【校園／愛情】戀上鄰家女孩（布甸篇）: 14. 意想不到的暗示

「啊～好攰唷，好彩有你幫我咋。」曉琳起身伸個大懶腰，佢隻手差唔多掂到我個頭。 

我輕輕側過頭避開咗佢手臂。 

然後下一秒又後悔做咩要避開... 

「曉琳，不如我哋今日釘起晒佢哋好唔好？」突然間我心血來潮，想今日同曉琳留多陣，將頭先剪好晒嘅大頭相，釘晒落壁報板度。事實上，連續辛苦咗幾日，我哋都係差呢個步驟就大功告成。 

「好吖，難得你咁有熱誠，我又恰咗陣抖足精神，本小姐就恭敬不如從命啦。」叉足電嘅曉琳，又回復返佢充滿活力嘅一面，就係佢呢種活潑好動嘅性格，對男仔嚟講又真係幾有吸引力。 





呢日課室就只係剩低我同曉琳兩個人，我當然負責釘高嘅部份，曉琳就負責釘低嘅部份，釘嘅位置就梗係由曉琳決定，我只係負責執行任務。奇怪在於唔知點解成個課室就係得返一個釘書機，不過都唔緊要，我同曉琳輪住慢慢用，又唔係趕時間。 

「嗱，俾你。」 

「嗯，一陣呢個你釘呢度吖。」曉琳道。 

「OK！」 

呢個釘書機，就咁樣成為我同曉琳喺接住呢個鐘互相交流嘅媒介，雖然唔知道班Visual Arts嘅女仔今日去咗邊，得返我哋兩個人釘晒咁多張大頭相，但係無人喺度咪仲好，無人打擾我哋。 





「當你真心渴望某樣嘢嘅時候，全個宇宙都會聯合起嚟一齊去幫你實現。」 

就喺釘到開始本能反應咁郁動雙手雙腳嘅時候，我又諗起子瑜講過嘅呢番說話，而家釘書機又得一個，課室又無其他人，真係好似全世界都幫緊我咁。 

諗起子瑜，我又會唔覺意留意走廊嗰窗口，隔咗咁耐始終都唔見子瑜行返番嚟，唔知佢去咗邊呢？而家差唔多都五點半，又仲未見家樂返嚟執書包，可能佢哋都努力整緊壁報板？ 

「釘書機釘書機～喂，陳佑男你做咩停晒手腳啊？」當下我俾曉琳用手指篤我大脾，我先發現自己原來發緊吽哣，即刻連忙將釘書機遞向曉琳。 

「啊，小心啊！」我仲竟然一個鬆手，個釘書機脫手而出。 





呢鋪大獲，釘書機重過把間尺咁多，如果砸到曉琳咪... 

「嘩！」曉琳一聲驚呼。 

啪喇！！ 

好彩咋，個釘書機只係跌咗喺曉琳隻腳隔離，真係差少少就砸到曉琳，我即刻喺張凳上面擒返落地，向曉琳道歉。 

「對唔住啊！我無心㗎。」 

「我知你想報仇好耐㗎啦，陳佑男！」只見曉琳向我笑道。 

「你講，你係咪仲嬲我跌咗把間尺砸到你個頭呢！？」 

「無啊，我點敢嬲你呢。」我邊講邊執返起地下個釘書機，拍拍上面啲塵。 





「子瑜你就夠膽嬲，但就唔夠膽嬲我，哼哼！」上次中過一次伏，我就知道曉琳一講起子瑜嘅時候，一定要打醒十二分精神，以免中伏。 

「曉琳我幫你釘埋啦，你攞張相俾我。」而方法就係獻殷勤，轉移話題！ 

「咁好死，咁我坐喺度唔郁啦，交俾你做～」曉琳真係翹翹手，踢住腳咁坐咗喺我張凳度。 

「幫你做晒又點話。」 

的而且確，曉琳遞俾我，我再擒高擒低去釘係有效率好多，只不過本身我又唔係追求效率，啲嘢又唔急住要即刻做好去，今日做唔晒咪留耐啲做，留耐啲都做唔晒咪聽日再做，總言之，多啲時間可以同曉琳相處咪仲開心。 

黃昏時份，夕陽穿過窗邊，照喺課室裡面一排排嘅學生枱，好似專登為咗我哋而將課室嘅氣氛格調昇華。我同曉琳慢慢練成咗一種默契，佢遞俾我，再話我知個位置，就係咁釘吓又一張，釘吓又一張，枱面上嘅大頭相越嚟越少，去到曉琳嗰張嘅時候，我小心翼翼咁度好位先落手。 

「最後一張啦。」曉琳興奮地喊道。 





我轉身望向曉琳，見佢拎住最後一張大頭相，一眼就望得出相中人係我。 

「好，交埋俾我啦。」我如常咁伸隻手向曉琳度。 

「唔制～你釘咗咁多，呢張就等我嚟釘啦。」曉琳嫣然一笑，喺我手上接過釘書機，再趷高腳，諗都唔諗就將我張相釘咗喺佢張相嘅旁邊... 

當日，曉琳提議以「生命之樹」作為我哋班今年壁報板比賽嘅主題，佢想將我哋全班34個同學加埋班主任Miss Chan同其他必修科老師嘅大頭相，好似枝繁葉荗咁散佈喺樹枝上面，借喻我哋全班師生嘅bonding互相緊密連繫。為咗呢個比賽，尋日Miss Chan仲私底下借咗佢部單反相機俾我哋影大頭相用。 

至於點解要叫生命之樹，我就唔係好記得佢哋諗出嚟嘅解釋啦，總之而家我張相，同曉琳張相就位處喺呢棵樹嘅正中間，零舍顯眼，連我自己都嚇咗一跳...