[少甜][愛情][校園][真人真事改編] 自從我爸爸過左世，我遇上左佢: 24

「希希! 你返黎啦!」夢兒姐姐喺廳到見到我一返黎就好開心。
「係啊夢兒姐姐! 冇見你一陣就好掛住你啦!」我宜家呢一刻好想衝去攬住夢兒姐姐，但成身汗就算了吧。
我去沖完涼換好衫就即刻入左夢兒姐姐間房揾佢。
「夢兒姐姐!」我跳左上佢張床到攬住佢。
「希希! 我都好掛住你啊。」我地喺床到攬住對方，如果我嗰時心思歪啲可能就做左唔同既野。
但我都只係同夢兒姐姐攬住對方，感受對方身體既温暖。
可能我真係太攰，我地攬下攬下就訓着左，再次醒已經8點幾。
「希希你醒啦，你訓緊覺個樣真係好可愛。」一開眼就見到夢兒姐姐望住我。
「訓醒就見到夢兒姐姐，我真係好幸福。」我笑住咁講。
「要起身食野啦懶豬，再唔食飯就太晏啦。」夢兒姐姐




「我地食咩好啊?」
「不如落去食個M記? 我好耐冇食啦。」
「都好wo，咁我地行咯。」
之後我地換左衫就落左去食左個M記餐。
雖然M記啲野係參差架啦，不過同夢兒姐姐食咩都咁好食。
「係wo，呢排冇同你做功課，你自己有冇乖乖地做啊?」行緊返去嗰時夢兒姐姐問。
「呃...」我都唔知點答好。
「你啊你啊，中一就已經咁懶豬啦，冇我睇實你都唔掂既，今晚我地要開始返功課班啦!」夢兒姐姐摸摸我個頭。
「係既!」其實我個心不知幾咁想。
我地返到去就即刻開工。




好耐都冇同夢兒姐姐一邊做功課一邊傾計。
好幸福呢。

第二日可以訓到自然醒，因為今日係星期六啊!!!
但起身都見唔到夢兒姐姐，我check 一 check whatsapp
夢兒姐姐 : 我今日要返學校幫手整野啊，聽日先陪你玩啦~
詠兒姐姐 : 希希!! 我好掛住你啊，不如我地出黎拍拖拖?
梓軒 : 喂小王子，打唔打波?
當然，首先覆左條7頭唔打波先。
然後就覆夢兒姐姐 : 咁好啦~約定你架啦。




就到詠兒姐姐 : 好啊! 我都好掛住你啊。
所以我地就約左一點喺地鐵站到等。
因為我地今日決定出旺角到行街。

「BB，你睇下呢條手繩幾靚，不如我地買黎一齊戴?」
「BB? BB? 周喻希!」詠兒姐姐打左我一下。
「嗯? 咩事啊。」我頭先發左下夢。
「我嗌左你好多次啦，你都唔應我。」詠兒姐姐好似有啲嬲咁。
 「sorry啊，可能呢排練波有啲攰。」我嘗試兜。
「你唔係攰啊，點解你好似心不在焉咁既。」詠兒姐姐睇穿左。
係，其實我個心係諗緊夢兒姐姐。
自從夢兒姐姐同我好返之後，我個心就一直諗住左佢。
「唔係啊，係呢你話呢條手繩靚? 我都幾鐘意啊，就呢兩條啦。」之後我就買左嗰兩條手繩。
「BB我幫你戴啊。」我拎左條手繩幫詠兒姐姐戴。
「周喻希，你老實答我，到底你諗緊咩?」詠兒姐姐望住我問。




「唔係啊，我真係練波練到有啲攰。」我答。
「你係至好，唉，你有咩都要同我講架知唔知啊。」佢終於都信左。
「知道啦BB，我地行啦。」之後我就拖住詠兒姐姐行。
後來我都盡量個心擺係詠兒姐姐到，唔去諗夢兒姐姐。
不過我都係覺得好唔舒服，最後提議早啲走。
或者詠兒姐姐都睇得出，或者佢真係覺得我攰，所以我地好早就走左。
我照樣都送左詠兒姐姐返佢屋企。
臨走既時候，佢示意要goodbye kiss。
最可怕既係，當我哄到埋去鍚佢既時候。
我望到既係夢兒姐姐，我當左詠兒姐姐係夢兒姐姐。
路上行返屋企既時候，我沉思緊。
到底我係咪當詠兒姐姐係夢兒姐姐既替代品呢?
會唔會我一直都只係鐘意夢兒姐姐，而詠兒姐姐只係因為我嗰時失去左夢兒姐姐而當佢係夢兒姐姐咁看待?
我個心越諗越痛，我覺得自己好對唔住詠兒姐姐。





行下行下去左籃球場，原來梓軒黎左呢度打波，仲要係同偉哥佢地打緊。
我望一望個時間，先四點幾。
過去打陣波散下心都好。
我坐左喺個長椅到，睇佢地打波。
梓軒打得越黎越好，佢既速度同運球，仲有射波都一直顯著咁進步緊。
連班大叔裏面比較識防守既都唔太守得住佢。
好快，梓軒嗰隊就贏左，打完波既佢地都終於見到我。
「喂細路，終於蒲頭啦。」偉哥行埋黎講。
「屌你上次黎都唔見你。」我講。
「呢排忙啊嘛，唔洗温錢咩。」講真我到宜家都唔知佢地做咩工種。
之後我就join左梓軒嗰隊。
「呢個後生仔都幾好波架。」偉哥同我講。
「屌，我同學黎。」我笑住咁應佢。
「下，小王子，你識呢班阿叔架?」梓軒見我同偉哥有講有笑就問。
「屌，細路由細跟我地打波打大架，佢有唔少招都係我教既。」隔離個狗叔就解釋。




「原來係師父既師父，失敬失敬。」梓軒做左個拜既手勢。
「喂細路，乜你收左個徙弟咩?」大B講笑咁講。
「屌，開波啦，咪理條傻鳩。」我吹佢地開波。
講真，由細到大都係咁，就算有咩煩腦都好。
只要同呢班大叔打番場波，就咩事都冇哂。
到最後梓軒仲話要拜埋佢地做師父，真係笑死我。
班阿叔都好歡迎梓軒佢，始終佢個人都onon99，同佢地幾似。