[少甜][愛情][校園][真人真事改編] 自從我爸爸過左世，我遇上左佢: 14

感覺都返哂黎啦，個感覺好似打完飛機咁。
呢幾日一直屈住喺心入面既苦悶感，全部都發泄哂出黎。
話說呢個時候既我連飛機都唔識打。
向偉哥佢地道別左之後就真係返左屋企啦。
夢兒姐姐仲早過我返，佢已經買左兩袋外賣做我地既晚餐。
之後既夜晚同星期日都係無咩特別，全部都係用哂黎hea同埋做功課。

去到星期一，係第一場社籃之後既第一次集體訓練。
宜家暫時係 紅社 1:0 黃社 藍社 1:0 綠社
只要拎多一分，就可以爭奪冠軍啦。




放學之後我就換衫去籃球場，下一場社籃就喺星期三，啫係後日。
都係好似上次咁，我都係最早到，其他人都係陸續先到。
比較有趣既係，今日社長都有黎，佢隔離仲企左個幾靚既女，望落幾次跟班。
我問左問阿鋒先知原來佢係副社長。
順帶一題，今日夢兒姐姐冇黎睇，反而詠兒姐姐有黎。
詠兒姐姐都係紅社，佢黎睇都叫做正常既 (?
休息既時候社長黎左我地隔離同我地講野。
「大家都辛苦哂啦，可惜我唔識打波，如果唔係我一定會落場同大家搏殺，好多謝大家既付出，
甚至有成員上場受左傷，我睇到都覺得心痛，但只可以企喺一邊幫大家打氣。Anyway，
如果大家想有咩支援既，同我或者副社長講就得啦，我地一定全力支持大家! 紅社加油 ! 」




講真我聽到一半都唔係幾想聽佢講野，雖然佢係幾nice，但呢啲說話有邊個唔識講啊。
「希希 !」詠兒姐姐叫左我出去。
「做咩事?」我有啲不解。
「你練完波有咩做啊?」佢笑住咁問。
「冇啊，返屋企囉。」我如實咁答。
「咁不如你陪下我? 我好悶啊 哈哈。」詠兒姐姐問。
「下... 呃。」我有啲猶豫。
「放心啦，我揾得你一定唔會要你出錢。」詠兒姐姐拍哂心口咁講。
其實我擔心既係夢兒姐姐唔知會點諗。
「哦~ 放心啦，夢兒唔會知架。」佢睇穿左我既心思。




「咁好啦。你等我練埋波先。」我答應左。
「好嘢! 加油啊希希。」詠兒姐姐講完就去返佢個位度等。
今日我既狀態完全返哂黎，隻腳都發揮得好唔錯。

「行得啦。」我換返件衫之後就同詠兒姐姐講。
「Yeah~! 拍拖拖lu 。同希希去行街街 ! 」如果平時有人咁講野我一定打7佢，但唔知點解詠兒姐姐咁講又冇野。
我地去左附近既商場到周圍行下。
見到有間零食店，詠兒姐姐就拉左我去夾糖。
我最鐘意就係嗰個蛋形既糖，詠兒姐姐知道之後夾左好多。
佢拎住袋糖，攞左一粒出黎餵我食。
之後我又揀左粒可樂糖比佢食。
見到有賣衫既舖頭，詠兒姐姐就好似癲左咁，拉住我去揀衫。
佢拎左條白色既連身裙問我好唔好睇。
我望左一眼，發現又真係好岩佢。
所以點左一下頭，佢就已經即刻買左。




後尾有間賣男裝既，佢又捉左我入去。
「你連男裝都岩?」我笑住咁問佢。
「買比你架傻豬!」佢拍左一下我個頭。
「下，唔好啦。」我講。
佢冇理我，揀左幾件衫，拼左喺我個身到。
結果我就好似換裝娃娃咁，比詠兒姐姐換黎換去。
最後佢冇理我就去左買單，買左幾件衫同褲比我。
「呃... 多謝詠兒姐姐。」我好少多謝人，但今次例外。
「唔洗客氣啦希希~」詠兒姐姐摸左下我個頭。
行下行下都已經成七點，我本身諗住話返屋企食飯。
「都咁晏，不如你陪我食埋晚飯先?」
我諗左一下，宜家返去都未必有野食，所以就答應左。
詠兒姐姐帶左我去一間意式餐廳。
我地各自都叫左份意粉。
「哇希希，我呢個白汁既好好味啊，你試下。」




詠兒姐姐卷起左佢個意粉，餵我食左啖。
「嗯! 真係幾好食啊 !」我點點頭。
詠兒姐姐指左一指我個意粉，再指左一下佢個口。
所以我照板煮碗咁卷左我啲意粉，再餵佢食。
「嗯 ! 希希嗰個都好好食 !」詠兒姐姐笑住咁講。
就係咁，我地食完晚餐之後，我提議送詠兒姐姐返去。
佢屋企其實好近，佢都答應左。
「多謝你啊希希，我玩得好開心啊~」我地話咁快就去到佢樓下。
「我要多謝你至真 。」我點左點頭。
「我地下次再玩過~」詠兒姐姐摸左下我個頭。
「好啊!」我爽快咁答應左。
「bye bye」「bye bye」佢就返上樓，我就返屋企。
呼，今日都真係幾攰下。