[少甜][愛情][校園][真人真事改編] 自從我爸爸過左世，我遇上左佢: 5

去到正式要上堂既第一日，我無諗過中學原來chur過小學咁多...
每一節都40分鐘，然後到4點鐘先放學... 相比起小學真係太難受啦。
加上各種唔同既科目，真係多到想嘔，諗起小學剩係得中英數常識
上到黎又有科學，地理，中史... 真係數都數唔哂。
* 希希係DSE 年代 2013年中一 *
中學既第一堂就係英文 本來英文就唔好既我都係選擇去訓教
「hey, stop sleeping, it's the first lesson of today blah blah blah」我完全冇諗住理佢
去到自我介紹既時候，我都係講左幾句，話說我英文名都係叫Hei。

「喂，其實你有冇啲咩興趣架。」




「其實英文miss都幾靚架。」
「你讀邊間小學架」
...
隔離條7頭真係好撚煩，可唔可以收聲。
「喂，不如我地一陣小息去打波咯，我籃球幾勁架。」
佢呢句令到我有左啲反應，我用鋒利既眼神盯左佢一眼。
佢冇驚，反而好似好興奮咁。
「嘻，你終於對我講既野有反應啦。睇黎你好鐘意打籃球。」
我都係冇理到佢，但一落堂既時候佢就拉左我落去籃球場。
其實喺學校我真係唔係幾想出手打波，紿終我唔係嗰啲想引人注目既人。




「黎啦，我地針ball先。」佢喺罰球線到，用一個唔錯既射姿射波。
但我眼睇黎出佢個力用大左，唔會入，而我當然唔會炒啦。
我喺三分線到做左個三脅勢，一步就過左佢輕鬆上籃。
下一球我突破之後急停跳投，又入左。小學既我已經打爆哂啲高中生，梓軒當然唔會係我對手。
呢一場單挑，佢連進攻既機會都冇就比我炒左。
「哇屌，點解你咁勁既。」佢輸左一啲都唔會唔開心。
我都係一句聲都冇出。而呢個時候有幾個高form行過黎想霸場，我就繼續射波。
「喂細路，走開啦，我地高form要打波。」幾個高我少少既喺度狗叫。
我無理到佢地，繼續射我既波。
「喂你係咪聾左啊，識唔識聽我講野啊。」我都係冇理佢。




「不如你地去隔離場打啊，佢地唔好惹架。」有個師姐行埋我度同我講。
我都係冇理佢。「你唔好咁多事啦，呢個細路我恰硬架啦。」佢睇落似想打我咁。
下一秒，佢衝埋黎想搶我個波，我一個背運就過左佢，我冇諗住上籃，而係挑釁佢，示意佢繼續偷。
我冇用身體擋，而係用各種既crossover 左拉右拉，運球運到佢仆下仆下。
我feel到周圍越黎越多人睇，但我唔想引到咁多人識我，於是過左佢之後上籃。
另一個高form想黎block我，我由右拉杆向左一個反手上籃。入完之後頭都唔回咁上番班房。
呢一幕大個諗番都覺得好中二病，但嗰時只係想快啲離開。

上到課室，個梓軒又黎煩鳩住我，又話咩好勁，又話咩個班人係籃球隊，又咩隊長咁
唉真係好煩，我都係想訓個教啫，嘈咩啊佢。
之後每一堂都係比啲老師鬧下，我又繼續訓，梓軒就繼續嘈。
好快就到左放學既時間，當我揹起個書包想返屋企嗰時，小息比我過爆既個班高form門口等緊我
「喂細路，幾好波wo，黎場單挑?。」佢個態度冇嗰時咁惡劣，不過都唔係太好咁。
「不了，我要返屋企。」我真係想返屋企多啲。「你係咪咁啊，我特登落黎揾你，你咁樣走?」佢喝我。
「我只係想平平無奇咁過日子啫，同你單挑一定好多人會過黎睇，所以唔好搞我。」講完我轉身就想走。




「你今日唔同我單挑，你唔洗旨意返屋企!」佢一路跟住我。
唉，真係好煩啊。
「ok，你要挑我同你挑，打三球。」我頂佢唔順，快快手完左佢算。
我地落到籃球場，啲人見到好似有花生食，即刻圍住哂。
好多唔同既聲音都出哂黎，有啲就驚我係比佢恰，有啲就怪個高form點解要咁樣對個細路。
而我就一啲都唔驚。
突然間有條女衝左出黎喺我面前。「你唔好恰周喻希啊，你一個高form恰佢算咩意思啊。」呢個女既我認得出佢。
佢係我地班好受歡迎既人黎，我地既班會主席。
係一個幾靚既女仔，而且好似好多朋友，成績都唔錯。
「喂妹妹仔，你唔好阻住我地打波啦。」個高form好不解，點解會有個女既出黎。
我完全冇頭緒佢搞咩，只見佢一手就拉住我想拉我走。
「你做咩拉住我...」我好無奈。「我救緊你啊。」佢望落好傻，應該話好善良。
我其實打唔打都冇咩所謂，反正呢場鬧劇就喺佢拉住我走既情況下結束左。
呢個女仔，應該係叫... 思穎。黃思穎。