【校園／愛情】戀上鄰家女孩（布甸篇）: 15. 愛情來時要捉緊

我唔敢去過份詮釋曉琳咁樣做背後蘊藏住嘅意思，但忽然間我有種感覺，覺得一切都好似嚟得太快... 

嗰日喺餐廳裡面，曉琳毫不猶豫咁拎起我支叉一啖食咗我舊沙嗲牛肉。 

到第二日放學之後，當時我無所事事，想早啲返屋企，但曉琳竟然主動叫我陪佢去文具鋪買紙，結果仲變咗做我請佢食咗個朱古力咪布甸燒，雖然個布甸燒最終跌咗落地搞到佢喊... 

返到課室之後，曉琳仲要我答，子瑜隻手滑啲，定係佢隻手滑啲。 

點解，短短呢一個禮拜嘅種種徵兆，好似喺度暗示緊俾我知，可能曉琳對我都有意思，至會發生呢啲事？ 





本來我以為追曉琳會係一條漫漫長路，無諗過突然間我同佢之間嘅距離好似一下子拉到好近。話雖如此，距離係就係近咗，但係成件事依然好虛無縹緲，好唔真實。明明感覺上捉到一啲嘢，但又講唔出捉到啲咩。 

可能最終攤開手一望，掌心裡面根本就乜都唔存在。 

「又發緊吽哣啊？」曉琳拎住把鉸剪，用個柄位桶咗我手臂一下。 

「喂…你咁樣好危險㗎。」曉琳揸住把鉸剪個刃位，雖然把鉸剪係合埋啫，但個頭都係尖㗎嘛。 

「嘻～」曉琳又再嫣然一笑，同頭先爭住釘我張相個笑容一模一樣。 





「我肚餓啊，你可唔可以陪我去食啲嘢？」曉琳續問。 

「好啊，請你食。」 

望住曉琳個笑容，我情不自禁想報答返佢，所以就衝口而出話想請佢食嘢，至於點解係報答，我又講唔出個原因。不過就係我呢句說話，曉琳又提起勁好快咁執拾面前亂七八糟嘅課室，啲顏色紙同紙碎東一忽、西一忽散到一地都係。而我作為男仔，就梗係應該要將最粗重嘅功夫攬上身，我一手拎起課室個垃圾桶，總之行到邊就執到邊。 

唔使一陣，我哋兩個就將個課室還原靚靚。 

夕陽光暈由淺變深，漸漸將課室一排排學生枱照得一片金黃。 





「我執埋書包就行得啦。」曉琳又跳吓跳吓咁跑返去佢個位度執書包，從佢嘅背影都可以睇得出佢好興奮，總係朝氣蓬勃。 

當我哋行出課室門口嗰陣，我轉個頭向住子瑜個班房方向遠望，見到佢班房燈光映射到旁邊昏暗嘅走廊，代表住入面仍然有人。 

「唔好阻住佢哋二人世界喇。」曉琳扯咗一下我恤衫衫袖，催我快啲行。 

我遲疑咗一秒，覺得曉琳講得都有道理嘅。 

「你啱。」 

跟住我又再帶曉琳去返上個禮拜買布甸燒個商場，四圍逛咗一陣之後，我哋買咗份章魚燒同一杯珍珠奶茶share… 

嗯…因為曉琳話怕肥，但係又心思思想飲甜嘢，所以我哋只係買一杯，兩個人飲。 

同佢閒談之間，先知原來係屋企人逼佢報補習社，即係巴士車身賣晒廣告嗰啲名師班，我就從來都唔知呢啲補習要幾多錢一堂，只係知由細到大屋企都無咩多餘錢俾我去補習。 





曉琳話，轉頭就係佢第一日返補習社，佢有啲緊張而且又無朋友同佢一齊上堂，咁唔怪之得今日曉琳願意留到咁晏同我一齊整，頭先又喺學校催我快啲走。 

曉琳仲同我講，聽日星期五放學之後藍社幹事有例會要開，所以唔可以好似今日咁同我一齊留到咁晏，但佢都想我聽日照樣留低好好咁幫班女仔，睇吓仲有咩要執。 

講真，其實都無咩特別嘢要執，聽朝班同學同Miss Chan返到課室，已經可以見到一個完成度接近100%嘅作品，最多都只係需要補多少少裝飾，但都係可有可無。 

不過聽日就係壁報板設計比賽嘅deadline，過埋聽日我哋就唔使日日留低幫手整嘢，換言之，又少咗個藉口同曉琳相處。 

呢趟短暫嘅獨處時光裡面，曉琳又同我分享咗好多高年級生嘅八卦，例如某某師兄點樣死纏難打咁追我哋同級嘅一個女仔，我諗呢啲事，多數都係佢喺藍社幹事會裡面聽返嚟，雖然我就唔識啲當事人，但聽吓都無妨，知道吓班師兄會點樣出手溝女，當係一個防備都好。 

「你幫我飲埋去吖，我要去補習啦。」我接過呢杯有我同曉琳口水尾嘅珍珠奶茶，再目送佢一個輕巧身形穿過地鐵閘口。 

一行出地鐵站，我先至醒覺原來個天都差唔多黑晒，而新都會廣場嘅投射燈，又將四周圍照到白茫茫。我繼續捧住杯珍珠奶茶，一路啜一路向住屋企方向行。 





當差唔多行到學校附近，終於俾我見返呢個嬌滴滴嘅身影，咁橋佢又同時間發現我，四目相投之後佢竟然轉身走人！？

我大步衝上前大嗌：「黃子瑜你去邊啊？」