[少甜][愛情][校園][真人真事改編] 自從我爸爸過左世，我遇上左佢: 26

因為第二日要返學，所以嗰晚我地趕埋啲功課，好早就訓左。
第二朝我地都係照樣一齊返學。
今日放學有社籃訓練，所以我就同左夢兒姐姐講唔洗等我。
上堂既內容我就唔多講啦，都係嗰啲野啦。
小息嗰時，Henry黎左揾我。
「我地A grade第一場學界，就黎打啦。」Henry通知我。
「下? 咁快?」我有啲驚訝。
「係啊，因為F6要考DSE， 所以A grade好早開打。」佢解釋。
「所以我地打算加操，一個禮拜會操三日，你Ok嗎?」佢繼續講。
「冇問題，我除左打波之外冇野做。」我冷冷咁答。




點知佢比個時間表我睇，今日練完社籃仲要加操A grade訓練。
睇黎係打算將我榨乾...
當然，我冇反對到，唯有攰死啦。
放學之後一如既往咁去操社籃，阿鋒同Wilson睇黎係知今日有加操，佢地社籃練得有啲渣漏灘。
我就當然好認真咁練啦，我從來都唔驚體能唔夠用。
今日夢兒姐姐同詠兒姐姐都有黎睇，唉，搞到我心情好複雜。
我表面上係同詠兒姐姐拍拖，但心底其實已經知自己最愛既係夢兒姐姐。
另外，Christy姐姐今日都有黎，不過佢都仲係咁高冷。
休息嗰時，詠兒姐姐想幫我抹汗，我睇得出夢兒姐姐個眼神好唔開心。
所以我就借機話想去廁所，停止左詠兒姐姐。




望到夢兒姐姐傷心既眼神，搞到我都好心痛。
到底我應該點做? 我心底最愛既係夢兒姐姐，但我又唔捨得唔要詠兒姐姐。
點算好... 我到底應該點做。
我返到去之後同佢地講我仲要加操，所以叫佢地唔好等我。
後尾佢地三個人都一齊走左，我亦都暫時唔洗糾結喺度。
咁樣落去都唔係一個辦法，我一定要好好處理。

加操既時候，或者係因為太攰，又或者係我有心事，所以我打得好差。
雖然隊友見我咁樣既狀態都有啲怨言，但佢地見我都唔開心，所以冇屌我。
「喂咩事啊希仔，到底你諗緊咩啊。」Henry見我有啲心不在焉，休息嗰時問我。




「冇啊，係個人有啲攰啫。」唔通我話我同時同兩個姐姐拍拖，唔知點算好咩。
「嗱，男人唔係愁錢就愁女人，你都唔似冇錢啊，點啊，同你個詠兒姐姐嗌交?」佢搭住我膊頭咁講。
咁都比佢估到，不過我都係擰擰頭。
 佢都冇再追問落去，拍左我一下就起身走左。
唞完又要繼續練，到最後成八點先練完波，我攰到攤左喺地下郁都唔郁。
阿鋒同Wilson一早喺休息嗰時就已經攰到話唔練，返左屋企。
我唞左陣有力就已經返屋企。
「希! 你返黎啦!」本來睇緊電視既夢兒姐姐衝左過黎攬我。
「夢兒姐姐! 我就黎攰死啦!」唯有攬陣夢兒姐姐叉下電。
沖完涼之後就同夢兒姐姐撐枱腳，我地都係食外賣咋。
因為今日真係攰到傻，我就冇同夢兒姐姐做功課，攤左喺床到休息。
「希希~」夢兒姐姐突然入左黎我間房。
「我黎幫你按摩架!」講完佢就跳左上我張床。
「啊，好舒服啊。」唔講笑，由細到大都未試過比人按摩。
雖然其實夢兒姐姐唔係好有力，但剩係因為佢係夢兒姐姐，就已經滿足哂啦。




後尾夢兒姐姐按到攰就攤左喺度，我地攬住對方，差啲就訓着左。
如果比返到黎既媽媽們見到就含得撚了，所以佢後尾都返左去自己間房。
我就倒頭大睡。