[少甜][愛情][校園][真人真事改編] 自從我爸爸過左世，我遇上左佢: 31

打完首場學界之後過左冇幾耐就係首次既測驗。
老實講，我一啲都唔驚。
雖然話就話我日日都上堂訓教，但夢兒姐姐每日都會捉住我温書做功課。
所以基本上教既野我都識，至少叫做及格咁啦。
不過最煩既係測驗期間學校冇波打，夢兒詠兒姐姐兩個又日日温書。
冇人陪我又冇波可以練，唯有去揾下偉哥佢地打波過日子咁。
直至終於捱到測哂驗，我先至有得同兩位美人甜蜜一下。
另外，喺測完驗之後，就係我地第二場既學界。
嗰日唔知咩事，我好早就訓醒左，所以提早左嗰個場到諗住射下波。
嗰個場有兩個全場，啫係四個籃框可以用。




點知我去到已經見到有個女既練緊射波，而另一個場又有一班着住YMSS既傻仔熱緊身。
我就去左個女仔嗰個全場既另一個框到射。
點知我射到一半，見到嗰幾條傻仔走左去撩個女仔。
個女仔睇落好唔想理佢地，但佢地又一直係咁撩佢。
本來我都唔係好想理佢地，但一見到個女仔好慘咁，我就行左過去。
「咩料啊，人地都唔想理你地就咪煩人啦。」我拎住粒波過去。
「收皮啦矮仔，我地教女仔打波關你咩事?」着10號波衫嗰個好串。
「係教都我教，你地憑啲咩?」我擺出一副嘲笑佢地既樣。
「你? 咁矮識打波咩?」其實佢都唔係好高，得嗰一米七幾。
我轉左一下我手上既籃球，輕佻咁講:「勁就唔勁，不過夠打爆你。」




「算啦不如，佢地YMSS係上年冠軍黎架。」隔離個女仔拉左我隻手一下，好似有啲驚。
我當然唔會要佢驚啦，笑住輕輕咁喺佢耳邊講:「唔會有事，放心。」
「哈哈，你打爆我? 黎囉，單挑啊，打三球，讓你開波。」佢好有自信。
咁我就唔客氣啦。
佢擺出左一副放我射三分既姿勢。
我手起刀落，直接完美咁穿針入左第一球三分。
「撞彩架啫。」佢周圍啲隊友喺度笑住講。
第二球，一模一樣既動作，又入左多球三分。
佢地開始無野講。
個十號人想貼近我，咁就中哂計啦。




我向右突破，佢既速度根本跟唔上我。
輕鬆上籃，結束左呢場單挑。
佢地幾個完全呆左喺度，冇諗過個十號會打輸我。
而個女仔先係驚訝左一下，之後就拉住我隻手慶祝，跳下跳下咁。
大驚小怪，要贏呢條傻仔有幾難。
個幾條傻仔就咁就走左，剩低我同個女仔。
原來個女仔都係籃球隊黎，我記得個學校名係我間學校附近既一個女校黎。
「你真係好勁啊! 你都係黎打學界既?」個女仔問。
「係。」其實我想返去射波。
「你好啊! 我係 FMGS既劉天恩，你可以叫我天恩或者Rachel，讀緊中五，多謝你岩岩幫我解圍」佢笑住咁自我介紹，仲伸左隻手出黎想握手。
「呃，我係Prince College既周喻希，讀緊中一，岩岩小事啦，冇咩事既話我都係去射波先。」我同佢握完手就拎住粒波返去射。
不過我岩岩講我中一嗰下，佢明顯呆左，應該冇諗到我先中一。
是旦啦，都唔撚關我事。
唞左一陣，Henry佢地都黎齊哂，差唔多要開始比賽。
喺我地比賽前一場就係岩岩嗰個女仔既比賽，我同阿鋒坐左喺側邊睇。




天恩着既係11號球衣，同我一樣。
不得不說，女仔黎講佢算係幾勁。
識射波，拍波，又有啲速度，基本上都係佢carry緊場波。
FMGS成場壓住對手黎打，好輕鬆咁贏左場比賽。
之後就到我地打，咁岩我地今場既對手就係頭先搞事既YMSS，啫係上年既冠軍。
不過最好笑既係，對面個10號見到我，塊面都青哂。
睇黎呢場比賽既勝負冇咩懸念。
第一節我地五個正選照樣上，真係岩哂，對位我既就係個10號。
或者係我本來就唔爽佢，亦有可能係諗起佢岩先恰天恩，我一拎到波就不停咁變向。
我想做到既係 -- 收割佢既腳踝。
佢一開始都仲穩得住腳步，但我變向既幅度突然再加大，佢一唔小心就跌低左。
周圍既觀眾全部都大叫哂，而我就穩穩咁射左球穿針既三分。
個10號睇落好嬲，但同時塊面都紅哂。
都係既，所有好多學校既校隊都喺等緊比賽既時候睇緊我地打。
喺多人面前比個矮咁多既人ankle break，我係佢就即刻走佬。




我成場都好認真咁對待，鬼叫佢地要同我結怨。
後尾先知，原來我呢場拎左34分，刷新左生涯新高 (上場27分)。
亦都因為呢場比賽打爆左上年冠軍，我既名氣好似高左唔少。