我喺迪士尼識咗個女仔: 16

回歸日常生活，又要返工了，個個都年初四咁嘅樣。

「恭喜發財～全部都無利是」肥波話
「富哥就快派㗎喇，等多陣啦」我話
「都係㗎…」富哥今次無屌柒我地
「吓？咩意思啊？」我同肥波問
「我同Jennifer可能呢兩年內就結婚喇…」
「吓，咁撚爆？！」我同肥波又一齊講
「屌你地啦使唔使咁啊？咁大家都呢個年紀，難得性格又夾。Jennifer係chur左少少但係我都慣啦」
「ching相見容易相處難喎。同居試婚穩陣啲喎，再唔係整個旅行都好吖」肥波話





肥波咁樣一講，我又醒起嘉澄講過想Term break出去旅行。

「啊，我地三月多唔多job啊？」我問
「難得曦哥咁問，睇下先…暫時就無乜囉。想清Annual啊？」
「無，無嘢啊…隨口問下啫」

上網搵左一次又一次，發現唔少地方機票都平，但問題係唔知道嘉澄鍾意邊度。

「你話依家啲女仔鍾意去邊度呢…」我問




「日韓台囉，你之前咪同你Ex去過日本…」肥波答
「梗係唔係啦，係歐洲啊。我仲記得嗰陣佢返香港叫我地幫佢執相嘅」富哥咁講又好似係…五年前我曾經同曉盈去過一次歐洲。

仲記得嗰陣係冬天，香港都凍凍地。窮情侶帶住一袋兩袋逼E車去機場，第一次同女朋友去旅行又緊張又期待。

「喂睇住啲行李啊」「攞齊證件未啊？」兩個大頭蝦一齊去旅行，難免會有甩漏。

「Shit，我唔記得帶嗰個啊…」
「咩嗰個啊？」我唔明
「我個頸枕啊…二十個鐘機點算啊」

「哦，少事啦，機場一定有得買」
「咁貴…算啦」

曉盈本身腰骨唔好，作為優秀男朋友邊有可能要佢受苦呢？

「妳真係唔買？我地去到土耳其仲要轉機喎」
「唔啦，太貴喇，機場成三百幾蚊個，出面都唔使二百」
「唉怕左妳，唔買就唔買啦」

結果起飛唔夠兩個鐘，曉盈已經腰骨痛。

「點啊…係咪痛啊？」
「少少啦，頸位有啲唔舒服」
「等我幫幫妳啦…」

我忽發奇想，用機上嘅毛毯同本身著嘅羽絨包住手臂，然後擺喺曉盈嘅頸位。

「咦…」半睡半醒嘅曉盈感覺到有個「頸枕」，轉頭一望原來係我隻手。
「繼續訓啦，我睇戲唔使用手」
「你真係好～BB豬」
「妳唔係話淨係叫我男朋友咋咩？」
「依家我表揚你，今次旅程破例批准自己可以咁樣叫你」曉盈用手指掂一掂我鼻尖，辛苦隔離嗰個乘客食狗糧了

唔知係咪愛情嘅滋潤，曉盈一訓就係幾個鐘。

「啊…我訓左幾耐啊？」
「五個鐘啊，就快降落喇」
「吓？咁你隻手咪…」
「無事，仲郁到啊」其實痹到傻。

到英國落左機，先知咩叫冰天雪地。

「哇～！係雪啊，真係雪啊！」曉盈話
「咁污糟妳都玩？睇住啲行李啊」我雖然口裡嫌棄，實際上都係攞起堆雪玩
「哇原來都幾凍，咳咳咳」
「抵吖，玩雪吖嘛。快啲去coffee shop整杯朱古力先啦」

「哇，香港快運三月淡季飛日本機票低至一百八十蚊咋喎」肥波話
「睇過～首爾都係二百蚊咋喎」
「真係㗎？send條link黎睇下」
「曦哥，同嘉澄去旅行？」
「算係啦，睇下啫」

咁樣一check，見到機票咁平，即刻問嘉澄意下如何。





「📷相片」11:24
「？」12:31
「平機票去日本喎🫡」12:33
「真係？🤩」12:34
「呃妳做乜😒」12:36

日本其實不失為一個好地方，又有景又有得購物，依家諗返起點解當時會同曉盈去歐洲呢？

「追尋珍貴流星嘅下落，自然要行萬里路」

夜晚，我又約左嘉澄食飯，今次終於係雲吞麵，順便傾吓旅行啲嘢。

「雲吞麵、艇仔粥、炸兩，哇你得唔得啊？」我對眼前呢個輕如鴻毛嘅女仔提出質疑
「輕鬆啦，沙頭角食物焚化爐你估流㗎？」嘉澄一臉滿足咁食住佢碗雲吞麵
「話說，旅行嗰度…」「你同我去吖嘛」





哎呀呢個死妹釘搶晒我啲對白。

「行程嗰度靠妳編排，我負責訂機票酒店嗰啲啦」
「放心啦，我其實識日文㗎」
「睇唔出喎，一啲㗎妹feel都無」
「食屎啦雷諾曦」

日文我淨係識やめでください同気持ち咋…

你以為中間呢段時間唔會咁順利？事實就係咁順利。嘉澄一手一腳plan好晒啲行程，我book好機票酒店，一切淨係需要等到出發嗰日。

由於係早機，真係接唔到嘉澄去機場。仆街，嘉澄話要八點幾機，住小西灣嘅我要坐頭班車去機場先搞得掂，本來已經早，加埋馬嘉澄係遲到慣犯，但估唔到今次嘉澄仲早到過我。

「攞齊證件未啊？」嘉澄問
「攞齊啦梗係，睇住啲行李啊」
「先生小姐多謝選乘香港快運，我地有啲當地一日遊套票優惠發售，當中最適合情侶嘅有箱根溫泉同川越和服體驗，可以考慮吓㗎」
「我兩個都想去喎…」嘉澄話
「浸溫泉喎？」
「有咩問題啊？可摸以要晒兩個㗎？」
「唔好啦，一個夠喇，咁耐無去旅行不如留返啲自由時間啦」我建議
「咁好啦，你都啱嘅。如果淨係買一個有無優惠㗎？」嘉澄問
「當然有啦，買一個有九折㗎」個職員講完就將套票啲details俾我，然後叫我地到當地去指定火車公司攞飛。

咁就好了，六日五夜嘉澄可以諗少日行程。

直到離境前一刻我都仲唔係好敢相信，我自己竟然會同馬嘉澄去旅行。

「係久違嘅旅行啊啊啊啊啊！就連機場個廁所我都去得痛快啲」嘉澄話
「又誇張…睇住時間啊，香港快運要坐無人列車㗎。」
「Shit…依家幾點啊？」
「七點九囉。」
「我地班機八點鐘。」

話口未完，又有一對男女好似食錯藥咁狂跑。

「幾多號閘口啊？」
「二百…零六」
「前面轉右去到尾」

終於氣喘吁吁嘅情況下，趕得上最後召集嘅尾班車。

「哇好險…」嘉澄話
「我地係咪太耐無坐飛機，失魂落魄咁」
「嗰個係你咋，我跑完都無喘氣，咳咳咳」

我忍唔住笑，眼前嘅嘉澄真係傻。

由於係平日，所以班機都唔full，我同嘉澄可以兩個人霸三個位。

「妳唔使補眠？落機我地就開始㗎喇喎」我問
「吓？我咁精神，返鄉下喎」
「妳唔訓就我訓喇，今朝成四點幾起身…」
「我今朝老豆車呢…」

我都無理佢，直接訓死了。

唔知訓左幾耐，發現點解會有個枕頭呢？廉航有毛墊都偷笑點會有枕頭？

好奇心令到我脫離夢鄉，原來又係嘉澄呢個傻妹，借左半個膊頭俾我訓，然後佢自己都靠住我身軀訓著左。

似曾相識呢…嘉澄訓得咁冧，我都費事打擾佢。結果維持呢個姿勢直到降落後嘉澄先醒。

「嗯…我訓左幾耐啊？」嘉澄終於醒
「我都唔知喎，反正已經到東京喇，同埋我地兩個件衫都濕左一沓」
「妖～訓著啫。我依家精神百倍啊，可以瘋狂玩喇」

日本真係一個充滿魔力嘅地方，同迪士尼一樣可以忘記煩囂。

「我地先去京成鐵路攞飛然後坐NEX出市區」
「我跟妳咋，我係佛系旅伴。」

日本嘅午餐無論喺邊度食都咁好味。我同嘉澄只不過random喺新宿食拉麵，都屌打香港百幾蚊碗嗰啲鋪頭。

「嗯～好好味啊，ご馳走様でした」
「湯都可以飲埋」
「好滿足啊～跟住去邊度啊？」
「唔係妳plan行程咩…？」
「嘿嘿…我plan完都唔知啲景點喺邊度」

嘉澄俾我睇佢所謂嘅「plan」，只係一堆景點list。

「妳個plan都幾豐富喎，連地址都無」我話
「見到邊度靚我就擺落去㗎喇」
「…好彩我plan左幾日行程啫」
「真係㗎，好叻啊BB豬」
「妖，嬲啊，又唔plan行程」
「依家嬲唔嬲先？」嘉澄跳起咀咗我一啖
「諗住用美色引誘我，睇下自己咩事先啦」

嘉澄狠狠咁瞪左我一眼，然後衝入新宿十字路口嘅人群中。好彩我隻手有拖住佢，如果唔係都唔知點搵返佢。

「唔係我拉住妳，妳都唔知去左邊」我話
「講到我真係唔識咁，你抽水就抽水啦」嘉澄話
「我呢啲叫拖手，唔係抽水。」話雖如此，嘉澄咪都係無放手

最後都係要靠我… 同嘉澄去咗澀谷Shibuya Sky睇風景，因為食完飯新宿行一陣已經差唔多日落。

「哇呢度睇晒成個東京啊…好靚啊」
「哼，就有人唔plan行程搞到我心情唔多靚囉…」
「哎呀唔好嬲啦最多俾你今晚…」今晚做乜今晚做乜
「俾你今晚攬住我訓喇」
「咁樣啊…」「仲唔俾我周到你個咸濕仔？」

越近黃昏呢度就越大風，眼見唔少女士著裙上黎搞到應接不暇，好彩嘉澄今日著褲。

「呢度有靚位啊，快啲過黎影相啦」嘉澄叫我
「點睇都係我揸機會靚啲」的確係咁，嘉澄塊面先會顯細
「梗係啦，你係我御用攝影師喎」
「三二一笑～」

就係咁，第一次同嘉澄去旅行嘅合照就誕生了。

夜晚，由於budget要留返購物同去秘密景點迪士尼，所以唯有食宇奈とと嘅鰻魚飯。

「說好的壽喜燒同Omakase呢？」嘉澄問
「妳都無plan，又點會說好的呢？」
「去日本點可以唔食嗰啲啊～」嘉澄扁住嘴食眼前嘅鰻魚飯
「咁鰻魚飯好唔好味先？」我問，因為其實真係幾好食
「同你食，食屎都好食㗎啦唉。我唔理啊，無Omakase就去Family Mart放題」

結果食完飯，我地真係去左Family Mart，兩個人買左$300港幣…

「芝士蛋糕、雪條、小丸子、雞蛋布丁，使唔使咁多啊？」我問
「唔係點敲詐你一筆啊？快啲返酒店啦，溶㗎喇啲嘢」

講返酒店，話說東京嘅酒店出名細，呢間不例外㗎，張雙人床真係唔使嘉澄俾都要攬先夠訓。說時遲那時快，嘉澄已經喺成間房最阻埞嘅茶几開餐。

「妳有無邊度想去㗎？」我趁嘉澄食嘢，編排跟住幾日嘅行程。
「無啊，不過要留返啲時間俾我血拼」嘉澄掛住食嘢同執相，完全無視我
「咁我求其編㗎喇…」

其實我都唔知嘉澄想去邊度，但係第五日已經有一日遊套票，第六日一定留黎去outlet，所以得第三四日可以發揮吓。不過一早book左第三四日去迪士尼，哇咁得返聽日咋喎。

仆街，我自己都覺得好chur…但係我怕好難再有呢次機會。

「食完沖涼訓覺啦，聽日行程豐富㗎」我話
「得啦，我做老師㗎會起唔到身？」
「係係係你最勁…」

等到嘉澄沖完涼，梗係到我沖涼啦。男仔沖涼可以有幾耐吖，等到我出黎嘉澄仲做緊護膚。

「哇妳唔吹頭髮好容易病㗎喎」我話
「懶吖嘛…」嘉澄若有所思咁望住我講
「妳係懶定想搵人代勞咋？」

我攞起風筒，慢慢咁順住嘉澄柔滑嘅髮絲用手梳理。

「有人話，一個男仔肯放低其他嘢幫女仔吹頭，佢一定嫁得過。」嘉澄話
「妳又喺邊度聽埋啲少女語錄返黎…」
「咩啊，真㗎！你唔想幫我吹頭咩？」嘉澄問
「我肯啊，但呢樣嘢對我而言好基本咋喎。」
「口甜舌滑，唔理你訓覺喇」
「係咪可以攬住訓先～？」

嘉澄無答我，只係打側身訓低左。

即係掂啦，Wohooo～，今晚注定好眠。