[少甜][愛情][校園][真人真事改編] 自從我爸爸過左世，我遇上左佢: 15

「希希，做咩咁夜返既?」夢兒姐姐坐左喺廳到，一見我開門就知我返。
「哦...呃...」突然醒起唔可以比夢兒姐姐知我同詠兒姐姐去街。
「嗯? 做咩吞吞吐吐既?」夢兒姐姐問。
「冇啊，我練完波同隊友去食飯啫。」我講左大話。
「原來係咁... 下次同我講聲啊嘛，我會擔心你架。」夢兒姐姐講完就起身行入房。
「夢兒姐姐!」我叫停左佢。
「嗯? 做咩?」唔知點解，夢兒姐姐今日比我既感覺好冷淡。
「不如... 一陣一齊做功課?」我提議。
「唔啦，我好攰，想自己做。」佢講完就入左房。
唉... 死啦，我點解好似激嬲左夢兒姐姐咁既... 




唔通佢發現左我同詠兒姐姐出街? 
定係佢真係只係好攰呢? 
唉，今次真係含得撚...
唔理啦，擺返啲野入房同去沖涼先。
之後我都係唔知點揾夢兒姐姐好，個人又好鬼攰。
喺張床到攤住諗，攤下攤下就訓著左。

「仆街啦屌!!!!!!!!!!!」我大叫左出黎。
仆你個臭街，點解已經八點既? 
我學校八點三個字就遲到，我屋企出發去學校至少半個鐘。




我屌啊，我個鬧鐘呢?? 同埋點解夢兒姐姐冇等埋我既?
我冇理咁多，用最快既速度，五分鐘就趕左出門。
返到學校已經成八點九個字... 今次真係仆哂街。
「周 ! 喻 ! 希 !」冇錯... 第一堂係Miss Lau既堂...
「你應該知道遲到我既堂，仲要遲咁多會有咩後果架啦 ~ 」佢扮一個好温柔既聲線，實際上係好可怕既語氣。
「呃... 知...既?」我都唔敢玩野。
「咁就好啦。同我即刻返埋位 !!!!!! lunch time留低抄燕詩抄十次一字不漏!!!!!! 抄唔哂放學留低抄!!!!!!!」
之後我就死死地氣返埋位。
唉，到底點解夢兒姐姐冇叫醒我架...
宜家真係含得撚... 十次? 今日餓死都得啦。





「搞唔掂wo，如果仲係哄唔返夢兒姐姐... 我之後既日子真係會慘過食屎。」小息既時候我自言自語。
「喂籃球小王子，有姐姐揾你啊。」
姐姐? 唔通係夢兒姐姐?!
我望一望向窗嗰邊，的確係姐姐。
係詠兒姐姐!
「希希!」詠兒姐姐喺窗邊一邊揮手一邊叫我。
我即刻出左去揾佢。
「你揾我有事?」我有啲好奇。
「係啊~不如我地今日lunch time 一齊食啊?」詠兒姐姐問。
「唉啊，我比Miss Lau罰我要抄燕詩十次啊。」我嘆左口氣。
「咁慘豬豬 ~ 咁不如我買番黎同你食?」詠兒姐姐提議。
「好啊! 我仲諗緊lunch 點算好，詠兒姐姐你真係好!」我有啲開心。
「咁lunch time canteen 等?」詠兒姐姐約實我。
「好! 唔該哂你啦詠兒姐姐。」我合十雙手多謝佢。




「bye bye!」佢講完就走左lu。

「周喻希!」佢一走我就聽到有人叫我。
「咩事?」原來係黃思穎。
「你中午咪比人罰既... 不如我買野食比你?」思穎問。
「唔洗啦，有人會買比我。」我講完就想返入去班房。
「下... 係咪你嗰個姐姐?」思穎問。
「你當係啦。」我一邊講一邊行返埋位。
佢都冇再追問落去。
好彩佢冇再問，佢再煩我我驚會屌鳩佢。
呃... 當然係鬧嗰種屌啦。

宜家最煩就係要點樣哄返夢兒姐姐。
講真，我發現咁大個人(12歲仔) 都真係冇哄過人。
咁多年黎都只有我發人脾氣，都冇試過比人發脾氣。




唉... 點算好啊。
我諗左幾堂，到lunch time 都仲係冇頭緒?
夢兒姐姐鐘意咩呢... 野食? 佢又唔係我。
唉... 真係好煩啊，不過為左夢兒姐姐，比少少心機都算係咁。
一邊諗一邊落去canteen。
詠兒姐姐買野食都要時間，所以我帶埋紙筆落去一路抄一路等。
過左十幾二十分鐘，詠兒姐姐終於都到，而我都抄多左三次。
詠兒姐姐買左兩碗牛腩面，佢一碗我一碗。
期間，我都同左佢講夢兒姐姐嬲左我，想佢比啲意見我。
「嗯... 我覺得你可以買個音樂盒，再寫張道歉卡。」詠兒姐姐提議。
「音樂盒? 點解既? 」我問。
「因為夢兒應該會鐘意音樂盒架，佢個心其實好少女。」詠兒姐姐講。
「哦... 就咁啦! 我放學一於去買個音樂盒比夢兒姐姐。」我決定左。
「咁不如我陪你去揀? 有我幫下眼，夢兒應該會鐘意既。」詠兒姐姐問。
「咁梗係好啦! 唔該哂你啦。」終於諗到方法。




食完野之後我地就各自番番去班房。