好就cut咗我線，講嘢把聲咁鬼崇，方死唔係又偷咗你家姐部手機打俾我。 





唉！我真係無你兩姐弟咁好氣。 

話雖如此，我都係喺梳化上面彈返起身，著返對拖鞋就去㩒子瑜門鐘，我同佢屋企就係呢兩步路嘅距離。 

聖誕歌音樂嘅門鐘響起，只不過個首歌係走音嘅。 

「你㩒門鐘做乜鬼啊，咁黃子瑜咪會知道。」門前呢個豆釘，就係子瑜個細佬，望落個樣頂多得七八歲，實情就已經讀緊小四，但仲係奀挑鬼命咁，我怕佢第時大過咗都好似佢家姐咁唔識長高就碌柒。 

「我咁大個人，入嚟佢點都會知㗎啦。」唔通我識隱身術咩，而我一入到屋就聞到好香爆蒜味，加埋啲「嗞哩啫呢」嘅煎油聲，就知道子瑜喺廚房裡面開緊壇，不過我諗應該都係唔夠掩蓋我擅闖民居所發出嘅聲響。 

「喂！黃子俊你開門俾邊個啊？」嗱係咪呢，你家姐準備喺廚房衝出嚟鞭打你啦。 

只見子瑜揸住支著緊煙嘅鑊鏟，依然著緊件白色校裙，但就笠咗條花紋圍裙，對白襪仔仲未除低，不過面頭已經有一撻一撻深淺色，唔使深究都知道實係喺廚房裡面整濕。 





嘩，咁又唔使用到烙刑嘅，話晒嗰個都係你親細佬。 

「唔係啊，係你男朋友陳佑男啊。」但呢個黃子俊完全無擔心過咩鞭打同烙刑。 

「妖講咗幾多次佢唔係我男朋友啊！」子瑜拎住支鑊鏟嬲爆爆咁對住佢細佬。 

喂喂喂呢啲危險動作要有家庭指引先可以觀看㗎，況且我哋全部都未夠十八歲，兒童不宜㗎。 

「子瑜你係咪煮緊嘢食，睇火先緊要啲啊…」唉我都唔明，你細佬將我係你男朋友呢樣嘢掛咗喺口邊咁多年，我都一早左耳入右耳出，做咩反而今日你會咁大反應。 

「哼！」子瑜又嬲爆爆咁走返入廚房繼續爆佢啲蒜頭，感覺上今日啲爆蒜聲，聽落好似特別清脆。