我喺迪士尼識咗個女仔: 12

自從嗰晚，我同嘉澄嘅關係可以話突飛猛進，但我地之間始終有一塊好薄不過足以分化我地嘅隔膜。

不過，愛情不過就係你沉我沉，不如俾時間自己打開懷抱。

「喂～星期五有無約邊個啊？」嘉澄問我
「無啊，妳想去邊度？」
「不如去行年宵啦，都就快過新年喇！」嘉澄好興奮
「好好好，聽晒妳話」

另一邊廂，曉盈WhatsApp我。





「得閒去維園年宵支持我嗎？今年我同班friend搞咗個booth」20:40
「都就快30仲咁熱血😂」21:30
「依家唔試下到時七老八十就無得玩了🥲」21:32
「睇下得唔得閒啦🫡」21:40

我諗，維園年宵咁大都未必會行經佢個booth啦。

年三十晚，公司收四點，嘉澄一早已經放假。應佢要求做戲做全套，先陪佢返屋企食團年飯，所以我直接去佢阿嫲新田圍嘅屋企。嘉澄仲特別叮囑我唔好遲到，同埋買個果籃上去。





公司附近得APM一田，唔想都唯有硬食貴價果籃。農曆新年前條街反而無乜情侶，一家大細著新衫剪頭髮就好多，成條街都係著唐裝嘅細路仔。

我諗起樂芯樂熹，有啲掛住同佢地去迪士尼嘅日子。

坐車碌IG，發現曉盈po左個喺維園食飯盒嘅story，仲要影住自己對長腳。咁凍都著咁少，出於習慣差啲就send左「著咁少，係咪想凍親😠」呢句俾佢。不過，宜家我什麼也不是，有咩資格噓寒問暖？

「到未啊🙁？」16:50
「啱啱上地鐵🥹」16:50
「快啲啦🫠我同班長老游乾水游到就黎標眼水🤧」16:51
「輸好多？🤣」16:52




「好悶啊🥲我屋企啲細路又未到，得我一個年輕人」16:53
「咁睇得起自己係年輕人🫡我好快到㗎喇」16:53

未入到屋，已經聽到好嘈雜嘅打牌聲。

「終於到喇？」嘉澄好似搵到救兵咁
「sorry囉地鐵多人。公公婆婆祝你地身體健康、萬事如意，小小心意，最緊要開心。」我作為十八孝男友當然要先孝敬長輩。
「哎呀唔使咁客氣啦～快啲坐低陪婆婆打牌」
「好啊，都好耐無打麻雀喇」

一打就係兩個鐘，一舖糊都無食。

「開飯喇！」嘉澄媽媽喺廚房大嗌，成班後輩衝晒入廚房幫手。

十幾人逼埋一齊食團年飯，呢種感覺真好。





「頭先我明明見到你有幾局都可以食糊㗎喎，做乜唔食？」嘉澄細細聲問
「始終老人家嘛，大家開心咪好，呢啲人情世故黎」
「咁識做人嘅你，獎你食雞髀喇」嘉澄諗住夾俾我，我即刻接住夾俾最細個，我唔識嘅親戚。
「梗係俾小朋友食啦，我呢啲食雞胸咪得」
「多…多謝哥哥」小朋友好怕醜咁食晒成隻雞髀
「真係得意～」我忍唔住講
「生返個囉～」嘉澄阿媽一句，我同嘉澄差啲一齊梗親
「阿媽啊～都話唔好喺諾曦面前講呢啲囉，人地有壓力㗎」嘉澄話
「妳阿媽都唔係無道理㗎。我大妳兩年都生咗啦」如果我無估錯，呢個應該係嘉澄個表姐

一餐飯本身好地地，變咗傾育兒，都無壞嘅，聽完實有用，應該。

食完飯，除左陪班細路玩下，就係同班親戚飲酒應酬。班細路未見過有同佢地溝通到嘅男仔，深受感動，甚至唔俾我走。





「哥哥陪我地玩多陣爆旋陀螺啦～」
「唔得啊我要同嘉澄姐姐拍拖拖啊」
「唔制啊～唔好要嘉澄姐姐」

我哭笑不得，最後喺所有親戚陰陰嘴笑嘅目光下離開屋企。

「你屋企氣氛都幾好喎」我話
「你今日一到個個即刻熱鬧晒，平時唔係咁㗎」
「係咩？點解嘅？」
「佢地話，我係馬家最後一個帶男仔返屋企嘅後輩」
「哈哈哈哈哈，我真係榮幸可以做到呢個男仔」
「食屎啦你，罰你今晚年宵埋單」
「我無所謂啊」

喺沙田坐地鐵落紅磡再轉隧巴，好快就到銅鑼灣。





「妳要買乜啊？」我問
「乜都睇下囉，我都係想感受個氣氛啫」
「咁點解唔去其他年宵嘅？」我真係淆底
「維園最大喎，周圍又多嘢食」

我無得反駁，唯有祈求去唔到曉盈嗰檔。

「買花擺喺我間房都好喎」嘉澄話
「唔好再提花，我屋企已經成個公園咁，佢地農曆新年又買…」講起都頭痛，成日都有唔同昆蟲探我。
「切，無啲情趣」嘉澄行入花市。

嘉澄成個細路女咁越行越快，我唯有拖住佢。

「喂，拖實我啊，廢事你唔見」我緊握嘉澄微冰嘅手




「點解嘅？」
「因為妳係…唉行啦」

我始終唔夠膽講，妳係我女朋友。

「表完白喇喎，係咪要改口呢？」
「點啊BB豬～夠唔夠sweet先？」
「妖～唔使咁肉麻啊，叫得正經啲得唔得啊」
「老婆？我最愛嘅老婆？」
「其實，叫我女朋友就得！你睇下，女朋友又有威嚴又好聽」
「吓係咩？」
「梗係啦，無論你叫我乜，都無人知你係我女朋友㗎，但係你一叫女朋友個個都知啦」

「喂，女朋友！」
「點啊，男朋友？」
「無啊，我愛妳」
「我都係」

「我都係…買多一串冰糖葫蘆食先」眼前嘅嘉澄要我俾錢，成功將我拉回現實
「食咁多肥死妳啊」我雖然笑佢，不過最後都係俾錢買俾佢食。
「新年流流唔好講死字啊，死人雷諾曦」
「啊？妳自己咪都係講緊，傻撚」我忍唔住直接咁懟返佢
「咩料啊，我都無撚，係都係傻閪啦」我估唔到嘉澄會完全放飛自我

就喺兩個人一路行一路傾嗰陣，不知不覺行到一間賣生肖公仔嘅攤檔。

「哇好得意啊，你乜嘢生肖啊？不如我地買兩個啦」
「係啊，我地呢組公仔全部都有唔同生肖嘅得意樣，佢地仲識隨機講唔同祝賀語」

聽到把聲，好熟悉好Close，我望向極力sell緊嘉澄嘅嗰個女仔，就係黃曉盈。

「喂呢個好得意喎，仲要買2個一八八，好抵」
「買啦，最緊要大家開心」我望住專注收錢嘅曉盈，佢做嘢嗰陣其實好有魅力。

今日天氣都算凍，曉盈著上一件米白色hoodie，配上修身legging，仲有染啡嘅馬尾，遠處都見到活力同美好嘅身段。

不過嘉澄都唔差喎，畫家帽加埋米白色針織外套，頭髮微捲，怕醜得黎帶貴氣。

眼前兩個女仔我都同佢地有過非一般關係，而眼前嘅佢地同時將目光放喺我身上。

「多謝晒$188吖～呢個係你男朋友啊？」
「係啊～我地啱啱開始無幾耐咋，嘻嘻」
「真係恩愛喇，好羨慕啊」
「妳咁靚，新一年一定桃花旺盛㗎」

睇落平平無奇嘅客氣說話，唔知點解我聞到有火藥味。

最後行到兩點幾，嘉澄話眼訓就返屋企。好彩地鐵通宵，如果唔係我又要坐的士。

「話說…頭先個女仔，妳覺得點啊？」我問
「都幾好啊，不過我問返你，你覺得佢點先？」估唔到嘉澄反客為主
「吓？咪都幾好啊，都唔識佢嘅」我話
「係咩？聽聞佢叫黃曉盈喎」嘉澄嘟起嘴問
「點解妳知嘅？」
「無嘢可以逃離馬老師嘅法眼」
「唉都俾妳知道左啦，佢咪就係我個Ex」
「Hey～你啲眼光都幾好喎」

我望住眼前攞住公仔打打鬧鬧嘅嘉澄無奈苦笑。

唔知係咪嘉澄刻意迴避頭先嘅問題，一程車佢都表現得好雀躍，反而令我無所適從。

「終於到屋企喇～新年快樂！」嘉澄話
「過黎吖」「點解啊？」
「今晚好凍，俾我攬下妳」

我唔忍心要一個默默鍾意我嘅女仔呷醋之餘唔可以出聲，不過表達心意嘅時候仲未到，我要放低黃曉盈先得…

本來以為時間洗刷會加快進程，不過曉盈真係履行話追返我嘅承諾，極主動咁搵我。

「你女朋友都幾靚喎🫢」02:05
「基本啦」02:08
「唔建議喺我面前曬命🙁
不過，我一定會追返你
下次同你曬命嗰個一定係我」02:10

我睇到呢度不寒而慄，究竟係曉盈黑化左定佢一直都係咁我唔察覺。

年初一，除左去我阿嫲度拜年，其實都無乜嘢做。老豆老母又去睇賀歲片，得我一個人遊蕩，嘉澄又唔得閒，唯有喺東九龍周圍行吓。

「📷照片」嘉澄send左佢利是大豐收俾我
「得喇知你威🥹我一個人喺觀塘行緊」
「咁sad？話說夜晚我都無地方去💆🏻‍♂️」
「咁就啱啦，圍爐取暖先」

莫名其妙地就又約到嘉澄。

「點先？大年初一都約我，要俾利是㗎喎」嘉澄一見到我就伸出手
「吓？我都未結婚」
「我唔理我唔理～」
「咁我請妳睇戲喇」

農曆新年除左睇戲真係諗唔到有咩活動可以做，仲要大部分賀歲片都係爛片。我同嘉澄求其揀左套海報喜氣洋洋嘅電影就算，大家都係想消磨時間啫。

「好似有伏喎…都無乜人睇嘅」
「前面咪有一pair情侶睇囉，應該都ok嘅」

但係我估錯了，套戲真係好伏。睇到中間，我同嘉澄索性閉目養神，畢竟都唔知前面pair情侶係咪認真睇就唔好篤電話影響到。

忽然，我同嘉澄都不約而同彈起，因為聽到一啲奇怪嘅聲音…
「你有無發現好似有啲怪聲…」嘉澄問我
「妳咁講又好似真係有…似係女人…呻吟」

我同嘉澄不約而同望去前面，發現pair情侶二合為一，同一個位有兩個人影。

「哇咁痴線喺戲院為愛鼓掌」嘉澄話
「阻人扑嘢燒春袋㗎，走啦」我細細聲講

點知，嘉澄出戲院嗰陣因為太黑睇唔到樓梯而仆街，產生嘅聲響吸引到前面為愛鼓掌嘅朋友。

最黑仔係，我隻戇鳩手唔知點樣掂到iPhone個鎖定Mon嘅手電筒，搞到一照就見到幸福USB入隧道。

「仆街！」「仆街！」「仆街！」USB男、嘉澄、我，同時講呢兩隻字
「仲望，跑啦！」

我拖住馬嘉澄起動跑出戲院，根據計算USB男要著返褲應該有5秒buffer，於是出戲院我選擇上扶手電梯直到頂層然後再坐lift落停車場，成功撇甩USB男。

或者可能，人地由始至終都無諗住追，想我地join呢？

「哈…哈…跑死我喇」嘉澄上氣不接下氣咁講
「係…啊，真係估唔到…大年初一竟然有人喺戲院啪啪啪放炮仗」
「其實都幾好笑」嘉澄講完呢句，佢同我都忍唔住大笑

兩個人喺商場中間無啦啦大笑，仲要笑到停唔到嗰隻，真係你唔尷尬尷尬就係人地。

「喂笑夠喇，一陣人地見到我地又要跑㗎喇」嘉澄話
「都啱，我都唔想年初一俾人開年」
「咁不如轉場去對面海？」
「咁仲唔行？」
「我想你拖住我行」