我喺迪士尼識咗個女仔: 17

第二日朝早未夠八點，我已經俾嘉澄摷咗起身。

「使唔使咁早啊…」我問
「爭取時間啊～今日去邊度㗎？」
「今日上午應該去淺草，然後我都未諗…可能去台場」
「咁仲唔行？去樓下Family Mart食個早餐先啦」

日本便利店嘅早餐真係好吸引，不過嘉澄仲吸引。

「朝早食忌廉蛋糕，小心肚痛喎」




「死人雷諾曦又咒我！」
「喂痛痛痛…」

由於真係太早，淺草啲鋪頭都未開門，所以我地決定去酒店附近嘅上野恩賜公園，適逢櫻花季，呢個偶然竟然成為呢個旅程嘅亮點。

「哇！呢度啲櫻花真係好靚啊…」單純用靚真係形容唔晒呢度。平日嘅朝早無乜遊人，花瓣跌落喺我地頭上，春天嘅氣息悄然降臨。

我幫嘉澄影左幾張相，只能夠講喺粉紅氛圍下，原圖直出完全無問題。

「啲相執都唔使執啊，自然景加自然美，睇落去好舒服！」我話




「咁我呢？」
「你咪自然美囉…」

嘉澄舉起電話，我已經心領神會，即係叫我自拍啦。

行完恩賜公園已經十點幾，差唔多時間去淺草。

「你又知我頭先想叫你selfie喎～」嘉澄問
「喂，同妳一齊大大話話都幾個月，點都記得妳啲習慣啦～」
「係？咁你呢，有咩習慣先？」




「我？」

習慣記起黃曉盈？

「習慣記得妳嘅嘢囉～鍾意食雲吞麵嗰個」
「口甜舌滑～都唔知係咪咁樣周圍呃女仔」
「妳知我唔會㗎…」

對唔住，我呃咗妳。

淺草最iconic都係個雷門，但對於風景派嘅我同嘉澄而言純粹係到此一遊。

「其實都無乜特別…」嘉澄話
「我都覺…」
「咁你又plan去呢度？」嘉澄忍唔住笑，我都忍唔住笑




「因為要食嘢囉，壽喜燒啊」
「真係？我好想食啊，香港嗰啲又貴又唔正宗」
「前面咪係囉，沙頭角焚化爐…」

跟住tabelog同各blogger推薦，我帶左嘉澄去米久本店。

「呢間嘢好唔好食㗎…」嘉澄問
「應該掂㗎，好多人介紹黎呢度，況且性價比都好高」
「價錢邊係問題呢？最緊要我地食得開心嘛」

一講起呢句，我又會諗起黃曉盈….

記得同嘉澄去英國嗰陣，窮遊令我地budget有限，所以盡可能住行用少啲錢，食多啲感受多啲風土人情。但係曉盈並唔係咁樣諗，佢覺得連食都可以慳埋….

「餐餐Five Guys真係好咩？」我問

「咁先可以用多啲錢參觀其他地方嘛，況且five guys都好好食吖」
「好食係好食～咁搞法十幾日後我地返香港真係要做gym㗎喇」
「我食極唔肥㗎，你就真係要減肥喇」

嗰十幾日，唯一一次破費係我同佢紀念日full dress date夜晚食西餐，畢生難忘。

「呢度啲嘢…會唔會好貴㗎？」曉盈問
「噓…今晚唔好講價錢，好好享受呢度！」

我從來未食過咁好食嘅牛扒，因為有佢喺度。

「喂，叫邊個餐啊？喂？」
「啊係，呢個¥4000啦」
「好抵啊…」
「都話我無介紹錯㗎啦，信曦哥得永生」




「呢幾日我一定當你係神㗎，但係返到香港就未必了…」嘉澄不懷好意咁講
「不敢當不敢當，妳識日文喎」

食飽之後，嘉澄已經忍唔住想買嘢，所以臨時改行程返新宿行boutique。

「買咁多仲唔夠？」左右手各三袋，背囊仲有一袋各我問
「難得去旅行唔使睇錢喎，梗係洗到盡啦～」
「唉怕左妳，慢慢睇啦」

我陪嘉澄喺新宿行左成個下午，其實係差不多要去台場了。

「都四點幾喇…行夠未啊？」我問
「我都差唔多喇，不過你…」
「唔緊要啦，我都無乜購物慾嘅…」
「Map Camera，唔知啱唔啱呢？」




「妳又知我想去？」
「雷諾曦先生，麻煩你仔細睇下我嘅行程，其實係有呢個名㗎！」

我攞返張霉過梅菜嘅「行程」出黎，原來真係有Map Camera。

「放心行啦，唔會催你喎」
「妳真係…好好」唔知點解，莫名催淚
「少少嘢咋喎，咁都要喊？」
「邊度有喊…」

我喊係因為買相機跌左¥80000咋…

行完街，終於踏上前往台場嘅旅程。
「其實台場係咪高達嗰度啊？」
「無錯，其實嗰度係一堆喺海旁嘅商場咁，我覺得好似香港某個區但係又諗唔起係邊度」
「成日都係咁㗎啦，見到一啲地方都會諗起其他人，但係你永遠諗唔起佢地係邊個。」
「佢地係過客？」我問
「nonono，佢一定同你經歷過好深刻嘅嘢，不過你可能會唔記得佢叫咩名。」

「就算時間飛逝得幾快，每個出現喺我地人生入面嘅人，都一定有佢嘅意義。」

到左台場，已經差唔多日落，所以我同嘉澄先去御台場海濱公園先。

「哇已經咁多人等日落」嘉澄問
「講到好似得我知呢度有日落睇咁，呢度好出名㗎」
「我未睇過嘛，不過真係好有feel啊」

兩個人可以靜落黎睇日落真係奇蹟。

睇完日落，梗係行商場同食飯啦。台場真係好多商場同合家歡玩意，有Lego樂園又有水族館，最緊要係Teamlab。

「入去啦，日本必去嘅Teamlab啊」
「唔使提早預約咩？」
「我一早預約左啦，靠妳就大鑊啦」
「都話你最可靠㗎啦BB豬～」
「終於知道我重要喇咩？」

Teamlab玩嘅其實都係打卡同體驗，非常適合情侶去。

「想講再咁影我張SD卡會爆…」因為到日本兩日已經幾百張相。
「知唔知點解？因為我靚爆鏡吖嘛」
「…」

真係好好笑喎。

「你del返之前啲相咪得囉」嘉澄話
「我返酒店搞啦，依家係咪繼續行街先？」
「好啊，買到破產」

玩完Teamlab其實已經八點幾，不過嘉澄話想去隔離個藝術光雕水族館。台場個藝術光雕水族館其實幾靚，尤其遊客可以畫佢地心目中嘅海洋生物project去魚缸嘅投影度。不過今次時間緊迫淨係可以走馬看花，但係呢個設計嘉澄勁buy，仲話返香港要喺幼稚園搞返個。

玩完水族館，我地都肚餓了，所以去左食晚飯。

「有時我地俾人地定義左一樣嘢囉，就好似我地頭先畫畫咁，點解八爪魚唔可以五隻爪呢？點解我地唔可以自己俾個新定義呢？」嘉澄問
「因為我地懦弱，唔想突破舒適圈？」
「唔係呢…因為好難得同人地有一樣嘅定義，所以當我地有嘅時候就唔想再定義」

對我、馬嘉澄、黃曉盈而言，愛情嘅定義又係咪一樣？

「日本真係任何一間餐廳都咁好食㗎」我認同嘉澄呢番話
「咁肚餓乜都好食㗎啦，淨係今日我都瘦唔少」
「攞幾袋又話重…你係虧佬咩？」
「俾妳搞到虧晒」

食完飯已經差唔多十點，要知道台場呢頭無市區咁旺，相等於放大版嘅東涌，所以係差唔多返酒店。

坐地鐵返去嗰陣，嘉澄已經攰到喺我膊頭留低一灘口水，但係我因為要帶路所以無得訓。身在異鄉，即使入春仍然有一絲寒意，但係嘉澄熟睡嘅模樣暖透我嘅心扉。

或者上天都估唔到，五年情斷嘅挫敗，喺迪士尼嘅穿針引線下帶左另一段星夢光影之旅俾我。我唔夠膽講我自己係情聖，因為我唔可能一直記住黃曉盈，但同時我仲未可以百分百愛馬嘉澄。未係百分百，但已經係九十九。

返到酒店，兩個人除左梳洗乜都無做(真係無啊屌🫠)，直接訓覺。