【校園／愛情】戀上鄰家女孩（布甸篇）: 18. 重逢偶遇惹人憂

「得啦得啦得啦，黃子瑜唔得閒理我哋啦。」黃子俊拉住我入佢哋間睡房，所謂「佢哋」即係佢同佢家姐，換句話說，呢間房亦都係子瑜嘅閨房。

佢哋間房其實就同我間房一樣咁大，擺到張碌架床，加個書枱同衣櫃已經無咩多餘空間剩，但係佢哋兩姐弟就要共用同一個地方，書枱就得一張，電腦都係得一部。

還好碌架床分咗上下兩層，等佢哋叫做有返少少私人空間，不過我雙腳踏入房門之際，梗係要俾我見到啲唔應該見到嘅嘢，有件bra隨手掛咗喺碌架床上層條欄杆度，呢件黑色喱士…令我聯想返起，莫非就係上個禮拜喺糖果鋪我𥄫到嘅嗰件？

諗諗吓，頭先子瑜擰轉身返入廚房嗰陣，條白色校裙又好似無透到咩bra帶之類嘅物體喎。

頂！黐孖筋我做咩會喺人哋間房度，諗埋晒啲衰嘢。





「陳佑男坐啦，唔好咁見外，第一次嚟啊？」

「點啊黃子俊打到邊啊？」佢細佬已經皇者歸位坐喺部電腦面前，揸住個手掣猛咁㩒㩒㩒，我就坐咗喺佢床邊望住佢個螢幕。

下格床係細佬瞓，上格床就家姐瞓嘅。

「我清埋呢邊啲小怪就可以入去挑隻BOSS。」佢玩緊嘅係Dark Souls，一隻技術要求好高嘅動作遊戲。

「咁又話就死？」





「一陣打唔贏你先再幫我囉。」我見佢三兩下搞掂埋啲小怪，直接衝去BOSS嘅棲息地，呢關我死過好多次，所以認得晒啲路。

「咁即係呃我過嚟啫，有咩企圖先啊子俊哥？」

「咁又唔好呃呃聲，叫得你過嚟更係有啲重要嘢先搵你。」

你個黃子俊，人細鬼大，講嘢越嚟越老積，講嘢嗰陣視線仲要無離開過個螢幕，話咁快已經同緊隻BOSS開拖，但絲毫不落於下風，睇怕佢本來就無諗住叫我嚟係幫佢手過關。

「係嘅，咁有咩吩咐呢子俊哥？」





「你啊，做咩整到黃子瑜唔開心啊？我呢個星期夜晚瞓覺嗰陣，晚晚都聽到佢喺度唉聲嘆氣。」

黃子俊講嘢同時，隻手完全無停過，左翻右滾，只要有空隙就衝前連劈，從不貪刀，到BOSS起手攻擊之際，又識得及時閃避，年紀輕輕居然可以打得有板有眼。

「吓？我邊有整到佢唔開心。」

「咁做咩呢幾日你無陪佢放學嘅？」黃子俊追住隻BOSS補上一刀。

「今日咪有。」嚴格上嚟講嘅話，今日都唔算有，純粹咁啱撞到子瑜。

「即係你認前幾日無啦，你做男朋友做到咁屎㗎！」隻BOSS開始俾佢斬到血肉橫飛，只要再打多兩三下重擊應該就搞掂。

「又男朋友！小心你家姐一陣又鬧你亂講嘢。」男唔男朋友呢家嘢我都聽咗三年，我就無咩所謂，但子瑜今日無端端咁大反應，一陣佢又擸起支鑊鏟衝出嚟㗎啦。

「我唔理啊，總之邊個搞到黃子瑜唔開心我就斬開佢十八碌！」又一下靚閃，翻滾方向同距離恰到好處，跳起身就即刻狠狠咁補多一刀。





「喂！黃子俊！唔好再打機啦，出嚟洗手食飯啦！」遠方傳來子瑜嘅呼喚。

「我無打啊，係陳佑男響度幫我玩咋，我出嚟啦。」

你個衰仔包啊，就咁將個手掣塞俾我，就衝咗出去飯廳。不過咁都好嘅，至少佢好乖，打緊機兼且去到最後關頭，都肯聽子瑜話出去洗手食飯，難怪子瑜咁錫呢個細佬，佢哋媽咪平時返工早出晚歸，好晏先返屋企，基本上都係靠子瑜照顧晒兩姐弟嘅起居飲食。

嘩！等陣先，好彩我夠機智，原來隻BOSS準備對住我出絕招，手掣嗰兩粒蘑菇俾我左捽右捽。黐孖筋！差啲死，我手忙腳亂咁避開之後，即刻衝前補多一刀。

Victory Achieved。

鬆一口氣…我終於明黃子俊點解要叫我過嚟…

定過神之後，我獨守空房，聽到佢哋兩姐弟喺出面飯廳準備緊飯餸碗碟嘅對答…





「陳佑男嗰碗飯呢？」黃子俊問道。

「我無預佢喎！」子瑜回應…