因為炸雞店一次意外，我變成了超級英雄。: 第十九章 尋死

我分不清咩係真，咩係假。

掛係牆上面既鐘，時針不斷隨住時間流逝而推動。電視、馬寶琳依舊係同一個畫面。

係邊度開始出錯呢？我係幾時入左呢個迷幻既世界呢？周豈高打針既世界先係真？

但係呢個時候我突然醒起一件事，如果我既意識係冇左既，正常我應該係可以連結去炸雞之神所創造既世界先啱。所以如果我去聯繫唔到炸雞之神，咁姐係我根本冇喪失意識，亦即係我比周豈高打針既場景係虛構架。

但問題係，我依家身處既世界似乎都係虛構。因為佢可以隨時扭曲，令我重新返番泥呢個時間點，現實世界應該都係做唔到㗎。





咁到底真實世界係邊呢，我依家真嗰個肉身又係何處呢？

我諗到頭都要爆，但我內心同時都好恐懼。如果我成世都要被困係呢個世界呢？

當我諗到呢度身體都打左個冷震，係度拍拖，係度結婚，係度老死，但最後又返番泥呢個時間點，咁我就只有永遠既失去。

我諗返轉頭，我係幾時泥到呢個世界呢？

我重新整理思緒，由頭諗落尾。首先係馬寶琳搵我。跟住約左大家去意大利餐廳。隔離大廈發生火燭。我走上去幫手，發現紅魔。紅魔向我掟炸雞，我本能擋住。然後係危急關頭馬寶琳救左我。然後佢向我表露身份。帶我返泥。





諗到呢度我突然靈機一動，因為我發現左樣好唔合理既事。

由紅魔向我掟炸雞之後，事情開始變得唔合理。首先係馬寶琳出現既時機似乎太巧合。跟住最離奇係佢點解要向我表露身份？我表露身份係因為面具爛左，但如果佢擁有超乎常人既能力，點解會咁輕易將自己既身份表露出去呢？

而最唔合理既係，佢個樣真係完全變左，變到根本唔係佢泥。

喺個次爆炸之後，事情開始變得唔合理！

如果我既推論係正確既話，我既肉身應該仲係個嗰天台度！





但我可以點樣返去？我點樣先可以退出呢個永無止境既世界呢？

就係我諗緊呢個問題既時候，電視機既主播講到︰「涉事單位係百寧樓十五樓。消防發現單位內有兩具燒焦既屍體，初步指死者兩人為夫婦關係。而警方初步調查得出疑兇係兩死者既二十一歲兒子周豈高。」

唔？屍體？唔通…死亡就係解脫既唯一方法？

我從馬寶琳單位既窗口望落去，如果呢個就係出口，就只有呢個方法。

我吞左啖口水，握緊拳頭。或者成為英雄之前，首先就唔可以懼怕死亡。

我一躍而去，今次唔再係無底既深淵。離心力試圖將我既皮同肉分離，速度有增無減，地面既畫面越泥越大。仲有20米、10米…

嘭！