[少甜][愛情][校園][真人真事改編] 自從我爸爸過左世，我遇上左佢: 13

終於都到左星期六，呢一個禮拜真係攰死我。
不過以往既周末都係打波去渡過，宜家冇得打波都唔知做乜好。
「夢兒姐姐，不如我地去睇戲啊~」食早餐嗰時我問夢兒姐姐。
「sorry啊希希，今日我要返去學校幫手準備社既野啊，我地下次再去睇戲啦好唔好?」夢兒姐姐摸一摸我個頭。
「咁好啦，我再睇下有咩做啦 ; ( 」我擺出左一副失望既樣。
「我約定你下星期六同你睇戲啊~咁我出去先啦希希，乖乖。」夢兒姐姐哄完我之後就出左去。
我開左部手機黎睇，發現有好多whatsapp 冇睇到

思穎: 你得唔得閒啊 : D 不如出黎睇戲? 
媽: 我今晚要OT，唔返黎食飯。




梓軒: 幾時一齊打波?
我覆左阿媽一句OK 同 梓軒一句唔得閒之後。
輪到思穎

我: 冇錢。
好快就藍tick左
思穎: 我請你睇啦。
免費戲... 好似聽落唔錯wo。
結果我就答應左佢去睇戲，





間戲院喺我地學校附近既商場。
佢仲早過我到，而套戲仲有五分鐘先開場。
唯有喺度等下先。
我地揀左套愛情片黎睇，主要係思穎想睇。
咁既然係佢請既，睇咩都冇所謂啦。
老實講，愛情片黎黎去去都係個幾種。
睇到中間差少少就訓着左。
然後我望真啲，發現原來個個黎睇既都係啲情侶。
佢地都有個共通點。
就係睇睇下會開始嘴，然後套戲都未完就離開。




比起套戲，嗰班情侶仲刺激。
然後思穎好似都發現左，塊面仲有少少紅。
唔理佢啦。

「你係咪唔係幾鐘意岩岩個套戲?」睇完戲之後我地去左附近既餐廳食飯。
「都唔係啊。」我托住個頭講。
「咁... 點解你岩岩睇到差啲訓著左咁既?」佢問。
「只係愛情野不嬲都唔係好岩我啫。」我聳一聳肩。
「不如下次睇番套你鐘意既戲?」佢提意。
「唔洗啦。」始終今次係佢請我先會黎睇。
「唔洗擔心wo，都係我請。」佢單左一下眼。
哇，再白嫖多一套戲? 咁又唔軀啊。
「咁又好wo，我地幾時睇啊?」我雙眼發哂光。
「下個星期六?」佢做左個六字既手勢。
「唔得啊，我約左人。」我醒起約左夢兒姐姐。




「咁啊... 唯有再約啦。」佢有啲失望。
講真，比起免費戲，我更加想同夢兒姐姐睇。
之後我地啲野食黎左就專心食野，冇咩講野。
應該話係我冇咩點講野，思穎都係一直講佢啲野比我聽。

食完野我就話我有野做，其實只係想番屋企hea下。
估唔到睇戲啲時間過得咁快，返去嗰時已經成五點幾。
行下行下我冇行到返屋企，而係去左球場。
明明打唔到波，但都係想黎球場感受下個氣氛。
咁大個仔都未試過想打波但打唔到。
「喂希仔，你唔洗休息下咩。」偉哥見我黎左同我打招呼。
「冇啊，打唔到都想黎睇下你班友仔啊嘛。」我都向佢打返個招呼。
平時都唔發覺，原來呢班由我細細個就教我打波，陪我成長既大叔。
佢地都越黎越老啦。
由以前都仲幾後生，跑黎跑去，好有火既大叔。




變到成班都開始有哂白髮，跑多幾步都攰既大大叔。
不過有樣野冇變過既，就係佢地都係咁撚鐘意打波。
只要我黎親球場，都會見到佢地成班大叔喺度打波。

「喂希仔，黎打兩球啊，放心wo，我地唔會打得好hustle架。」偉哥指一指個場，叫我過去。
「唔啦，你睇下我，又牛仔褲又恤衫咁，點打啊。」佢指一指我個身既打扮。
「咁射兩球得啦掛，冇見你打波，我地成班阿叔都唔舒服。」佢扔左粒波比我。
喺三分線既我，個腦突然好似空白左咁，剩係諗返咁多年黎練既波。
座低，由下而上，壓腕，粒波喺空中畫出左完美既弧線。
一球，兩球，三球。
呢一刻既我剩係知，我真係好撚鐘意打籃球。
直到連續入左第十球，我先停左落黎。
發現周圍呢班阿叔都用一個好欣慰既笑容望住我。
佢地冇講咩野，但傳遞左一句說話比我。
「嗰個熟悉既周喻希，返黎啦。」