我喺迪士尼識咗個女仔: 10
所謂老地方，其實就係西環海旁間茶餐廳。
「哇曦仔好耐無見，你女朋友喺入面等緊」
「唔該祥叔，午餐A凍茶走甜」
呢間茶餐廳，由我讀書食到第一次拍拖，到拍拖四週年，到分手後一個人食，到依家又兩個人食。
「你嚟喇？我仲以為你唔會到」
「我應承過，就會做到」
佢戳住杯檸檬茶，我攪住杯奶茶，各自有心事。
「係呢，妳呢排…幾好嗎？」
「都還可以，轉咗去私院度。你呢？」
「都係嗰間囉，不過毒咗」
「午餐A、午餐C，慢慢食啊」美食打破尷尬。
佢食相都係同平時一樣，扮淑女，好唔自然，但係食到一半又會暴露本性，成臉都係汁。
「又食到成隻污糟貓咁～」我潛意識用紙巾幫佢抹
我自己都呆咗，但係畢竟已經分手，應該保持少少距離。
「唔好意思…」
「你同以前一樣都係咁，無變過」
「係…係咩？」
「其實你唔使刻意疏遠或者唔理我」
「因為我講過，我會重新追返你，雷諾曦。」
佢講完後，兩個人坐喺茶餐廳，各自有各自嘅心思，一坐就坐到夕陽西下。
「原來已經五點幾，我走喇」
「你…夜晚有嘢做？」
「都唔係，不過要接一個人」
曉盈呆一呆，然後嘴角強行擠出一個笑容。
「咁你走啦，唔好要人等你」
「其實我都順路可以車埋妳嘅…」
「唔使啦，我想再坐多陣」
如果可以，我都想同你繼續坐落去。不過感覺呃唔到人，我都係個人，我渴望有人關心，偏偏最黑暗時期就會有天使引路。
嘉澄做嘢間幼稚園喺馬鞍山，我入到去已經差唔多黑晒天。其實我無約佢，純粹想博吓會唔會有機會俾到驚喜佢。
幼稚園燈光仲未熄滅，陸續有老師行出，就係未見馬嘉澄。等到七點，我忍唔住問行出嚟嘅老師，原來嘉澄真係未走，仲改緊小朋友嘅功課。
等完又等，等到去隔離商場買定雞蛋仔等嘉澄放工。九點幾，幼稚園燈光終於熄晒，見到嘉澄吃力咁拉鐵閘，都幾滑稽。
「靚女，唔知賞唔賞面坐我車呢？」
嘉澄嚇一嚇，然後翻白眼。
「死人雷諾曦又嚇我，不過車我就唔該晒，攰死我喇」嘉澄拍拍膊頭伸懶腰
「咁就啱了，唔知點解有份雞蛋仔…」
「邊度買㗎？」嘉澄見到雞蛋仔雙眼發光咁
「唔知呢？我淨係知道有人好肚餓」我沾沾自喜，因為我知道自己呢招得米
嘉澄一個人食晒成排雞蛋仔，然後就開始釣魚。
「訓一陣啦，都要半個鐘以上先返到去」我話
「…」原來未等我講，佢已經訓著左
老母WhatsApp話無留飯，嘉澄又未起身，忽然興起兜咗落觀塘海濱，吹下風。
我諗起同曉盈以前啱啱拍拖無乜錢，食完飯最大娛樂就係喺觀塘海濱散步。
「幾時我地可以搞返部咁嘅遊艇去遊船河呢？」曉盈指住泊喺岸邊嘅遊艇問
「無三十年都要二十年啦…都係渡海小輪實際啲」我話
「我想要一隻淨係我地兩個人嘅遊艇」
「一係我摺一隻俾妳？」
我隨手執起地下嘅傳單，快手快腳摺咗隻船。
「有啲料到喎，不過差啲嘢」曉盈話
「差兩個lego人，都無你同我隻船有咩意義喎？」
個lego人仲喺我屋企，不過隻船已經石沉大海了。
「一個人發吽哣咁慘啊？」
「咦，妳醒咗喇？返去啦，聽朝要返工」
「睇嚟有人有心事～」
「如果一個人或者事好似一閃即逝嘅流星咁，會唔會有機會挽留呢？」
「流星最靚一刻，咪就係一閃即逝嗰陣，係咪？」嘉澄望住我笑
呢一刻，我真係知道自己個心諗乜了。嘉澄嘅笑容令到我好安心，完全無抵抗力。我可以喺佢面前做最真實嘅自己，我可以肆無忌憚咁笑佢。
「係！」「咕～」睇嚟雞蛋仔唔係好夠嘉澄食量
「咁靚女，唔知妳介唔介意同我食個宵夜呢？」
「好啊，求之不得。」
我同佢相視一笑，一整日嘅煩惱都拋諸腦後。
「食慢啲啦，哽死妳啊…」
「好肚餓嘛…」嘉澄一個人叫咗兩碗牛腩麵
「自從妳識我之後有無肥咗？」我忍唔住笑
「哼！珠圓玉潤先係王道囉」嘉澄反擊
「講笑咋，妳同我第一次見妳都係一樣咁靚」
事實上，唔需要老師嘅黑絲或者OL裝束，只係普通一件GU連身裙，嘉澄都著得好靚，好自然好純粹嘅靚。
當然，佢肯著黑絲實好㗎，嘿嘿。
返到屋企，我同嘉澄聽朝都要返工，所以嗱嗱臨沖涼就訓覺。
夢入面，我見到黃曉盈。
「喂雷諾曦～好耐無見喇喎」曉盈話
「我地今日先啱啱見完咋喎」
「我講緊五年前嗰個你啊」
「又講呢啲…哈哈哈」
「唯一搵到你當年嘅痕跡淨係得返你怕醜，都係咁容易臉紅」
「見到妳嘛…」
呢個時候，嘉澄無啦啦出現喺我同曉盈嘅對話入面。
「呢個係邊個嚟㗎？」嘉澄問
「er…」
「我問妳係邊個就真啊，無啦啦乘人之危搞我地」曉盈出聲話
「咩料啊，妳同諾曦已經分左手喇。乘人之危？感情世界就係來得快去得快㗎啦」嘉澄反駁
「大家冷靜少少…」
「收聲啦你。」嘉澄同曉盈異口同聲講
「流星最靚一刻，咪就係一閃即逝嗰陣，閃過你就好難再搵得返喇。不過，你有同月亮一齊長久掛喺天空嘅星星。」嘉澄輕輕踎喺地下同我講
「既然流星最靚一刻係一閃即逝嗰陣，你就應該更加要捕捉佢。佢一閃即逝，可能只係去咗第二度等你咋」曉盈捉住我臉頰講
好彩，一切只係夢境。醒嗰陣凌晨四點幾，嘉澄仍然熟睡喺我隔離，不過聽日佢就要搬返去喇。回想呢幾日同居生活，真係又悲又喜，見返故人，但係同時認清自己嘅感覺。呢一刻，我可以肯定我對嘉澄有感覺，但係我仲需要一啲時間放低曉盈。我好努力放低緊嗰陣，偏偏佢又出現喺我生活，應該話，佢從來無消失過。
迪士尼，茶餐廳，邊度都有佢嘅痕跡。
迪士尼，手機殼，雞蛋仔，邊度都有佢嘅痕跡。
第二朝，我都係有車嘉澄返工，不過其實先去馬鞍山再返觀塘好唔順路，所以我諗住放低佢喺鑽石山地鐵站算。
「去到鑽石山妳坐地鐵得唔得？」我問
「乜你咁㗎，上次又車到門口…」嘉澄扁嘴
「隧道費好貴…」
「我揸咪得囉，你呢部應該係自動波？」佢話佢揸，但係自動波同棍波都分唔到喎
「係啊，妳有牌咩？」我真係驚訝
「痴線，住沙頭角無車牌真係日日坐巴士咩」
「咁妳之前又要我陪妳？」我又做水魚
「吓邊度有，係你自己自願㗎喎」
我屈服，簡單教佢點操作啲制就俾佢揸。
「希望妳唔好幫我老豆部車留簽名」
「得啦，放心，全身而退無問題」
嘉澄絕塵而去，呢幾日難得有個朝早係自己一個。
「早晨～」公司咁早應該得我地三個老屎忽
「屌，曦哥又射波，尋日有兩單婚攝要報價，搞撚死」肥波話
「啱你啦，預習定結婚」
「似乎啱富哥多啲」肥波恥笑緊俾Jennifer不停側擊想結婚嘅富哥
「啲女人真係痴撚線，識左唔夠半年就話結婚」富哥一路飲奶茶一路埋怨
「屌，咁唔通等到收經先結婚咩？我理解喎」肥波話
「可唔可以文雅少少…」我咬住三文治講
「吓，屌你咩，關你撚事。」肥波同富哥異口同聲答我
呢個圈子真係無得救，多謝嘉澄教導我唔好講咁多粗口。
返工當然係等放工，不過今日唔同，嘉澄send message嚟話今晚放工要去接佢老豆老母機，問我車急唔急用。
「我五點可以走，班機大約七點幾到香港。不如沙田等？」16:30
「無所謂」16:32
「做乜咁嘅喊樣」16:32
「驚你刮花我部車」16:33
「邊度咁易，最多一陣去機場你揸」16:33
「妳懶咪認」16:34
然後5點鐘我就坐地鐵去沙田，其實佢接機關我咩事…
「真係無穿無爛喎～」喺沙田上車嘅我check清楚部車，雖然佢撞我都唔會叫佢賠㗎啦
「梗係，我都考咗六年車牌喇，揸得多過你」威喇威喇串返我
「最勁係妳喇，依家係咪去機場啊？」
「係啊，接埋阿爸阿媽一齊食飯啦」
作為安全司機，加埋未夠鐘，梗係慢慢開。
「喂，呢幾日打搞晒你」
「客咩氣吖，妳條仔都做過啦」
「講呢啲，好不滿咩？」
「都幾㗎～搞到我無啦啦有齊人之福」
程車啱啱過青馬大橋，嘉澄同我之間靜咗。
仆街，係咪我講錯嘢…
「你真係覺得委屈嘅，放低我喺東涌，我自己坐巴士去啦」
「我唔係咁嘅意思…」死喇，今次玩大咗
「咁即係點？」
大腦高速運轉搵緊一個兩全其美嘅答案。
「我好鍾意做妳條仔㗎…」我講完都覺得羞恥
「真係好鐘意，超級無敵鍾意」見佢無反應，我又補多句
嘉澄無俾任何反應，咁我梗係繼續去機場。
「噗…好喇我忍唔住你贏喇，點解你講嘢可以咁好笑」屌又扮，嚇死我咩
「馬嘉澄我俾妳嚇死喇…成日用呢啲嘢嚇我」
「點會嚇親呢？又話唔鍾意齊人之福，唔通…」
仆街，係咪俾佢周到。
「唔通你係gay？」
「屌…」
「又講粗口，罰你㗎」
「好好好，妳唔嬲罰乜都得」
如果係妳，我甘願俾妳懲罰。