一覺瞓醒，你竟然同我講香港有喪屍？！: Zombie 30：跟蹤.

「警察？真定假？」家輝露出一副鄙視的眼神望向那名男人。
 
「咩真定假？」男人疑惑道。
 
「真警察？定假警察？」
 
「警察有假㗎咩！」男人突然高聲叫罵。
 
「有，我就係遇到，同你一樣拎碌嘢嚟嚇我。」家輝從背後拿出雙節棍。
 




「嗱！咪亂嚟呀，襲警好大罪㗎！」男人一步一步地向後退。
 
「……又一個假差佬。」家輝揮舞著雙節棍喃喃道。
 
「真！真差佬，我有工作證……嗱！嗱！嗱！我嘅工作證……」男人急忙從褲袋拿出證件。
 
「毛凌勇……散仔？」家輝檢查著手上的證件。
 
「我上個月先考到警察，之後過咗幾日就發生啲噉嘅事喇……」毛凌勇解釋。
 




「呢度有冇其他生還者？」
 
「有！有好多，大部分都係遊客，少量本地。」毛凌勇回應。
 
「有冇人變喪屍？」家輝把重點提出。
 
「喪屍？我都覺得似㗎喇，我一開始仲以為仲乜咁多痴線佬。」毛凌勇回想著。
 
「所以？講重點！」家輝加強語氣再問一次。
 




「死晒喇，我射死晒佢哋，射到冇子彈添。」毛凌勇比出射擊手勢。
 
「死晒？你肯定？」
 
「唔肯定，但連續幾日都冇再見到……到底而家你係差人定我係差人？係都係我盤你先啦，咁多嘢問。」毛凌勇不耐煩地說。
 
「咁如果嗰啲唔係喪屍嘅話，你即係濫權亂殺人啦！」家輝揶揄道。
 
「噉又唔係噉講，佢哋咬死咗幾個，我去阻止仲差啲俾佢哋圍添。」毛凌勇為自己辨駁。
 
待家輝弄清狀況後準備離去，但毛凌勇似乎很想跟上。
 
「妖！唔好煩我！」
 
「酒店就嚟冇嘢食喇，我出嚟就係為咗確定仲有冇喪屍。」毛凌勇解釋。




 
「哦，噉你加油喇！」家輝只隨便回應道。
 
「喂！你一個人？入嚟酒店一齊避啦！」毛凌勇見家輝一人便提議道。
 
為了其他人的安全，家輝並不想多收留一個外人，收留林仔已經是破例的一次了，更別說跟其他人一起生活，行動被限制是遲早的事。
 
「避？我唔會好似你噉，淨係識避，唔好再跟住我！」
 
「喂！唔係呢，多個人安全啲吖嘛！」毛凌勇死纏不休。
 
「再跟住我，我就殺咗你！」家輝的容忍度被煩得幾乎失去。
 
毛凌勇見家輝態度欠佳，便一把抓著他的肩膀
 




「好喇喎！我假假地都係警察，我有權……」
 
「點呀？有權打我？有權搶我啲嘢？我同你講！你已經係廢物！香港已經冇政府喇！你醒吓啦！靠你哋有咩用？嗰班怪物徒手就可以撕開你，你以為有槍就打得贏咩？收皮喇你！你哋打唔死佢哋㗎！」家輝將自己的無能發洩在這個倒楣鬼身上。
 
「……等等先，你見過班『新人類』？」毛凌勇瞪大雙眼問道。
 
「我阿哥俾其中一個捉咗，而我而家準備去救佢！」家輝一手甩開毛凌勇的手。
 
「你想死咩？你都話槍都打唔死，你又點救？」
 
「關你𨶙事！」語畢，家輝再次返回擺滿行李箱的店鋪。
 
毛凌勇見形勢不對便躲在遠處觀察，家輝把好幾個差不多大小的行李箱用繩綁緊固定住，將它們拉到升降機，運送到地下一層的TASTE超級市場，毛凌勇亦靜悄悄地緊隨其後。
 
「家輝哥，裡面咩嚟㗎？」阿昌剛好返回集合點，將手上的乾糧放到地上。




 
「吉喼，用嚟裝物資，你休息吓，呢度等我嚟，你順便去拎幾套衫。」家輝拍了一下阿昌的背微笑說道。
 
「你呢？唔換衫？」阿昌問。
 
「一陣先，我入完喼再去，你自己小心啲！」
 
不出一會，家輝已經將六個大行李箱裝滿，有吃的喝的，和一些日用品，更少不了裝了一堆成藥醫療用品等等。
 
林仔正如他說的一樣，醉倒在酒區的地上，家輝上前拿了好幾罐啤酒便返回集合處獨自喝起來。對於剛才的警員，家輝完全沒有把他放在心上，一心想要救出浩龍的他又怎會被一個弱雞打倒。
 
回想著浩龍先前交待過的事，當中一定有提及過一個匯合點，但任憑家輝一個人埋頭苦惱地想，也想不到任何線索，因為這方面他們根本就沒有討論過。
 
一個小時後，少女三人組回到超市內，帶著大包小包的衣物和護膚品，此時的家輝已經靠著牆壁熟睡了。
 




「返嚟嗱，呢兩個喼俾你哋裝嘢㗎。」一早便回到超市的阿昌邊說邊把自己的物品收到另一個行李箱中。
 
「輝輝飲醉咗？」洛雯輕聲問道。
 
「嗯！可能太攰呱。」阿昌回應。
 
由於家輝睡著了，四人盡量不發出太大的聲音收拾著「戰利品」。
 
眼尖的小鳳瞄到了阿昌的行李箱中一個掌上型遊戲機「喂，得一部咋？」
 
「……嗯，我諗住悶嗰時可以玩吓，如果唔得，噉我掉咗……」
 
「帶我去，拎多幾部一齊玩吖。」小鳳勾著阿昌的脖子笑道。
 
向洛雯和Mayu交待過後，兩人便開心地步出超市。小鳳其實並不擅長玩遊戲，但考慮到大家的壓力才提議出來的。在這個充滿混亂的時勢，人更應該去尋找快樂，能活多久都不知道了，何不快樂一點呢？
 
毛凌勇此時靜悄悄地跟在小鳳和阿昌的身後，彷彿在等待一個時機要做什麼似的。