[少甜][愛情][校園][真人真事改編] 自從我爸爸過左世，我遇上左佢: 10

成個人跌左落地之後，我剩係感覺到隻腳比起尋日傷嗰時更痛。
我唔知岩岩嗰球有冇入到，我剩係知我隻腳要冇了。
「食屎狗!你打波咁撚污糟!」隊長一拳打左落對面中鋒塊面到。
周圍既觀眾都比佢呢個行為所震驚。
雙方既隊員都拉住佢地兩個，驚會搞大件事。
「拿，你地夠膽再做過激行為，我就肯定會送個T。」ref 提醒佢地。

而我? 繼續訓左喺地下到，我隻腳既痛楚唔容許我起身。
係咪玩完啦? 我努力左咁耐既籃球生涯，係咪就咁完結啦?
我呢一刻腳好痛，但心更加痛。




籃球，一直都係我生命中好重要既野。
喺我迷網既呢一刻，我感覺到再熟悉唔過既温暖。
係...夢兒姐姐? 
一雙手將我個頭抱入懷中，一滴...兩滴...接住一堆既眼淚落喺我既頭髮上。
「希希...唔會有事架，有我喺度，唔洗驚架。」好明顯，夢兒姐姐既聲音喺度震緊。
我都忍唔住，流下左男兒淚。

「讓開讓開。」st john 推住病床車黎接我。
「我會陪住你架。」夢兒姐姐放開左我，用我最愛既笑容安慰我。
「嗯。」我呢一刻既痛楚都比夢兒姐姐既甜蓋過哂。




上到病床之後，我合埋左雙眼休息一下。
好快就送到入去醫療室，有個專門負責傷病既老師幫我檢查隻腳。
最後佢話估計係冇傷到入面既骨，但詳情都要去到醫院先知。
佢地用輪椅送左我去醫院到做檢查，成程夢兒姐姐都跟埋去，睇得出佢真係好擔心。
檢查既報告出左黎，老實講個感覺仲緊張過成績表，好彩... 都只係扭傷。

「你好好彩，冇傷到骨同跟腱，只係扭傷下咁，但如果再有下次就唔敢保證冇事架啦。」醫生既答案令我如釋重負。
老實講，咁樣連續兩日都傷，真係好鬼好彩，大吉大利。
「真係好啊希希，你知唔知我真係驚左成晚啊...」夢兒姐姐攬住我，成個人都震哂咁講。
「哎啊你攬得太實啦，我就黎唞唔到氣要死啦。」我講笑咁講。




之後我就用嗰個拐杖同夢兒姐姐慢慢咁返屋企，好彩唔洗留院啫。
路途上，夢兒姐姐都冇咩點講野，好明顯佢真係好攰。
因為我呢種傷並唔係啲咩致命傷，所以我地都等左好耐。
我本來有諗住話唔洗咁麻煩，但夢兒姐姐堅持話一定要做檢查。
啊係wo，你問我地既媽媽們?
佢地仲喺公司到摶殺緊，只係send左幾條message，打左個電話關心下咁。
返到屋企已經成十點幾，夢兒姐姐本來話諗住整啲野食，但其實我地都唔係話好肚餓。
所以最後求其食左幾塊面包就算。
沖完涼傾左陣計就訓啦。
當然，佢訓佢房，我訓我房 ; (
今日都真係攰到搞唔撚掂...

第二日朝早，都仲係要返學既日子。
我地都係照常換衫食早餐出門口。
我地預早左少少時間，因為隻腳傷左既我要用拐杖返學。




「希希其實你真係可以放日假，喺屋企唞下架wo。」夢兒姐姐提議。
「唔洗啦，反正都唔會一日半日好得返。」冇錯，雖然只係扭傷，但都傷得幾重下。
至於點解我唔會想放假?其實只係留喺屋企都冇野做，倒不如返學見下班低能仔。
順便...問埋尋日社籃最後嗰球有冇入到