[少甜][愛情][校園][真人真事改編] 自從我爸爸過左世，我遇上左佢: 25

之後嗰晚都係好似平時咁，同夢兒姐姐一齊過。
而星期日就係我期待左好耐，同夢兒姐姐出街既日子啦!
「希希~ 你今日想去邊啊。」夢兒姐姐食緊早餐既時候問。
「不如我地去行下街?」我提議。
「你唔係想睇戲咩?」夢兒姐姐問 
「睇戲要專注睇套戲啊嘛，行街可以一直望住你!」我笑住咁講。
「口甜舌滑啦你!」夢兒姐姐聽到好開心。

所以我地最後都係去左行街，嗯，都係旺角。
同樣既地方，但喺我隔離拖住既宜家係夢兒姐姐。




好少會同夢兒姐姐出黎拍拖，所以我要好好珍惜今日呢個機會。
「夢兒姐姐 ! 不如我地扭隻蛋?」我地去左信和，雖然我地都冇話特別鐘意動漫嗰啲，但都想睇下。
「我扭呢個!」夢兒姐姐指住左個迪士尼公主系列既扭蛋機。
「好啊。」我拎左張八達通幫夢兒姐姐比左錢。
「多謝希希~」之後佢就扭左隻蛋出黎。
扭出黎既係個着黃色裙既公主。
「係貝兒啊!」夢兒姐姐笑得勁開心，好似啲細路仔得到左自己想要既玩具咁，勁得意。
「貝兒? 咩黎架?」我問。
「Beauty and the beast既公主啊，我最鐘意架!」夢兒姐姐雙眼發哂光。
雖然我都係唔知佢up咩，不過佢開心我就開心架啦。




後尾我地繼續行黎行去，見冇咩野想買就去左另一個商場。
我地又入左一間賣飾物既舖頭。
「哇呢個玉桂狗既頭飾好得意啊!」佢拎左個白色成隻兔咁既公仔頭飾。
「你鐘意?」我問。
佢擰左擰頭，但佢又拎左去比錢。
到底佢想做咩呢?
冇錯... 最後受罪既係我。
「哈哈哈! 好得意啊!」冇錯，佢將個頭飾戴左落我個頭。
當我諗住除落黎既時候，「你唔準除落黎架! 如果唔係我嬲你!」佢笑住咁吩咐我。
冇辦法啦，為左哄自己心愛既女人，有時係要做啲犠牲架啦。




一路上，喺旺角路過既人都望住我，有啲就笑我，有啲就討論我話我得意。
哼，你地有得同好似夢兒姐姐咁靚既女仔行街咩，羨慕唔黎架啦!

行到我地都覺得有啲肚餓既時候，我地就去左一間食拉面既舖頭食野。
雖然日本拉面係有啲貴，但同夢兒姐姐食，值得!
因為我唔太食得辣，我叫既係豬骨湯味既拉面。
而夢兒姐姐就嗌左個同佢一樣咁辣既拉面，佢超鐘意食辣。
「希希~你試下我呢個。」夢兒姐姐夾左佢個碗既面餵我食。
哇，好辣，但又好甜啊!
有夢兒姐姐餵，幾辣都變到甜。
我又夾左啲我既餵夢兒姐姐。
「嗯! 好食! 嘻嘻~」夢兒姐姐滿面幸福。
食完之後夢兒姐姐話想買本書睇，所以我地行黎行去想揾間書局。
終於揾到間書局，夢兒姐姐好認真咁揾佢想睇既嗰本書，而我就當然唔會有書想睇啦。
「揾到啦!」佢一拎到本書就開黎想睇下，體貼既我當然喺隔離陪佢啦。




我一直望住好專心睇書既夢兒姐姐。
佢真係好好學，一拎到書就停唔到落黎，專心既佢望落更加吸引，令到我好想鍚落去。
因為夢兒姐姐挨住左書牆黎睇，我決定做樣好大膽既事。
我一隻手拍左落牆到，夢兒姐姐嚇左嚇望住左我。
我地雙目對視，岩岩嚇左一嚇既佢眼神中露着一股嬌羞。
呢個眼神，令我更加想征服佢。
我慢慢咁靠近，近到已經感受到夢兒姐姐既呼吸。
夢兒姐姐塊面已經紅到好似蘋果咁。
再靠近一啲，我既嘴唇岩岩好掂到夢兒姐姐既嘴。
「嗯」夢兒姐姐發出左細細聲既喘息。
好甜，好清涼，好舒服。
雖然夢兒姐姐接吻得好生硬，但更加突顯佢清純既感覺。
慢慢佢地適應左，我地開始交換唾液，我地已經唔記得左我地喺書局。
夢兒姐姐既口水，好甜，好好味。
忽然，夢兒姐姐推一推開左我。




「我地仲喺外面架。」佢將我拉返返黎現實。
「夢兒姐姐，我愛你。」我將夢兒姐姐攬左入我既懷裡。
「我都係啊希希。」佢深情咁望住我。
之後夢兒姐姐就比左錢買左本書，我地都決定返屋企lu。