我喺迪士尼識咗個女仔: 23 (嘉澄自白2)

望住隔離熟睡嘅雷諾曦，我又諗起之前嘅相處時光，原來我同佢嘅相遇都真係好奇妙。

我教嗰間幼稚園去學校旅行，請左間攝影公司幫手全程跟住影。我呢啲小薯又點會有決策權吖，咪去到跟住人地指示囉。

其實攝影師點影都唔關我事啦，我只係想陪班小朋友玩啫。

午飯時間，我俾班同事夾左去個「飯局」，三個miss對三個攝影師。但係因為我陪學生玩耐左而遲入餐廳。

一入到去就見到其他同事同班攝影師好傾得埋，懷疑太耐無見過男人…尤其Jennifer，好似即刻想食左人地咁。





「唔好意思，頭先陪樂熹玩space mountain玩耐左。」我大聲咁講，順便睇清楚三個攝影師嘅樣貌

擰轉面嘅，正正就係雷諾曦。

「咦，原來你係今日攝影師。」我真係好驚喜
「有幾出奇？搵食係咁㗎啦。」佢都係咁串
「你個餐好似幾好味喎，等我試下先～」我直接夾起佢塊切好嘅牛扒，試下佢嘅反應係咪直男
「喂…」佢好無奈，但四對眼睛令我更加無奈

食完飯，我同雷諾曦諗住行去玩Space Mountain，玩完後離遠就聽到有人叫我。





「馬老師！！！！」我認得把聲，係樂芯樂熹
「咦！樂芯樂熹你地無同其他同學玩咩？」我踎低問
「唔好意思啊…呢兩個百厭仔死都話要搵馬老師玩，周圍跑周圍搵。」樂芯媽媽話
「哦～咁我地一齊玩啦，俾媽媽休息下好唔好？」
「好～」

結果我又回歸湊仔湊女行列，只係怕雷諾曦介意。

「點解今日王子哥哥又會喺度嘅？」樂芯問




「王子住喺城堡㗎，知道樂芯公主光臨咪出黎迎接妳，hehe」聽落幼稚嘅opening，俾雷諾曦輕鬆化解
「多謝你啊，王子哥哥，不過我想玩小熊維尼，可唔可以幫我問下小熊維尼喺唔喺屋企啊？」樂芯問
「小熊維尼今朝打俾我，佢話知道樂芯樂熹要探佢就全日唔出街等你地過去。」既然雷諾曦都入戲

玩完space mountain，我同諾曦帶左班細路去玩antman。今次我同樂芯一隊真係無晒顏面，俾諾曦同樂曦爆分完勝我地。跟住我地去左旋轉木馬，個人覺得最夢幻嘅遊戲。

「喂你睇住樂芯啊。」雷諾曦單手托住樂芯，睇到都覺得牙煙
「得啦，王子點會俾樂芯公主有事。」
「咁你抱埋樂熹上去喇。」

安頓好兩個細路，旋轉木馬終於啟動。

「幫妳影幾張喇，反正今日有pro機。」佢攞出相機
「咁就差唔多～」





「雷諾曦望鏡頭啦！」呢個木頭…仲係咁直男
「得啦，叫埋樂芯樂熹先！」四個人對準鏡頭微笑，影低一張「全家福」

樂芯樂熹家長大約五點幾就接走左佢地，而Jennifer佢地大概已經有下文，所以都無覆WhatsApp。

「越睇越似全家福。」佢話
「係咩？你咁講又好似係。」我嫣然一笑，難得有男仔肯陪我玩、體諒我嘅職業
「如果係真就唔好喇，生一個四百萬，兩個咪八百萬。」諾曦一句倒冷水破壞晒對未來嘅幻想
「呢幾年好似六百萬喇，都係玩人地仔女好。」我唯有咁講，但其實我不知幾鍾意小朋友…

雷諾曦同我去左睇迪士尼音樂劇，明明已經睇過好多次，我都仲可以睇到笑。

「保留一份童心係咪幼教必備㗎？」好多人問過呢個問題，但係多數係恥笑性質
「都唔一定嘅，但了解小朋友點諗就必須。」我話
「但係似乎妳自己唔係好了解自己點諗喎。」吓？咩意思先




「點解？啊！」原因就係我撞左埋燈柱

佢笑咗十五分鐘(￣Д￣)ﾉ

最後梗係要去睇煙花，雖然係平日但係靚位都無晒，但俾我見到有個攝影師拖住Jennifer喺靚位度一齊依偎喎。

「喲，富哥咁快得左嘅？」諾曦話
「哦，Jennifer恨出pool好耐喇，希望富哥對佢好啦。」
「富哥梗係好仔，不過睇Jennifer個樣佢都應該唔缺仔啊？」雷諾曦或者太過直男，咁靚女無仔擺明另有企圖啦
「佢想結婚啊…話30歲前最好生返個」
「有啲似緣路山旮旯個阿花。」虧佢笑得出…
「咪笑人啦，我咪都係咁諗，我都想有人寵我。」我話
「妳點睇都唔缺仔。」痴線，係咪直男黎㗎？
「係，好多男仔追我，不過追到手就嫌我保守喇，無得咩就即刻分手，又成日叫我去佢地屋企過夜。」
「大佬，妳住咁遠又無得送到門口梗係唔想送啦…」其實呢個都係一個主要原因，我好缺乏安全感…




「咁你又送？」我問，但係佢無言以對

死喇死喇，會唔會太進取呢？

「星夢光影匯演即將開始…」好彩個廣播救左我


「你仲未答我，點解要送我嘅？」一上地鐵我就問返頭先個問題
「得閒咪送咯。」明顯呢個係推卻嘅答案囉…
「認真答我！」我從來都未試過咁樣凝望一個男仔，就算之前嘅Ex都無試過。

唔知點解，我feel到自己心跳好快。

「以前我次次都有送ex返屋企嘛，始終女仔一個人夜媽媽唔係太好。」佢話
「你ex都係住山旮旯咩？」




「都唔算嘅…香港仔咯。」
「我出世到依家應該淨係去過南區2次咋…」
「妳都知道答案啦，所以我都係繼續送妳返屋企。」佢講完呢句，我真係好想睇下有無機會測試到佢，係咪真心想送我返去。
「如果係咁，不如食埋宵夜先啦。」

我同佢去左旺角篤魚蛋。

「妳唔驚俾啲家長見到咩？」
「十一點幾咁夜都見到抵我俾人投訴啦。」我話
「妳都幾貼地，啲人仲話幼教多數活喺童話世界入面。」吓？咁班家長一定係壞蛋角色。
「淨係收人工已經唔係童話啦…」

篤完魚蛋，佢又真係陪我坐東鐵返上水。

「今次真係送唔到妳入去，如果唔係我又要坐的士走㗎喇。」佢話
「得啦，你真係以為我三歲細路仔咩？」
「我驚妳路都唔識行咋，喺迪士尼撞燈柱嗰個唔知係邊個呢？」

我忍…死人雷諾曦。

我本身仲諗住同佢傾計了解下，點知敵不過周公。去到大埔係嗰陣我先發現點解訓得咁舒服，原來係佢借左半邊膊頭俾我訓。我索性扮到上水算喇，哈哈哈。

「喂到喇，唔好訓喇。」列車緩緩駛入上水站
「嗯…你送到我去呢度就得喇，快啲坐返對頭車出去啦。」我話
「妳訓到咁我點放心啊大佬，都唔知妳平時點返屋企…」佢攞左我件外套，一路行一路講。

頂，我好凍啊…

「我好少出夜街㗎！乖乖女。」我話
「得喇得喇，上車啦。」佢截左部的士

「師傅沙頭角，再返粉嶺站。」
「師傅臨入禁區俾我落，我喺度等你。」我get到佢咩意思了
「哦…」
「咁我走喇，妳返到屋企wts我。」
「得啦，細路仔咩…」

諾曦落左車後，我俾左大概double車費，同司機講到粉嶺站先同佢講唔使錢。你有心計，你估我無？

「今日你都辛苦喇( ^ω^ )幫班細路仔影相
又陪我玩左成個下午 仲要送我返屋企
請你坐返的士出去啦😼 早啲休息！」00:30
「收到妳🫡 等緊N車出去」佢影到自己等緊N車
00:35
「呢個角度好似我老豆啲自拍🤣」00:35
「唔係掛…妳早啲訓啦，好夜了😵‍💫」00:36
「咁你呢？😿」00:36
「仲有20分鐘就有車，兩點前應該返到屋企🥹」00:38

我抑制住自己興奮嘅內心，手震住打電話俾佢，點知唔夠幾秒佢已經聽左。

「點啊馬嘉澄，仲唔訓覺？」
「訓㗎喇，敷緊mask」
「咁chill，可憐我一個人等巴士過海」
「咁下次唔好送我囉，我又無要求過」其實，我都幾享受俾人送返屋企…成日睇啲同事有老公男朋友車出車入，話就話女性自強，但係我都好想可以一上車就安心訓到落車啊…
「咁又唔好，係我問題」
「當然」

我隻手已經震晒。死啦，佢係咪要做我保鑣啊？我喺床上面碌黎碌去，好耐無試過有呢種心跳悸動嘅感覺喇。係初戀啊，係初戀嘅感覺啊！

初戀還初戀，都係眼前嘅問題最麻煩——催婚。

「阿女啊你都唔細啦，不如唔好再咁獨立試下識男仔啦」阿媽話
「係囉係囉，有個男朋友可以送你返沙頭角都好過你夜晚一個女仔啦」連表姐都出聲

我期待緊理論上唔鍾意個女有男朋友嘅老豆幫手，結果…

「咪就係囉，妳再唔出…出嗰個乜鬼啊，總之就係脫單啦，妳就真係賣剩蔗喇。」連老豆都咁講，親生嗎？
「邊…邊個話我無㗎？佢怕醜咋嘛，所以咪唔夠膽黎」
「都唔知真定假，冬至做節帶埋黎啦」阿媽無啦啦爆左句
「好啊好啊，我個仔又有新朋友玩喇」表姐你個仆街…
「就咁話啦，冬至加多對筷子都無壞嘅。」

死啦…去邊度變個男朋友出黎啊？我淨係諗到一個人咋喎… 但係如果我去求佢扮我男朋友咪好樣衰？其實我唔想佢扮啊，我想佢真係啊。

「你依家都淨係可以問佢啫…」Jennifer話
「咁但係好難開口喎」
「咁咪唔好開口囉，霸王硬上弓」Catherine都插嘴
「吓？我唔係啲咁嘅人喎」
「信我啦，搵次約佢行街，跟住行完無啦啦拉佢去你屋企。騎虎難下，佢點都唔會落妳面嘅」Jennifer分析
「咪就係，加埋…我地個個都feel到你同佢有啲嘢喎～」Catherine不懷好意咁笑
「邊…邊度有啊，你地又亂講野啦」但係我好唔爭氣臉紅…

原來，嗰日仲有其他Miss想抄雷諾曦牌，不過佢地話Catherine犧牲識另一個攝影師嘅機會擋晒，係真唔係啊？

呢一刻，我真係好慶幸原來我同雷諾曦當時諗嘅嘢係一樣。未等我約出街，佢已經主動約左我出去。

「點啊，無啦啦咁好死請我食飯，又有咩要我幫？」就算係我有求於人，點都要俾個下馬威佢
「嗰啲嘢後話啦，妳有無乜想做㗎？今日全日我都得閒喎。」
「肯定有古怪，不過我恭敬不如從命。」

想約我就約我啦，「全日都得閒」，你唔留喺屋企煲劇？

食完lunch，雷諾曦俾我拉左去睇戲，又係卡通片。

「真係咁好笑咩？」佢問
「都幾㗎，你唔明㗎喇。」我話，的確好多男仔唔明，亦都唔想明，覺得煩，覺得太fantasy mind。

你以為睇完戲就返我屋企？非也。我拉左雷諾曦去一田買左兩大袋嘢，仲要有好多貴嘢。

「又燕窩又花菇，妳都啱㗎咩呢啲嘢？」佢又問
「咪八卦啦，再八卦叫你再買埋iPad。」既然做戲做全套，咁梗係佢俾住錢先啦。

又行左兩個鐘，望吓隻錶已經六點幾，係時候搵個理由帶雷諾曦返屋企。

「點啊小姐，今晚想食乜？」佢又助攻俾我
「我揀左地方喇，你跟我去就得。」我拉住佢行去的士站
「又水我去邊度啊…」雖然佢對我係好信任，但我始終怕呃唔到佢，又或者佢唔想。
「司機唔該新田圍邨。」

「撳鐘啦！」轉眼間我就帶左雷諾曦去我阿婆門口
「嚟緊喇～咦，你係？」我阿媽開門
「媽！佢係我男朋友阿曦啊。」我用手掙撞雷諾曦，希望佢明。

唔知雷諾曦呢刻點諗呢，俾我擺左一鑊。

「婆婆～睇下呢個男仔，佢係阿曦啊，我男朋友！佢仲專登買左啲補品俾妳啊」
「婆婆你好啊，我係阿曦，嘉澄男朋友，呢度係我小小心意。」雷諾曦都算醒目，識得遞上份禮物
「哎唷好啊好啊，我地澄澄終於有男朋友喇。」婆婆好開心咁講
「幫手開飯喇，食住講！」阿媽話

食飯嗰陣都係閒話家常咁啦。

「妳個衰女有男朋友都唔同我地講。」阿媽話
「一陣我有你地又會緊張大師上身㗎啦。」我無奈回答，一陣又話人地成個古惑仔咁，一陣又話個樣太木獨。
「阿曦食多啲啊，唔夠仲有飯。」婆婆不停夾菜俾雷諾曦，喂有明顯差別待遇喎…

成餐飯無見家長嘅緊張，反而似屋企人食飯。

「阿曦飲兩杯吖。」全程沉默嘅老豆終於出聲，hidden boss
「哦…好啊uncle」

我唯有俾個加油手勢。

「你鍾意我個女啲咩啊？」老豆使唔使咁痴線啊
「我鍾意佢…鍾意佢夠傻。佢可以為少少嘢笑一餐，又好有童真。至於佢個樣，咁就梗係靚啦。」

如果係真心讚，我一定會動心。掉返轉講，我根本分唔到佢係咪真心，我沉船了。

成個單位靜左5秒。老實講，我仲驚過雷諾曦。

「辛苦你喇。」無啦啦老豆爆左呢句
「吓？」
「我個女咁惡頂你都可以讚到天花龍鳳咁，我真係放心，你一定係真愛。唔好令我失望啊準女婿。」

老豆！！！！！

走嗰陣，阿爸阿媽叫我送諾曦去地鐵站。
「妳屋企人都幾可愛。」佢話
「都係㗎，我老豆有無嚇親你啊？」
「咁又無，不過妳婆婆封利是俾返妳啦，始終我又唔係真係妳男朋友。」

唔知點解，講完呢句氣氛開始有啲奇怪。

「係呢，你係咪有求於我㗎？」無事獻殷勤，可以有咩好事吖
「其實我想妳扮我女朋友，同妳情況一樣。」佢話
「考慮吓啦，如果你請我食飯都有得諗嘅。」
「咁鍾意食嘅妳…」話說好似今日佢先請完
「講下笑咋，俾個日期我，我睇下得唔得閒啦。」

兩個人行吓行吓，竟然行左去沙田市中心。

「我地唔係去緊地鐵站咩，點解過河…」我自言自語
「我點知妳，我跟住妳咋。」
「咁你上車啦，到屋企WhatsApp我。」
「嗯…我走喇。」今次終於係我送佢
「頭先你講嗰封利是…都係你keep住先啦」諾曦俾返婆婆俾佢封利是我
「唔好啦，唔係太好喎。」
「或者有一日你真係可以收到呢封利是呢…」呢一刻我都唔知自己講緊乜
「妳講乜啊，好啦咁我多謝妳婆婆喇，走喇。」

嗰陣我諗，其實要一個人承認自己嘅心意係咪真係咁難呢？