我喺迪士尼識咗個女仔: 24

「起身喇起身喇…今朝要去Outlet啊」我搖醒仲喺夢鄉嘅嘉澄
「咩事啊…八點咋喎，俾我訓多陣啦」嘉澄一邊抵抗，一邊拉喊我上床

頂，啱啱set好個頭。我屈服了，最後九點叫佢起身，拖拖拉拉check out已經十點幾。

「點解要咁早啊…明明只係shopping day？」嘉澄咬住喺family mart買嘅蛋糕問我
「因為十點四十分去outlet嘅巴士就會開囉…本身諗住坐早一班九點五十㗎，唔知邊個…」
「得得得，我問題囉…依家慢少少就話我，哼！」

唉，啲女人真係好難服侍。





行去東京站八重洲口，就已經見到有指示牌話去「酒酒井outlet」嘅巴士，正正就係今日嘅目的地，亦都係今次奇妙之旅最後一站。一如既往，嘉澄係唔會放過任何一個可以訓覺嘅機會，尤其呢程車都要50分鐘…

「喂到喇…真係到喇」我叫醒嘉澄
「嗯…訓左幾耐啊？」
「差唔多一個鐘…今日係俾妳縱慾㗎，妳可以盡情購物直到七點鐘」
「真係～？」
「係啊，攞張info mark左target先啦…」

未等我講完，嘉澄已經九秒九衝左去攞info。





計我話，嘉澄嘅target係除左奢侈品牌外嘅所有鋪頭，連Nike都唔放過。

成個上午我都仲有陪嘉澄周圍行周圍睇，但中午過後真係搞唔掂，要買嗰啲都買晒，唔知點解嘉澄仲咁有動力。我索性坐喺Outlet中庭啲長凳等佢買完嘢就放低俾我繼續搏殺。

「哇好抵啊！Nike有三折～」啱啱放低上一間戰利品嘅嘉澄一路講一路拉住我入Nike
「妳鍾意呢啲outfit㗎咩？」平時見嘉澄連Hoodie都唔著多件，點會鍾意Nike啊
「我諗住買俾你㗎！你睇吓呢對～」

眼前係一對Nike嘅新鞋，仲要有Air。





「買俾我㗎？」不敢相信呢六日係咁出血嘅我竟然最後一日可以止血。
「係啊，情侶鞋！」
「咪住，呢對好似係女款喎…」我攞起對鞋端詳
「係啊！我俾你睇下個款得唔得然後就搵你個size囉」
「掂啦，女朋友話事！」
「咁你搵啦～」

即係錢就妳俾，功勞我出？咦唔係喎，第一句好重要，咁少少功勞無問題啦。

「係咪真係呢度㗎？搵極都搵唔到嘅？」我摷咗一陣都係搵唔到
「應該係㗎喇喎…唔通真係無貨？」
「吓…咁好sad喎」
「一係我試下問店員？」





其實係喎…點解我地唔問啲sales？

經過一輪交涉，人地喺倉就搵到對鞋啦…

「啱著！買啦，我俾錢～」唔通真係要女朋友俾錢咩
「唔得！講好左㗎嘛，我俾錢啦，無可能要男朋友俾晒錢㗎嘛」

說時遲那時快，嘉澄已經去左俾錢，攔都攔唔住。

「搞掂喇～好抵啊兩對鞋先六百幾港紙」嘉澄話
「咁破費啊，今晚請你食飯」
「使唔使請請聲咁啊，男女朋友咁計較」
「好好好，咁妳請」
「喂！！！死人雷諾曦！」





百無聊賴咁過左一個下午，散盡家財後，終於係時候返香港了。

「搞埋啲退稅就去機場喇」我同排緊隊嘅嘉澄講
「啊啊啊啊～唔想返香港囉，要返工喇」
「唔返工邊度有錢再去日本，邊度有錢養你啊？」
「邊個要你養我？」講完呢句，嘉澄一支箭咁飆左去前面
「喂等埋啊」

退好税，反正outlet同機場啲嘢食都係咁貴，所以我同嘉澄決定去左機場先食晚飯。

「你話我件行李會唔會超重吖？」上左shuttle後嘉澄問
「點會啊…都成20kg喇喎，我地加埋40kg仲有一個10kg嘅quota，即係50kg」
「其實…我頭先又買多左對鞋」嘉澄細細聲咁講
「都…應該夠嘅，唔使咁擔心」
「我係咪太大購物慾太任性喇？」哇呢啲送命問題，點答啊？




「唔係唔係，係因為我預唔夠行李托運額」

大家都知年輕人坐飛機真係無咩要求，尤其去日韓台，最緊要平，順理成章係坐廉航來回。去到機場check in嗰陣，因為樣樣都係錢，個地勤磅完又磅，最後我件行李18.8kg、嘉澄件行李19.7kg、外加嗰件9.8kg。

驚險，刺激。

「留意登機時間同閘口，唔該你」個地勤喺我地身上搵唔到錢就死死氣咁放我地走。

喺成田機場搵間餐廳食飯太難了，因為太多選擇，根本唔知食乜好。最後求其入左間有燒肉丼嘅鋪頭，叫做一圓燒肉癮。

食飽飽，再喺啲鋪頭度最後衝刺，就真係行入禁區，呢次六日五夜奇妙之旅真係完喇。我同嘉澄慢慢行去閘口，仲有成個鐘先起飛，所以我同嘉澄坐喺閘口隔離啲凳度執埋最後嘅戰利品。

「你睇下妳吖買咁多，返到去肯定變肥婆」我話
「咩啊，送俾我表姐㗎，呢個係俾阿龍嘅」
「係係係，妳最細心喇～」





執執下聽到機場廣播，因為香港天氣唔好而導致班機要延誤多兩個鐘…

「唉又要等…」原來嘉澄執好後就喺凳上面訓著左。都難怪嘅，我呢個男朋友其實從來都無諗過佢，要佢晨咁早出門口，佢都仲可以毫無怨言。

嘉澄就算訓著，手中仍然緊握停留喺IG出po嘅畫面。

「好開心啊，咁大個女第一次同男朋友去旅行😳
估唔到原來雷諾曦唔係freerider
呢六日帶我周圍去，最緊要係去晒Disney同Disney Sea🫣
唔知佢會唔會以為我因為太chur而成日訓覺呢？其實只不過係我本身太鍾意訓覺囉😒」

睇到呢度，我將我件外套冚喺嘉澄身上當被，然後默默咁幫佢save低草稿，最後熄返個mon。

我喺我album揀左我同嘉澄嘅Linabell Toni合照，想出po嗰陣一隻字都寫唔出。明明經歷咁多野，但係我形容唔到自己嘅心情，因為同嘉澄一齊我完全係做自己，連情緒都唔使理。

「#你的我的奇妙之旅」

我寫低呢句，直接po了。或者呢句就係最好嘅解釋，有嘉澄有我，呢場奇妙之旅先係奇妙之旅。

“This is the final call for Peach Aviation MM67 to Hong Kong.”

「醒喇，真係要返香港喇」我拍醒
「嗯…唉唔想返香港啊」
「下次再黎啦」

上機安頓好，我同嘉澄即刻去左搵周公，可能因為太攰，竟然一覺訓到降落。

「咳咳咳，返到香港啲空氣都混濁啲」嘉澄話
「我淨係知道好眼訓…」
「梗係啦，香港時間兩點幾喇，仲要等行李」

兩點幾，啲人都散得七七八八，所以行李都唔算等好耐，只係我同嘉澄因為share左個篋擺戰利品，所以要喺機場即時分贓。

「哇呢鋪難搞，原來我都買左唔少嘢…」我話
「成日話我買買買，你自己咪都係咁！」
「係喇係喇。我睇下先，呢對鞋妳嘅，呢個相機袋我嘅…」

執左半個鐘，終於塞晒啲嘢落袋，原來已經差唔多三點。

「我送你返屋企啦」我話，點都無理由要個女仔自己一個返去
「唔好！你拖住行李入沙頭角又出返去？咁你咪有排都返唔到屋企？」嘉澄話
「咁夜…送妳好啲喎」我拖住嘉澄話
「我知你想盡男朋友責任～但係我都唔想你咁辛苦囉。況且我都係搭的士返去，仲可以去到門口，你又要拖住行李喺禁區門口等的士掉頭」嘉澄一邊講一邊靠喺我胸膛，無論幾嘴硬都心軟啦。
「好好好，咁送妳上的士點都得喇掛？」

機場的士站嘅人潮喺深夜早就散晒，得零星職員同旅客。我拖住嘉澄由客運大樓慢慢行去的士站。

「喂…唔好拖咁緊得唔得啊？我唔會走㗎…」我自己都無發覺，原來自己越拖越實。
「啊… 唔好意思啊BB…」
「有人話返到香港叫我放心，話唔會唔要我。結果自己仲驚過我，嘻嘻～」
「我都好怕妳咁樣走左去嘛…」

咁真係吖嘛，咁靚女又有愛心，容乜易俾人搶走。

「好喇我上的士喇～遲啲見啦」嘉澄一路行去新界的士條隊一路話
「嗯嗯嗯，返屋企打電話俾我啊」我目送佢上的士

準備轉頭行返去市區的士條隊嗰陣…

「雷諾曦！」
「咩…」未等我講完，馬嘉澄一個箭步衝上黎攬住我。我諗唔止我，在場嘅職員、旅客、的士佬應該都嚇親。
「我愛你！」嘉澄講完之後，好快咁跳上的士。

望住嘉澄嘅綠色的士遠去，胸膛仍然留有嘉澄擁抱嘅餘溫，仲有頭先句「我愛你」，偶像劇嘅劇情竟然會發生喺我身上。

「師傅藍灣半島吖」
「收到～後生仔頭先勁喎，我跑開機場都未見過咁癡纏嘅」
「哈…哈哈哈，我都唔知啊」我唔知點答
「我後生嗰陣都成日搵女仔飲酒落club㗎，不過後來發現始終係陪你捱過低潮先值得我愛。唉，就講就到，唔好意思啊～」

司機戴起耳機，聽佢老婆打黎嘅電話。

「係喇係喇，做埋呢單買宵夜返黎俾妳。」
「叫左妳早啲訓又唔聽…」
「過幾日放假同妳去睇啦」

過左紅隧之後，司機終於收線。

「唔好意思啊先生，有無嘈到你休息？」
「無啊無啊，好恩愛喎你地」
「咁樣呃咗佢青春，唯有做個好男人啦」
「係啊…呃下呃下就一世」

三點半，終於到屋企。呢六日嘅疲憊都俾同嘉澄嘅相處點滴掩蓋晒，返到香港就表露無遺，行李都無執、涼都無沖直接就訓左。

第二日起身嗰陣已經係兩點幾，沖埋個涼開始執行李嗰陣，醒起個愛情御守仲喺袋，即刻掛出黎。窗外嘅微風成為御守嘅動力，或者標示我同嘉澄嘅奇妙之旅會繼續寫落去。

去完旅行真係好多嘢執…

執到五點幾終於執晒，可以坐低睇下劇，點知一開電視就見到交通意外現場直播。

「北角東區走廊發生嚴重交通意外，涉及一部巴士及私家車，現場消息至少二十人傷…」

五點幾發生交通意外，仲要係放工時間，希望傷者無事啦。

至少嗰一刻我係咁諗。

夜晚，阿爸阿媽去飲，嘉澄返到屋企訓到死豬咁。我喺屋企煮左個公仔麵食，一路睇劇一路頹廢不知幾爽。

「喂，邊位？」
「係咪黃曉盈家屬？」
「我…」
「東區醫院，黃曉盈啱啱交通意外傷勢比較嚴重，需要做手術，麻煩你地快啲黎處理手續」

一切，都來得太突然。