[少甜][愛情][校園][真人真事改編] 自從我爸爸過左世，我遇上左佢: 20

「我媽媽睇穿左我同夢兒姐姐嗌交，之後...」第二朝，我同詠兒姐姐約左一齊返學。
所以就趁呢段時間同佢講左尋日啲野。
「我都覺得你應該繼續試下先。」詠兒姐姐聽完之後講。
「但我...」一諗起夢兒姐姐連望都唔望我一眼，我就心痛。
「一係，我陪你去揾夢兒?」詠兒姐姐提議。
「都好~ 有詠兒姐姐陪我就冇咁驚。」於是詠兒姐姐話佢會約夢兒姐姐食飯，到時我再join佢地。
我地各自返班房，唔知點解感覺今日好多人路過都會望住我。
就連喺班房，其他同學都會成日望過黎我度。
到底發生左啲咩事?





「喂小王子，拍拖又唔講比我地聽。」梓軒又喺度發神經。
「你都痴鳩線，拍乜撚野拖?」我都懶得理佢。
「你冇可能唔知既，尋日完左社籃你同Form3嗰個姐姐去左偷情聖地影相啊嘛。」
聽到佢講呢句，我成塊面青哂。
屌，唔通真係比人發現左? 
「你講乜撚野啊，你邊度聽返黎。」我問。
「下，你IE黎架? 討論區有人話見到你打完就去左同個師姐影相，又鍚又攬咁wo。」梓軒有啲驚訝我唔知。
咁就講得通點解個個都好似望住我咁。
仆街，唔通咁快就已經散哂出去?
咁... 夢兒姐姐咪知? 冇事既，佢知都冇咩大不了。





好快就過左兩堂，小息嗰時詠兒姐姐都黎左揾我。
「Sorry啊希希，我一想揾夢兒講野，佢就避開我，我唔知點解佢連我都避。」詠兒姐姐道歉。
「唔緊要啦傻豬，都唔關你事，咁我諗我再自己揾下佢啦。」我安慰道。
「加油啊希希，你一定得既~」詠兒姐姐真係好得意。
「係呢，你知唔知討論區好似講緊我同你。」我問。
「知啊，做咩事?」詠兒姐姐點點頭。
「你... 唔介意咩?」我關心道。 
「傻啦~點會介意啊。」詠兒姐姐笑左笑。
「佢地個個都話你見我出哂風頭，先至痴黎我到，仲有好多難聽既說話，你唔會唔開心?」我好擔心。




「希希，真正既想法係得我同你先至知，而且你知我唔係咁已經足夠，同埋得到左希希你已經抵返哂啦~」詠兒姐姐都係笑住咁講。
「咁就好啦，我幾擔心你會因為嗰啲說話而唔開心。」到我摸左下詠兒姐姐個頭。
「希希你咁關心我，我真係好幸福啊!」
「有詠兒姐姐，我都好幸福!」
就係咁，我地痴多左陣對方小息就完左。

上多左幾堂之後就到lunch time，理所當然地我同詠兒姐姐食啦。
之後上緊數學堂嗰時，梓軒講起左一個幾引我注意既話題。
「你諗唔諗住入籃球隊?」梓軒問我。
「入掛，如果唔係都冇其他野可以做。」我答。
「咁你記得聽日要去選拔啦。」佢提我。
原來籃球隊選拔係聽日，佢唔講我都唔知。
 話說今日放學有社籃，係藍社對綠社。 
只要藍社贏多場，我地冠軍賽就係對藍社。
我有問詠兒姐姐要唔要一齊去睇架。




點知佢話佢約左Christy姐姐去行街街，陪唔到我 ;-;
冇計啦，唯有做番個孤獨仔，自己一個人睇。

放學之後我好休閒咁去左買支朱古力奶，揾左個靚位睇波。
無論藍社定綠社都好，點睇都勁過紅黃社，當然係講緊我未上場啦。
嗰個牧楓原來係綠社既球員，雖然佢比我當狗咁撚，但實際上佢又唔係真係廢到盡。
所以佢應該都係先發上場? 
至於藍社就睇落都似識打波，但老實講，應該都係班廢柴黎。(喺我眼中個個都咁廢)
「喂細路，尋日幾好波wo。」有個着住件藍色衫既球員過黎撩我。
「下場對住我地就冇咁好打架啦。」佢個樣好撚串。
「唔洗理佢，佢係我地隊最廢既人黎。」另一個睇落幾大隻，幾型既同我講。
「我叫浩然，你可以叫我Henry。」佢繼續自我介紹，我都係冇理佢。
「其實我係籃球隊隊長黎，中五既趙浩然，我係覺得你尋日打得好勁，所以想揾你入隊。」原來係想黎拉我入隊。
「我叫周喻希。」我簡單咁講。
「我明白你既技術比起我地籃球隊既任何一個人都勁，正因為咁我地需要你既力量，我地真係好想拎番次冠軍。」佢一個中五既肯咁樣放低面子。




我都係時候比番啲回應。
「你打完呢場我地再講。」我飲左啖朱奶。
「一言為定。」佢講完就走左去熱身。
場波好快就開始左，因為我唔喺場，所以我略略講下啦。
呢個Henry好明顯係打一個小前鋒既位置，佢身高唔算高唔算矮，有一米七六以上，而且速度好快。
所以佢攻防兩端都真係打得好出色，仲好識串連隊友去進攻。
好老實講，佢係我喺呢間學校見過最識打波既人。
然後嗰個牧楓同佢嗰隊既一個大前鋒配合得都唔錯。
牧楓同樣都係唔太高，仲矮過Henry，所以係偏向後衛。
佢雖然上次比我打爆，但對番差唔多水平既人就表現得唔錯。
最後既比分係藍社以31比27，算係險勝綠社。