我喺迪士尼識咗個女仔: 11
去到機場，只不過係六點幾。嘉澄同我喺機場入面亂行，睇下人地去邊度玩都好吖，我地呢啲窮撚就難啲了。
「好耐無去旅行喇～」嘉澄話
「妳咁多假，要去都唔係好難啫」
「無人陪先攞命，一個女仔又怕」
「妳可以同妳老豆去，錢又唔使出」
「吓，佢去嗰啲九寨溝唔啱我囉…」
等咗一個鐘，班機宣佈delay多一個鐘先到香港，但係我同嘉澄已經餓扁，只不過佢唔提出食嘢我都係唔出聲為妙。
「咕～」身體好誠實，出賣了嘉澄。
「肚餓？食嘢啦」
「唔使啦，機場食水好深」
「我請」
最後嘉澄乖乖地跟我行去M記。
「麥旋風？」
「係啊，食甜嘢好啊，個人都開心啲」
「我發現同親你一齊就肯定會做傻事」嘉澄一邊攞住杯麥旋風一邊望住我
「吓有咩問題啊？」
「你唔覺得兩個人揸住杯麥旋風接機好好笑咩？」佢忍唔住笑，我都忍唔住笑
「俾妳咁講又好似係喎，咁仲唔快啲食」
嘉澄真係超級無敵快咁食，食到污糟晒。
「哇究竟係妳塊面定口食嘢㗎…」
「又好似係喎…食到鼻都有」
「咪郁，我幫妳抹吓佢」
我搵張紙巾輕輕咁抹走嘉澄嘴唇同鼻尖上嘅污跡，然後用手指抹走臉上嘅污跡。嗯，粉底好薄，證明嘉澄本身都白。
「又抽水啦」
「鬼有…」
「咁容易臉紅嘅？」
「…」
「周到啦」嘉澄不懷好意咁拍我膊頭
又等了一個小時，終於見到嘉澄父母。
「阿爸阿媽～好掛住你地啊」我覺得妳係掛住屋企多啲
「哎呀寶貝女呢幾日過成點啊？」
「呵呵呵，嘉澄唔記得帶鑰匙」
「所以…咪去咗阿曦度訓咗幾晚」
當我仲開心緊一家團聚嗰陣，先發現…其實一個女仔去男仔度過夜都幾誇張。
「我唔係咁嘅意思…我地分開訓㗎」
「後生仔，明㗎啦。只要唔好搞出人命就得㗎喇」
「…」
「哎呀阿媽啊～唔好講呢啲喇，我好肚餓」
「未食飯咩？」
「嘉澄話一定要等埋你地先食啊，佢頭先淨係食咗杯雪糕」我都讚下嘉澄
嘉澄拖住佢爸爸媽媽，我喺後面做工具人。
求其喺市區啲餐廳食飯，我就送嘉澄一家返去。
「哎呀唔使送啦，又要麻煩你來回一轉」嘉澄老豆話
「小意思啫，應該嘅」
「嘉澄呢個男朋友真係揀得好」連阿媽都讚
半個鐘後，安全將一家人送抵沙頭角邊境。
「真係唔該晒你啊，搵日請你食飯啦」嘉澄媽媽講
「好啊好啊，auntie uncle早啲休息」
「咁我呢？」
「妳都係啊，聽朝返工就正常返無我車㗎啦」
「得啦長期鬼」
第二日我都要返工，所以又係快手返到屋企訓覺。
「尋晚多謝你啊🤪無嫌我地遠同埋肯陪我等🥲下次請你食飯🫡」06:50
「唔緊要啦，不過請食飯我多謝定先😁」07:20
「真係膚淺😒
農曆新年去我屋企燒烤啦，我搞張禁區permit俾你同強哥佢地一齊黎啦」07:21
「好啊，我一定會到的🫡」07:22
一月，農曆新年前最後一個月，都係傳統旺季。一家人影全家福、KOL影硬照、學生影相interview等等，我同富哥肥波都忙到踢晒腳，嗰啲Jennifer馬嘉澄，根本無暇應對。
「今日係我地第幾日十點仲喺公司？」富哥問
「第五日，仲有4日先年三十晚」肥波一路用photoshop一路講
「Shit，幾時放假啊？」富哥問
「乜撚嘢，咪年初一囉」我答
「屌那星聽日星期六我地今晚係應該happy吓，結果依家賣血俾公司」肥波話
三條友做到十二點幾，終於搞掂晒，去大排檔發洩吓。
「哇我屌你老母，日日幫間濕鳩公司做狗，真係好想辭職。」富哥話
「辭職大不了過檔去其他studio做」我話
「屌你，去第二度咪都係受氣。計我話，應該我地三兄弟出黎，自己開檔嘢，拍住上！」肥波話
富哥同肥波已經醉醉地，我不嬲都唔鍾意飲酒，尤其啤酒，落bar都係陳年舊事，所以我淨係飲汽水，非常清醒。
我認我係廢柴。
「你地醉喇…返屋企啦」我強行拉住兩個男人，單手打俾富哥嘅Jennifer。至於肥波，我曾經諗過一手推佢入的士就算，不過佢係我兄弟，未至於見死不救。
不過條仆街恩將仇報，佢竟然打俾馬嘉澄。
「喂馬嘉澄，妳條仔…雷諾曦飲到…好醉，亂咁講嘢，快啲…嚟新蒲崗接佢」我聽到即刻衝去解釋，但係馬嘉澄已經cut左線。
「屌你老母肥波，食屎啦」我真心嬲，有乜可能叫個女仔夜媽媽喺沙頭角出嚟
「哦？乜撚嘢啊？」肥波醉到仆街，我屌都廢閪事，直接推佢上的士俾低兩舊水佢自生自滅
依家尷尬了，我唔知嘉澄究竟係繼續訓覺定真係咁痴線地出嚟搵我，因為我電話無電了。唯有憑心靈感應，企喺一個我覺得佢會出現嘅地方，然後繼續扮醉。點解？唔扮嘉澄仲唔嬲到痴線…
唔知係醉定眼訓，我竟然喺街頭等到釣魚。
「喂～雷諾曦？雷諾曦？」
「你係真醉㗎喎，唔飲得就唔好飲咁多啦」
「又唔係喎，都無乜酒味嘅」
「你唔醒我就粗暴拖你上車㗎喇」
嘉澄咁籤弱又點輕鬆拖起我，用盡奶力先搬得起我，仲要俾我食到個波邊，我忍唔住傻笑。
「醉到無啦啦傻笑咁痴線嘅…」嘉澄話
「見你呢排做嘢辛苦就算啦。啊～我都好眼訓」
我feel到架車開始郁緊。
「雷諾曦，你知唔知啊？頭先我知道你飲醉酒我又開心又擔心。我估唔到會搵我救你先，本來應該係你個Ex㗎嘛，我開心咗一秒。不過我又擔心你，飲酒傷身，仲要咁夜。」
「平時你對我咁好自己就糟蹋自己，搞到我有啲同情你」
本來去到呢度我都覺得係講笑，點知…
「同埋鍾意你。」
我潛意識想擘大眼，不過我要堅持到底。雖然我唔知佢車緊我去邊，亦都唔知係咪佢見我飲醉講風涼話，但係呢一刻，我徹底感受到悸動，我心跳越黎越快，原來聽到人地嘅心底話係會咁緊張。
見「醉」得差唔多，部車又好似停咗，我扮宿醉起身。
「啊…好頭痛，呢度邊度黎㗎？」
「終於醒喇咩雷諾曦？你訓左兩個鐘喇」
「吓…？咁妳一直喺度吹風？」
「都唔係嘅，改吓班細路啲功課囉，不過今晚真係有啲凍」
梗係凍啦馬嘉澄，妳睇下妳停埋啲咩地方，九龍城碼頭，仲要淨係著件薄Hoodie就出黎。我呢一刻心痛多過感動，食屎啦死肥波。
「嗑哧～嗑哧～」
「唉呀都話妳㗎啦，凍親喇」我除低我件外套俾佢
「咁啱啫，我都係企出嚟睇下風景」
「快啲返屋企啦，我揸車」我諗住去駕駛座開車，點知馬嘉澄攔住我
「nonono，我作為一個老師係唔會俾你喺我面前酒後駕駛㗎！」嘉澄翹起手，扮嬲咁講
「我飲左好少咋，我揸啦，妳都攰喇」如果我坦承自己無醉馬嘉澄應該仲嬲
「都唔得，我寧願同你stay到聽朝酒氣散先俾你揸」
「咁我都唔會俾妳揸返屋企，妳睇下妳自己幾眼訓。肥波叫就出黎，妳容乜易俾人呃啊…」我話
「點會啊，只係因為…」
「因為咩啊？」
「因為嗰個係你。」
馬嘉澄，點解偏偏妳要咁主動…
「我？」「雷諾曦，你認真答我，你當我係邊個？」
我點都估唔到，馬嘉澄會宜家問我。
「咪朋友囉」「跟你個心諗乜答，唔好逃避」我故作鎮定，俾嘉澄一下識穿
「係…我對妳係有啲feel嘅」「咁咪夠囉」
一時三刻我唔識答，的確愛情可以死心塌地愛一個人，可以單向付出，不過呢個唔係我想見到嘅結果。
「但係我仲未放低到我Ex。妳知道㗎，五年感情唔係話咁容易放低。妳唔係唔好，我亦都唔係對妳無好感，但係…妳知唔知妳咁樣好傻，如果我接受就直頭係自私。」
「點解你成日幫我諗究竟係咪自私喎。依家係我勇敢求愛，我都未介意你介意啲乜喎？再講，你未放低到我等你囉，等幾耐都得㗎。人地師生戀、姐弟戀都無問題，我唔覺得我同你之間會有問題囉」
「唔係咁嘅意思啊…」我唔想面對，因為無論答案係點，都會有人失望。
「我俾一分鐘你諗。」
馬嘉澄撲上前，毫不猶豫咁吻喺我嘴唇上，好軟綿綿、好溫暖。我開始麻木，開始想放棄一直以來為左保護兩個女仔嘅堅持。
馬嘉澄完全就係啱啱解放嘅野貓，不停想用條脷鑽入我口腔，同平時乖乖女嘅形象完全相反。我好想俾回應，但係我知道一俾反應，所有嘢都返唔到轉頭。
一分鐘過去，嘉澄終於停下佢從來無做過嘅動作。
「點解…點解我做到咁你都無反應？係咪我太差，定係唔夠放盪？」嘉澄喊咗出聲，於心不忍嘅我，最終都俾咗一個模凌兩可嘅答案。
「唔關妳事㗎，妳做返自己就得㗎喇，唔使為咗其他人而改變自己。係，我雷諾曦鍾意馬嘉澄，但係我鍾意嗰個係去迪士尼睇音樂劇睇到笑、呃我去U型過山車但係自己都唔夠膽玩、凡事認真之中帶點可愛嘅馬嘉澄。」
「呢一刻，我真係真係俾唔到100%信心妳，我需要時間去忘記，以及同妳建立一段回憶。我應承妳，呢段時間無論點都好，我都唔會拋低妳，但妳同時都要俾啲空間我放低佢好唔好？」
馬嘉澄再次擁入我懷抱，喺十幾度低溫下，周圍仿佛又變返熱情似火嘅夏天。