【校園／愛情】戀上鄰家女孩（布甸篇）: 16. 鄰家女孩的身份

「子瑜，點解頭先唔見你返嚟嘅？」我想知道頭先佢喺學校走廊急急腳走咗之後，點解咁耐都無見佢行返轉頭，明明佢去完女廁，應該會行返原路返班房，無理由會唔見咗人㗎。 

「見到你所以兜路走。」 

「點解見到我要兜路走？」我即問。 

「哼！」 

先唔好講黃子瑜做咩頭先見到我要兜路走，因為佢而家直情喺度兜緊路走，我一跟住佢，佢就反方向行，來來回回咗好幾次，隱隱約約見到佢鼓起兩邊腮，個樣又嬲爆爆咁。 





「我哋屋企係呢邊啊，你去邊啊？」我索性一手拉住子瑜個書包。

總算我眼明手快，子瑜俾我拉住咗個書包，無得再亂咁行，終於停咗落嚟。 

「咩我哋屋企，邊個想同你一齊住？」點知子瑜雙手一垂低，就輕鬆擺脫咗我，剩返個書包喺我手上面。 

竟然仲有呢一招！？ 

「咁我哋屋企真係呢邊嘛。」 





「點解我咁黑仔，要同你一齊返屋企。」子瑜兩邊腮脹卜卜咁，如果我唔係一邊手拎住杯珍珠奶茶，另一邊手拎住子瑜個書包，我諗我真係會伸隻手指去篤吓佢個金魚腮。 

「黃子瑜唔好嬲啦，要唔要飲珍珠奶茶？」我將杯珍珠奶茶喺子瑜面前搖嚟搖去。 

「唔要呀，我先唔想掂到你啲口水。」 

「同埋，我廢事溝亂咗人哋啲口水尾啦。」 

黃子瑜你咁聰明，咁都估到杯珍珠奶茶係我同曉琳一齊飲過，又係嘅，平時我都唔好呢挺肥仔水，佢頭先又見到我同曉琳一齊整壁報板，而家拎住杯咁嘅嘢，好自然就可以聯想到我哋頭先去過邊度。 





「咁我哋返屋企啦。」 

「你幫我拎埋書包咁好啊？」子瑜兩手空空，跟住我後面，兩個人一前一後咁向住屋企方向行。 

「咁我放喺地下囉。」我作狀將佢個書包放喺地下。 

「好吖，你試下放落地，我唔幫你追曉琳！」 

「我唔敢。」我將子瑜個書包直接孭咗喺前面，計埋我背脊嗰個，一前一後各有一個書包。 

「嘻嘻。」只可惜我行喺子瑜面前，睇唔到佢個表情，更加唔知佢做咩無啦啦要笑我。 

「笑咩啊？」 

「無呀，笑你蠢咋嘛。」 





「我邊度蠢啊，方唔係因為有人連自己個書包都唔要。」啊你個衰妹，幫你孭書包仲話我蠢。 

「咩呀，我要㗎，不過暫時俾人託管住先咋。」仲要窒我窒得咁快。 

「咁我拎去賣咗佢。」我窒返你先。 

「唔值錢㗎，你攞去賣啦，記得分返一半錢俾我就得。」子瑜咁口齒伶俐，三招未完我已經就快招架唔住。 

「到時家樂肯定第一個搶住買。」等我出絕招先，順便打聽下佢同家樂呢排發展成點啊嘛。 

「如果俾曉琳知道到你而家幫我孭書包，你實唔使旨意追到佢。」 

差啲噴血，師傅我唔打啦... 





「你開心死啦。」失驚無神子瑜又爆多一句。 

「咩開心？」冷不防俾佢拋窒咗我。 

「你自己知啦，我唔信你真係咁蠢囉。」 

硬係覺得兩個女仔今日都怪怪的，我本來都想趁機會，將頭先同曉琳做過嘅事講俾子瑜聽，問吓佢意見，但又唔知點開口問佢好，就係咁，跟住落嚟我同子瑜一路上都無再講嘢，但轉吓眼都返到屋企樓下，查實我哋屋企就係學校隔離座公共屋邨，只有幾分鐘路程。 

入到𨋢之後，我㩒著咗「20」個掣，就企咗喺門口旁邊，子瑜企咗喺我對角位置，成架𨋢得我哋兩個人。 

「你俾返個書包我先啦，我要摷鎖匙。」子瑜行前一步柔聲道。 

我將個書包除咗出嚟俾返子瑜，但係見佢摷嚟摷去都仲未搵瑜佢條鎖匙，神情開始有啲焦急。 

唉你個傻妹啊，真係無你咁好氣，我輕步走上前，慢慢將佢書包最面頭個拉鍊敞開，伸隻手入去一摸一抽，一條連住布甸狗鎖匙扣嘅鎖匙串就咁重現眼前。 





呢個時候，子瑜嘟起個嘴接住佢條鎖匙，至於我點解會知道佢條鎖匙擺邊？因為我孭住佢個書包成程路，一早就摸到面頭個袋凹凹凸凸，就估到佢將條鎖匙放咗喺邊度啦。 

「20樓，Twentieth Floor，升降機門正在打開。」與此同時，一把機械女聲提醒我哋到了。 

「哼！」 

你個衰妹又哼，幫你攞鎖匙都要哼我。 

子瑜搶先離開，我跟隨尾後，兩個前後腳咁一直行到走廊嘅某處，轉身背對背，各自各開門入屋。 

嗯，隔咗咁耐先同大家講，其實我屋企對面住咗一個同我年紀一樣嘅女仔，佢就係黃子瑜。