我喺迪士尼識咗個女仔: 14

就係要面對咁多選擇。眼前係陪我走過青春嘅女仔，腦海內係陪我走出低谷嘅女仔，兩個都咁重要。

呢一刻，我同小食車個細路原來只係一樣。

「我唔知我嘅選擇啱唔啱…」「咁就唔好揀，等我帶你搵正確嘅選擇，好唔好？」

煙花升起，曉盈眼眸倒影同當年一樣都係咁靚，只係年歲過去，帶多咗一份憂鬱。

“Cuz you’ll be in my heart, no matter what they say”





曉盈喺我心目中真係唔會被忘記，但其實係咪時候要向前走？

「哇～呢個煙花真係好好睇，睇極都唔厭」
「有無咁誇張啊？不過啲projection又真係唔錯嘅。咦，難得農曆新年嚟不如去啲舖頭度買新年限定啦」
「唔使啦，又亂洗錢啦。你唔記得咩？迪士尼乜都好童話…」
「我地都係童話，得價錢牌唔係童話吖嘛。難得新年咁開心，我買俾妳啦」
「吓…咁好啦」

唔知係咪語氣嘅問題，我覺得同曉盈好陌生。情侶之間又點會講得咁見外，買咪直接買或者俾驚喜對方。啊，我差啲唔記得，我同佢都唔係情侶…





「哇！呢隻Linabell好得意啊～」
「買啦，男朋友話俾錢喎，係咪應該攞個購物籃先？」
「嘻嘻，依家攞依家攞，錫晒你啊BB豬」
「嗯，去攞啦」

就喺等曉盈攞購物籃嗰陣，有人拍我膊頭，原來係強哥。

「嚇死咩…」
「唔係做虧心事又點會驚呢？唔使呃喇，拖住你嗰個係黃曉盈吖嘛，跟左你地好耐啦」
「咁你都見到啦，我可以講乜」




「你果然貫徹我講嘅你沉我沉大家沉」強哥話
「喂！」強嫂即刻扭強哥耳仔
「但係你都要諗清楚，你自己嘅選擇」

呢個時候，曉盈攞完購物籃返嚟。

「咦，邊個嚟㗎？強哥強嫂？好耐無見喇」
「Hi~同阿曦拍拖啊？」
「係…係啊」曉盈明顯有少少怕醜
「咁咪好囉，唔阻你地二人世界喇」強哥意味深長咁拍兩拍我膊頭

強氏夫婦走後，我同曉盈繼續購物樂。我低估女人嘅購物慾，可能係同我拍拖嗰陣壓抑得太多。

「哇～未見過妳買咁多嘢」我一路攞住曉盈嘅戰利品一路講
「難得你俾錢喎～好難唔幫你出血」




「妳以前啲持家有道呢？」

曉盈無答我，繼續同我肩並肩行去迪士尼站。

「Sorry啊…無啦啦問埋啲咁嘅嘢」
「我無嘢喎，大家都未放低啫，係咪？」
「我…」「其實我試過㗎，我試過淨係諗我同你之間嘅壞回憶，但係我發現，同你一齊嘅壞回憶原來喺我心入面都係開心嘅…」

「我真係忘記唔到你啊，雷諾曦」

我企喺迎樂路，冒住吹來諷刺我嘅寒風，面對眼前呢個我曾經深愛過，我呢一刻忘記唔到嘅女仔。我好似好多嘢想講，想講我地分手前一年我過得何其辛苦，但係當面對佢嘅時候，我竟然一個埋怨嘅詞語都講唔出。

「其實我都係。」
「不過我地之間真係仲有可能咩？」
「nothing is impossible, but nothing is everlasting」





曉盈撲入我懷抱，我感受到我個膊頭濕咗。

「你以為流星一閃即逝，其實佢一直都喺一個你睇唔到嘅地方睇住你㗎」

「我知道…我真係知道」

今晚，無百年一遇嘅流星，只有璀璨非凡、一閃即逝嘅煙花。

我同曉盈喊過笑過，高山低谷都走過，煙花由Disney in the Stars睇到今日嘅Momentous。就係因為經歷咁多，佢一定係我珍而重之嘅人，放手先顯得困難。

我內心驅使我拖住曉盈行去迪士尼海濱長廊平靜下自己。兩個人坐喺海邊嘅石躉，就靜靜咁挨住對方，感受海風同周圍嘅寂靜。

「一日未上地鐵，我地都算喺迪士尼入面？」
「傻妹，梗係啦，未到屋企都算喺迪士尼」





我地由第一次去迪士尼玩邊個game講到火箭餐廳乜嘢最好食，再講到兩週年紀念原本話去迪士尼酒店。

「小姐，聽聞嗰陣係妳話貴先唔去咋喎」
「咁…女人不嬲都口是心非㗎啦」
「咁下次去住…囉」我意識到我地呢個關係一齊住酒店唔恰當

「如果有下次…」「一定會有。」曉盈搶答

「我就係犯賤就係放唔低雷諾曦你個仆街啊！一轉個頭就走去識其他女仔，依家好鍾意詐傻扮懵嘅女仔咩？鍾意日系打扮？」
「唔係…」
「唔使唔係喇。雷諾曦，係你逼我人生唯一一次搶人男朋友㗎！馬嘉澄吖嘛，佢有嘅嘢我都有，佢做到嘅嘢我都做到，但係佢擁有嘅嘢，就只有我一個可以擁有！」

曉盈講完一大輪打咗我一下，躺著也中槍。





我同曉盈坐到尾班車開先走，呢個時間只有我地兩個走，十二點幾喎。

「你有無聽過beauty and the beast首歌啊？」曉盈問
「Theme嗰個？」
「Nonono，How Does a Moment Last Forever啊」
「哦…無喎」

曉盈塞左個耳機入我耳仔。

“How does a moment last forever?
How can a story never die?
It is love we must hold onto
Never easy, but we try
Sometimes our happiness is captured
Somehow, our time and place stand still
Love lives on inside our hearts and always will”

望住聽聽下訓著左嘅曉盈，究竟點先可以將剎那變永恆…

呢一刻，我淨係知道，”Love lives on inside our hearts and always will”

凌晨一點幾，我終於送到曉盈返屋企，一日約會落幕。

「好喇，要放手喇，到屋企喇」
「可摸以拖多陣…我好驚失去你」

我同曉盈喺香港仔海傍漫步。我感覺到佢隻手捉得我越嚟越緊。

「喂…捉到我手痛喇」我無奈咁講
「你唔走我咪唔捉緊你囉，哼！」
「我都走唔甩㗎啦，因為我就住喺妳心入面。」
「口甜舌滑啦你，不過真係要走喇」
「再璀璨嘅煙花都有落幕嘅一刻，返屋企啦，唔好要auntie擔心」

曉盈一步步行向大廈，我不由自主咁跟佢向前行。就喺我停低嗰陣，曉盈一個轉身又撲入我度，眼都紅晒。

「做乜喊啊傻妹…」我撫摸佢柔順嘅髮絲問
「我真係好驚好驚…失去你啊雷諾曦。我唔可以咁自私喺分岔路拉返你入嚟，不過我每分每刻都會諗起你。食個外賣我都會記得你乾炒牛河要落豆瓣醬、去超市買嘢我都會記得你講過邊款廁紙最好用，就算係好細微好細微嘅嘢，我都會諗起你啊雷諾曦…」

眼前呢個傻妹提出分手，又放唔低我，畢竟五年感情唔係一時三刻可以放低嘅。

「我地大家都要試下放低對方…」「唔得！」
「吓？」我不解咁問
「正正放低緊又放低唔到，我更加要拎返起！」

我感受到一股火藥味上緊嚟。

「雷諾曦，我正式通知你，同埋你緋聞女友馬嘉澄，我黃曉盈，依家開始會重新追返你！」
「…」我一時俾唔到反應，曉盈已經衝左入樓。

我準備掉頭走，曉盈又凸個頭出黎。

「記得啊，我一定會溝返你㗎！」
「好好好！」

雖然有火藥味，但起碼見到佢開心返，相信佢都係一時激動先咁講啫。

我希望係咁啦…


第二日，年初三，赤口不宜拜年，可以做乜？打牌。
晨早流流嘉澄就WhatsApp我同強哥話佢車我地入沙頭角玩返日，阿龍同Jasmine因為去旅行所以無join。住九龍嘅強氏夫婦已經期待左好耐，梗係即刻話好，恭敬等嘉澄接佢地。

「你搞唔搞得掂㗎🫠」10:05
「📷照片」10:20

見到強氏夫婦已經上左車我都放心啲，強哥識揸車起碼可以幫幫手。

終於半個鐘後我喺小西灣見到嘉澄部車，明明強哥住土瓜灣咋喎…

「安全駕駛啊」強哥話
「咩啊，嘉澄謹慎咋，你估你橫衝直撞咩？」強嫂話
「強嫂有道理！不過去沙頭角呢程都係我揸啦」
「護花喇，閃盲喇」強哥話
「咁都合理吖，嘉澄沙頭角出嚟咁遠接我地」

嘉澄部車性能無問題，油門都易踩，難以理解嘅我用左半個鐘就入到大埔。

「哇哇哇好危險喎慢線超車」嘉澄一臉惶恐緊握扶手
「Hey~ 吐露港用快線先最危險啊」我話
「Bro you’re experienced!」強哥和議，呢樣嘢大概駕駛者一定明

結果40分鐘多啲就到左沙頭角。。。

嘉澄去警署搞埋禁區紙啲安排，然後三個城市人終於第一次踏足呢片神奇過迪士尼嘅土地。

「哇嘉澄妳屋企環境真係唔錯喎，鳥語花香」強嫂話
「住得咁舒服，代價咪就係唔方便囉」嘉澄講完就打開麻雀檯

無錯，呢班人聚埋一齊得打牌唯一一個人選擇。

「碰啊，話說雷諾曦你尋日去左邊度啊？」嘉澄問
「我？尋日…尋日咪」
「欸～尋日呢個死仔去左佢三叔公度拜年，十幾年無返香港嗰個吖嘛」強哥幫我答，兄弟在心中
「咁你都知？」
「我細個去阿曦屋企見過，佢封利是得十蚊，好孤寒㗎」
「係啊…我都咁大個啦，佢今年都係俾二十」
「未夠初十拆利是？有無搞錯啊！」嘉澄話

見嘉澄無再深究，我向強哥投以感恩嘅眼神。

夜晚，四個人喺屋出面嘅花園燒烤。

「好耐無試過咁樣燒烤喇，住得耐市區真係人都鬱悶啲」強嫂話
「有言外之音喎～識做啦」我對住強哥講
「收到你，以後每個星期去燒烤」
「哎呀咪打情罵俏啦，雞翼就快燶喇」

四個人喺大樹蔭下面，十足十TBB燒烤大團圓結局咁。

燒完烤，兩個女人傾化妝品，兩條仔梗係啤啤佢。

「喂，頭先幫你打晒掩護，係咪應該有啲回報先？」
「得，下次大排檔我嘅」
「講笑啫，你好似難搞啲喎」
「有咩難搞啊？」
「馬嘉澄，黃曉盈，二選一」
「唉，一係就毒撚開，一係就桃花運氾濫。上天真係唔想我好」
「上天想你選擇。」
「點揀啊，一個傻妹，一個有拍拖feel，俾著你都揀唔到啦」
「閘撚住，我唔會揀其他人，樂欣係我唯一選擇，零心動，零猶豫，ok？」不得不說，強哥真係好愛強嫂
「得喇唉，飲啦屌」

望住眼前一片萬里無雲嘅月夜，再望下喺花園同強嫂玩到開懷大笑嘅嘉澄，就算愛情入面選擇有幾重要，呢一刻所有嘢好似一幅靚畫咁，啱啱好。

活在當下，做一次渣男，都唔算太離譜吧？