我喺迪士尼識咗個女仔: 13

坐地鐵跨過大海後，銅鑼灣街頭人流唔算多，而且好多舖頭都無開門。

「我唔肯定我地山長水遠過海有著數」我話
「依家係我要求，你無得say no」

唔係講笑，餐廳好多都無開，開得就係酒樓同快餐店。

「戲就睇咗，新年流流邊個買嘢吖，得食咋喎」其實今日頭先追逐我都有啲肚餓
「咁周圍睇下有咩食啦」





行左一圈，得希慎個foodcourt有開。年初一食Pepper Lunch都幾頹，不過有嘉澄陪。

「真係估唔到…年初一我會同妳食Pepper Lunch」我話
「你依家嫌棄我？我都未嫌棄你啦，雷諾曦」嘉澄反白眼

呢餐就算係我同嘉澄提早開年，差啲漏左，洗走頭先USB男啲衰氣。

「啊～爽！農曆新年好多假期，好想去旅行啊！」突然嘉澄爆左呢句出黎
「都話跟妳阿爸阿媽去㗎啦」
「吓，佢地去嗰啲地方好無聊喎」




「咁我幫唔到妳㗎喎」
「不如我地去旅行啦」
「吓？咪玩啦，我邊度有假放啊…」
「你上年啲Annual都未清㗎啦」
「但係我同妳去…」

嘉澄搖搖頭，然後繼續講佢嘅廢話。

「我同你既然係清白咁一齊去更加無問題啦，係咪先？」





我無言以對，反正呢啲嘢都係講完就算。

食完飯，我送嘉澄返屋企，喺銅鑼灣走嗰陣突然有個細路女拉住嘉澄。

「佩琪？！竟然會喺呢度見到妳」原來又係嘉澄啲學生
「馬老師，新年快樂，身體健康，利是逗來」
「佩琪，唔可以咁㗎。唔好意思馬老師，打搞到妳同妳男朋友」慶幸嘉澄啲家長都好善解人意

我喺袋入面攞出一包朱古力金幣。

「佩琪，哥哥俾唔到利是你，不過我有好多朱古力金幣，祝你學業進步，快高長大」
「多謝哥哥～」淨係呢句，都值回失收嘅利是

佩琪同佢屋企人走後，嘉澄跳上黎錫左我一啖。





「哇哇哇，咪屈我非禮喎」
「邊度會呢？讚你叻仔咋，唔介意我工作之餘仲要氹到班細路咁開心」
「呢啲基本嘢黎嘅」我有啲怕醜

「咁…哥哥可摸以送少少朱古力金幣俾我啊？」

嘉澄扮可愛呢下真係俾唔切反應，如果唔係我應該一嘢攬住左佢。

「睇下我心情好唔好先啦～」我一路行前，由得嘉澄留喺原地
「食屎啦，雷諾曦」講完呢句，我後背feel到強烈痛楚。原來，馬嘉澄停步係要蓄力助跑踢我，真係好撚蠱惑dllm
「哇屌，好痛啊…」
「嘻嘻，呢個係懲罰」

兩個人繼續打打鬧鬧，如入無人之境。年初一夜晚，街上面無乜行人，只有偶爾經過嘅車聲。喺崇光門口抬頭望向天空，竟然搵到未被污染嘅星星。





「喂你睇下，有星星啊。」我指住漆黑嘅夜幕講
「喔，喺市區見到都幾難得」嘉澄舉起手機影
「妳咁樣影唔得㗎…要咁樣影」

我喺嘉澄身後舉起手，捉緊佢對手後慢慢調整光暗度同對焦。

「咁樣，先會影得靚嘛」
「咦…又搞到人地怕醜喇」
「咁仲唔快啲影？」
「得啦得啦，不過聽日我就唔得閒應酬你喇，到我阿爸嗰邊開年」
「哦～你估我好想見妳咩？」
「我覺得你好想喎，係咪先？」

嘉澄轉個頭就捏我塊面，痛。





我同嘉澄坐地鐵返粉嶺，唔知點解坐車嗰陣莫名其妙咁就拖咗手，或者同強哥當年UA單嘢有異曲同工之妙。

總之呢一刻，嘉澄先係最重要。

送完嘉澄返屋企原來已經十二點幾，我收到黃曉盈嘅WhatsApp。

「不如聽日出去行下？」00:16
「好，我去接妳」00:17

我諗，呢個係一個時機俾我同黃曉盈講清楚。

年初二，一早我就去香港仔接曉盈，同五年前第一次約會一樣。

「第一次約會，我地去邊度好呢？」
「不如去打羽毛球？」

「吓？你之前拍拖第一次都係同女仔打羽毛球？」
「我第一次出pool…」
「唉師傅咁你第時同第二個女仔一齊點算啊…你估個個好似我咁識諗咩？」
「所以，我咪唔會同妳分手，永遠都唔會」
「口甜舌滑，行啦，我唔要打羽毛球啊…」

依家諗返起，真係諷刺，行唔到落去，但係又可以無啦啦行返一齊。

「等咗好耐喇？」
「一陣啫。」
「咁行㗎喇喎」
「去邊度啊？」
「打羽毛球？」「打羽毛球？」
「你仲記得…」曉盈問
「一定記得，記一世。」
「咁你依家唔係真係諗住同我去打羽毛球掛？」曉盈笑住問
「梗係唔會，跟我行啦」

plan今日去邊度嘅時候，我諗過去跑道尾睇日落、諗過去嘉頓山，不過到最後眼光都係停留喺迪士尼身上。

「哈，都估到你㗎啦，迪士尼！好彩我張卡未過期」喺迪士尼綫列車上嘅曉盈話
「咁…妳最鍾意迪士尼嘛」呢一刻，我好似plan驚喜俾人發現咁
「嘻嘻，咁我又真係幾鍾意喎」

迪士尼都係玩嗰啲嘢，只係對象唔同左。曉盈最鍾意就係玩旋轉木馬，嘉澄就好似乜都鐘意玩…

「快啲過黎影相啦～」
「哦，呢度背光喎」
「得喇攝影師我怕左你」

一切又回到同曉盈熱戀嘅時候，兩個人蹦蹦跳跳、一個笑話可以笑成日。

「覺唔覺得好似返返去我地第一次去迪士尼咁？」
「又好似真係…自從嗰次之後每次玩都有啲就住就住咁」
「今日，我地不如一齊，搵返我同你初戀嘅感覺」

夢也片刻逗留 才幻化癡情一縷
到此方知酒醒 而熱愛仍舊

由Space Mountain玩到小熊維尼，再玩彈弓狗同睇獅子王，最後玩到定情之地嘅灰熊山谷。

「灰熊山谷…記憶猶新」排緊隊嗰陣我不禁講
「呢個明明係極速礦車！」

「咁我地去玩灰熊山谷個過山車啦。」
「嗰個叫極速礦車啊！唔係灰熊山谷！」我強調
「有咩唔同喎？」
「灰熊山谷係成個區名，極速礦車先係個遊戲。」我解釋
「其實咪一樣！唔好咁執著。」
「唔得，極速礦車先係個名。」

「咁多年妳都仲係咁執著，好啦極速礦車」我話
「肯定係同其他女仔嚟叫壞手勢啦」
「冤枉啊大人，我點敢」
「信住你先啦～」

曉盈露出笑容，但係一瞬又蒙上一抹失落。

「不過，你同其他女仔去迪士尼，我都無權阻止啦，係咪？」睇得出曉盈係強顏歡笑
「…」呢一刻，喺迪士尼歡樂嘅氛圍下，我竟然唔知點答曉盈。

我諗過好多個可以令到佢唔傷心嘅答案，我大可以話咁我地重新開始啦，亦都可以話我地之間已經無可能。只係，無論對我、曉盈定嘉澄都會構成傷害。

我唔想做將刀刃捅入兩個女仔心扉嘅賤人。

「終於有得玩喇..快啲上車啦」

任由寒風吹來，任由過山車翻完又翻，我始終喺呢程過山車搵唔到興奮同快感，即使坐我隔離嗰個係黃曉盈。我覺得自己好失敗，糾纏喺三角關係入面，無人過得舒服，無人過得磊落。我唔夠膽同嘉澄講我約Ex出街，我都唔夠膽同曉盈講其實差唔多要斬纜。

玩完極速礦車後，落返地嘅兩人繼續喺迪士尼歡樂嘅氛圍中尷尬。

「唔好意思啊…今日咁開心我講啲咁嘅嘢，快啲玩…」未等曉盈講完，我已經吻喺佢紅唇上
「唔好講咁多，今日我係妳男朋友，妳係我女朋友，好無？」

曉盈無答我，只係自然咁拖起我隻手。今日嘅一切，回到五年前嘅第一次。

「哈，呢種心跳嘅感覺真係好耐無試過」
「係，我地好似越黎越老夫老妻」
「妖，邊忽老喎」曉盈話

兩個人好似穿越返五年前，睇音樂劇、同米奇米妮影相、睇煙花，樣樣做晒。

「你仲記唔記得我同你第一次玩極速礦車嗰陣？」曉盈排隊嘅時候問
「點會唔記得？嗰陣啱啱開排親都個半鐘，都唔知點解妳咁鍾意玩」
「你驚就驚啦，不知幾好玩，倒後嗰度次次我都嗌」
「我邊度有…大不了依家玩返次囉」
「我驚你嘔咋」

一如既往，我已經玩到免疫，曉盈繼續嗌到拆天。

「你睇下妳，有口話我驚自己嗌唔停。頭髮都亂晒」
「又真係估唔到你依家咁猛喎，俾女朋友操到咁勇啊？」
「嗰陣同妳玩驚妳無癮，咪趁得閒入嚟自己坐練膽」

曉盈望住我，然後笑住同我講：
「你真係個傻佬」

「咪就係夠傻先溝得掂妳呢個白卡」
「食屎啦」

兩個人繼續喺迪士尼渡過童話嘅一日，因為我地都知，離開迪士尼之後，我地又會變返分左手嘅情侶，繼續每日為生計營營役役嘅普通人。

“Cuz you’ll be in my heart” 原來呢句嘢，真係無解讀錯，曉盈一直喺我心扉入面無走過。越係想忘記越深刻，不如我好似依家咁躺平繼續落去？

我諗起喺迪士尼玩U型過山車驚但又要扮嘅嘉澄
。就算愛情係你沉我沉大家沉，我係咪做錯咗？

「你要記得，我地都無錯，錯嘅係時間。」等緊煙花嗰陣曉盈話
「如果唔係我嗰陣升職搞到好忙，或者我地依家已經搞緊結婚嘅嘢」

煙花未升起，只有零散人流等緊。

「咁如果有如果，我地就唔使選擇喇。每次行完條路唔啱咪重新開始，但係現實邊有呢啲嘢㗎」我話
「點解人會後悔嘅？」

我望住喺小食車糾結買爆谷定熱狗嘅細路仔講：「唔…大概係因為咁先知自己嘅選擇啱唔啱」

「咁…你覺得，依家呢一刻，你嘅選擇啱唔啱？」