[少甜][愛情][校園][真人真事改編] 自從我爸爸過左世，我遇上左佢: 19

「希希! 飲呢支啊~」係詠兒姐姐，佢拎左支寶礦力比我。
「唔該詠兒b...啊姐姐。」差啲嗌錯左。
休息既時間真係唔係幾夠，不過點都要上番場。
開波之後，我發現體能真係唔係幾夠，防守同進攻都要包辦哂。
所以我決定防守hea啲，放射唔放剷。
對面三分起手，果然係打鐵，籃板比阿鋒穩穩咁拎到。
進攻既時候，我罕有咁叫阿鋒幫我Pick，我過左pick之後對面兩個對哂上黎。
阿鋒roll入去之後我吊左粒波比佢，咁樣打舒服好多。
我多打左配合之後，黃社完全唔係對手。
最後比分落左喺 51:46




講真，打完之後成個人真係無咩力。
「好叻啊你!」詠兒姐姐攬住左我。
好彩所有人都沉醉哂喺贏波既氛圍，冇留意到。
所以我乘機鍚左佢一啖，佢成塊面紅哂。
「好彩你趕得切咋，你知唔知我見個比分比人拉到咁，幾鬼驚啊。」隊入面其中一個人講。
「我就唔係咁話啦，我一直都相信希哥既!」另一個傻仔又講。
「你係鬼啊，岩先見你驚到塊面青哂。」好耐冇提過既William都出左句聲。
我冇理到佢地，同詠兒姐姐行開左，佢話想偷偷地同我影返張相，紀念下。
我地去左學校既「偷情聖地」，一條幾隱閉既通道。
詠兒姐姐拎住部手機負責影，而我就鍚左落佢塊面度。




影完一張之後又到我揸機，佢鍚我。
後面仲有一張我地嘴對嘴既，真係好正，好sweet。
換返衫之後班隊友本來叫我去賀下，一齊食飯。
我當然唔會啦，我要同詠兒姐姐食。
所以就話要返屋企做功課，下次先。

「希希你打波真係好型型啊~」詠兒姐姐一路翹住我隻手我一路講。
「口花花啦你bb。」我輕輕咁搣左下佢既面豬登。
後尾我地去左間糖水舖食糖水，因為詠兒姐姐話佢唔係好肚餓。
佢叫左個雪芭，我叫左個香蕉船。




佢餵我食佢嗰個，我又餵番佢一啖。
就係咁，又結束左一次約會，因為詠兒姐姐話聽日有測驗，唔可以太夜。
我送左佢返屋企之後就返左去。

「咦希仔你返黎啦。」係阿媽，好耐冇見。
「係啊，今日遲左少少返。」我一邊除鞋一路應佢。
「咁過黎食飯啊，我地好耐冇食飯啦，我今晚煮左飯。」阿媽叫到又冇得推既。
我望一望，夢兒姐姐同楊姨姨都喺度，剩低夢兒姐姐隔離個位。
我尷尷尬尬咁坐低，阿媽同楊姨姨都唔知夢兒姐姐嬲左我。
佢個樣都仲係冇咩色彩，隻眼仲腫過今日見佢嗰時。
講真，你話唔心痛我自己都唔信，但可以點? 佢都唔理我。
成餐飯我同夢兒姐姐都冇咩講野，都係楊姨姨同阿媽傾計多。
食完之後我幫手執埋野，就去左沖涼。
本來諗住話沖完涼做功課，但又有啲掛住詠兒姐姐。
想揾佢，但又諗到佢聽日有測驗，算啦都係唔煩佢。




平時呢個時候我應該係同夢兒姐姐一路傾計一路做功課。
宜家佢唔理我，啲時間多左出黎唔知做乜好。
最後都係決定攤下喺張床到休息下算。
諗返呢幾日發生既事，都真係幾夢幻下。
本來因為激嬲左夢兒姐姐，想哄佢。
結果佢都係唔理我，搞到我傷心到喊。
點知因禍得福有左詠兒姐姐。
宜家又甜蜜到傻，講真我都唔敢相信自己同詠兒姐姐拍緊拖。
好似我之前所提及咁，詠兒姐姐係校花級既人。
我呢啲form 1仔，唉，越講越自悲。
唔理啦，反正詠兒姐姐係愛我既，有呢一點就夠啦。

「希希? 我可唔可以入黎?」係阿媽既聲。
「可以啊，我都係休息緊啫。」阿媽聽到就入左黎。
「仔，你係咪同夢兒鬧左交?」阿媽有啲認真咁問。




「吓，做咩突然咁問。」屌，係人都估到啦，我相信阿媽係咁諗。
「你岩先同夢兒啲眼神左閃右避，一句說話都唔講，唔係鬧交可以係咩?」阿媽都冇我咁好氣。
「呃，算係? 其實我都唔知自己做錯左啲咩。」之後我就將呢幾日既事一五一十咁講。
當然，冇講到我同詠兒姐姐一齊左既事。
「阿媽都唔想介入你地既事，但我覺得希希你作為男仔唔應該因為佢唔理你，你就唔理佢，夢兒一直都好照顧你，阿媽呢一點好肯定。
就算你唔知自己做錯咩事都好，你都應該去努力了解夢兒既想法知道嗎? 大家都住喺同一間屋，我都當左夢兒半邊女，男人大丈夫，
能屈能伸，唔好咁小氣啦，好好去問下夢兒，佢唔理你一次你就問兩次，哄到佢開心返，知道嗎?」
呢一刻我有啲懷疑自己係咪親生... 同埋點解阿媽講到夢兒姐姐好似我女朋友咁... 
不過都有啲道理既.. 唉，我再試下啦。
「知道啦阿媽，啊係啊，我對鞋爛左啊，所以我今日買左對新既。零用錢... 我用哂啦嘻嘻。」我轉移話題。
「真係冇你咁好氣... 得啦，阿媽一陣比你。」媽咪講完就轉身走左lu。
我就繼續訓喺度反思下先。
唉，都係等聽日問下詠兒姐姐意見算。