我喺迪士尼識咗個女仔: 9

飲完茶，老豆老母又話去行花墟。屋企已經周圍都係花草樹木，差在無養寵物咋，唔係就變動植物公園。

「都幾好啊，兩個都肯去行，好過我屋企囉，阿爸阿媽無嘢做就去旅行，完全唔理我」嘉澄話
「妳都唔知，佢地啱啱去完無幾耐咋」

我同嘉澄無乜嘢搞，喺屋企樓下無所事事。

「不如去迪士尼啦。」嘉澄提議
「好多人喎今日」
「都係入去感受下氣氛啫，gogogo」見到嘉澄咁雀躍又好難拒絕嘅





我開始後悔，因為成個迪士尼都係細路。

玩乜都要排隊都算，仲有好多細路周圍跑差啲撞到嘉澄。雖然嘉澄親近開細路，但係都要憐香惜玉㗎嘛。

「多人到，玩乜好啊？」我問
「米奇音樂劇」都估到你啦
「好好好」

今日就真係超級無敵多小朋友，我地兩個隔離都坐滿晒。只係今日嘉澄著衫明顯只係落街食飯嘅厚度，迪士尼近海當風就顯得唔夠衫了，連室內冷氣都打晒冷震。





「凍啊？」我細細聲問
「邊度有…」但係佢已經不停呻緊鼻涕
「即係有啦。」我攞左件冷衫俾嘉澄著住

「聽話，著衫先唔會病。」呢句嘢，我應該同過佢講好多次。

我同曉盈經歷過五個冬天，其中一個冬天我地喺冰天雪地嘅歐洲渡過，尤其難忘。最記得窮遊嘅我地啱啱出bnb就即刻凍到仆街，曉盈仲要震晒。咁我梗係除衫俾佢著，點知佢扭計話唔想著，我咪唯有如同今次咁講去嚇佢。

原來咁又幾年了。





「喂睇完喇…」嘉澄叫醒我
「哦，跟住去邊度？」事實迪士尼係好玩不過絕對唔係假期
「周圍行吓囉，邊度唔使排隊咪玩嗰個」嘉澄建議真係好有建設性
「旋轉木馬啦」應該係最少人嘅遊戲

嘉澄應該要多謝我揀旋轉木馬，因為佢IG又多十幾張素材。

「你影相真係幾靚喎」嘉澄話
「小姐，我做邊行㗎，妳啲問題咁好笑嘅？」
「又好似係喎，但係你從來都唔影自己嘅？」
「我係攝影師，我點影自己？」我哭笑不得

嘉澄舉起電話自拍，我攝鏡。





「又話唔影自己～」
「依家係妳影嘛，攝個鏡啫」
「咁等我po個IG先」

「Disney with him @nokhei_l」三秒後就收到有人tag我嘅通知

「又呢啲唔清唔楚嘅caption，請問你係咪靠害…」
「咩啊，你驚啊？」
「點會驚，妳估我係妳咩」

我驚曉盈睇到啫。

「@hiuying_. liked your post」

「咦，呢個女仔邊個黎㗎？」嘉澄問




「哦…呢個…呢個係我朋友」
「朋友？朋友會口窒窒？」
「Ex囉…」

我撳入去睇佢IG，佢今日都喺迪士尼，不過story就喺城堡度po，caption仲要寫等煙花。

「喂，不如今晚唔好睇煙花啦。」
「點解啊？」
「咁…聽朝都要返工，早啲返出去食飯啦」
「哦～究竟係避某人定食飯就唔知了」

儘管如此，嘉澄都係陪我繼續玩機動遊戲。

「有煙花嘅日子我都係第一次唔睇」嘉澄話
「原來真係少好多人」玩緊第三次Space Mountain嘅我話




「咁玩埋U型過山車囉，你夠唔夠膽？」
「夠…實夠㗎」事實上，我未玩過呢個

「啊啊啊啊啊啊呼呼呼Yee～」這是在U型上的我
「使！唔使咁驚啊？」嘉澄叫我
「好爽啊～」前所未有的快感
「有咁誇張咩？啊～」嘉澄自己都叫

玩完，無嘔，但係腳軟。

「哇原來呢個咁好玩㗎？我仲以為好恐怖添」我同嘉澄講
「係囉…真係…估唔到」佢都喘晒氣
「妳又話妳玩過？」
「我無講過喎，我只係話我夠膽玩」





咁㗎咩，我又做水魚。

「喂，其實唔睇煙花都幾好啊。」我同嘉澄喺無人嘅Toy Story區漫步
「都未見過咁少人咁靚嘅Toy Story…」嘉澄話
「不如影張相？」我主動問
「好啊～」

轉個頭，喺 @nokhei_l 度出現了一個同女仔合照，乜caption都無嘅story。

「你咪一樣都係唔清唔楚」嘉澄話
「係咁㗎啦，曬命用」
「咁不如玩多次灰熊山谷？」
「嗰個係極速礦車…」
「唔係一樣㗎咩…」

咁我改口囉，灰熊山谷。

「未見過迪士尼真係靜到咁，迷離莊園呢度真係迷離」嘉澄話
「妳講嘢都幾好笑喎…」
「當然啦，本小姐是最幽默的。不如依家玩多次旋轉木馬吖，應該無乜人」
「好啊，玩埋好走喇，你聽朝要返工㗎」

旋轉木馬又真係無人，仲見到煙花嘅尾巴。

「哇！真係無人啊，快啲幫我影相啦」
「儘量啦，妳快啲上馬啦」

唔知點解，無埋兩個豆丁喺度，同嘉澄玩旋轉木馬真係好夢幻。

「影左幾十張喇，夠po到妳三十歲」
「幾十張點夠，我今年十八歲」
「咩話，四十八歲？」
「食屎啦雷諾曦」

嘉澄喺移動緊嘅旋轉木馬度作勢想過黎打我。

「哇妳小心仆街喎」
「咁曳，唔可以講粗口啊」嘉澄老師上身
「Miss對唔住，請從輕發落」
「太安樓放題，你嘅」

我同嘉澄穿過等煙花嘅人群離開迪士尼。

「煙花，留返下次再睇啦」
如果，有下次嘅話。

太安樓入面，有一個外表斯文可愛嘅女仔，左手車輪餅，右手雞蛋仔，然後仲有我，左手章魚燒，右手魚蛋佬，不得了不得了。

「佩服佩服，女中豪傑，可以食咁多都唔肥」
「當然啦，本人縱橫食壇多年，不論係歐洲定係亞洲，美食都已經在我口中」
「在下小西灣鯨吞王子，妳係？」
「小妹係沙頭角食物焚化爐，多多指教」

兩個白卡，俾人望到實一實。

「快啲食嘢啦焚化爐，我地俾人笑喇」我都忍唔住笑
「鯨吞王子，聽聞你都食得幾慢喎」
「我幫妳攞住晒啲嘢點食啊？」
「又係喎，hehe」

咁都有得笑…

掃完街，梗係返屋企啦，阿爸阿媽已經返左屋企。我有問過嘉澄幾時返去，佢話過幾日阿爸阿媽返就返屋企，唉…

嘉澄因為第二朝早返工所以十點幾就訓左，而我第二日放假所以喺廳煲多陣劇先訓。不過，我收到個message，一個好耐無見過嘅聯絡人。

「我有啲嘢想同你講，老地方等。」

我掙扎咗一陣，最後都係攝手攝腳咁入房攞銀包電話出去。

所謂老地方，其實就係銅鑼灣避風塘，我去到嗰陣佢已經到左。

「黃曉盈…」我忍唔住出聲
「多謝你，嗰日送我返屋企。」
「小問題啫，妳叫我出黎唔係淨係想講呢啲掛？」呢一刻，我淨係想速戰速決，因為拖得越耐俾人誤會嘅機會就越大。

「如果我當時，無講到分手，我地依家會點？」嘉澄望住海問
「我地分手都唔係一朝一夕嘅事，係咪？」我答

「五年前，第一次喺朋友gathering見到妳，五年前，第一次同妳去迪士尼；四年前，第一次同妳去台灣…」
「三年前，我地兩個第一次去歐洲，三年前，第一次因為對方喊，兩年前，第一次唔係同你睇戲，一年前…」
「一年前，平安夜我地各自過，半年前，我地分左手。」

講完一大輪，我同佢又靜落黎。

「如果我同你分手係五年前處心積累嘅結局，咁你當初仲會唔會表白？」
「會，因為妳係黃曉盈。」
「咁如果調轉，我依家同你表白，我地仲有無可能？」

呢一刻，我猶豫了。

「我答唔到。」
「咁，今次等我再追返你」

曉盈輕輕將我擁入懷抱，呢個感覺既溫暖又陌生。呢半年，我已經好努力去忘記佢，途中有馬嘉澄出現，我承認會動心，不過未係時候重新接受一段戀情。療傷之際，黃曉盈又返黎同我坦白。

我好煩，真係好煩，感情再一次戰勝我理智。我好驚到最後黃曉盈會離我而去，馬嘉澄會對我失望，我做唔出對黃曉盈決斷，同時做唔出令馬嘉澄失望。

我送曉盈上地鐵後，一個人喺海旁繼續吹風。感情真係你沉我沉大家沉，無錯對但係要有被批判的準備。黃曉盈同我經歷過成長，理應係soulmate，但馬嘉澄喺我低谷拉左我一把，我對自己都有重新認識。

帶住呢個解不開的心結，我返屋企了。

第二朝，唔知點解嘉澄成朝嬲爆爆咁，做乜都兵兵乓乓，老豆見唔對路，叫我車佢返工。

「不如我車妳返工啦」我話
「唔使喇，尋晚出去咁夜休息下啦」嘉澄話中帶刺咁講
「我尋晚出去買嘢咋喎…」
「買嘢會買到凌晨點幾？買咩啊，定見其他人啊？」

仆街，馬嘉澄點解乜都知。

「呢度返新界遠啊，點都好俾我車妳啦」
「唔使喇，我坐巴士不知幾好」

嘉澄帶住佢份倔強自己落樓，但係佢似乎唔記得呢度係小西灣。

「車妳啦，唔好嬲喇，最多我同妳講尋晚咩事」
「我係因為就遲到先坐你車，唔會有下次㗎」得喇得喇到依家仲死要面

「咁究竟尋晚咩事？」
「我尋晚去咗…阿龍屋企咋嘛」
「吓？去阿龍度要咁鬼鬼祟祟？」
「阿龍同Jasmine吵大鑊，我過去陪佢飲悶酒」

我始終唔夠膽同佢講真話，不過眼下嘉澄無追問，喺車上面補眠。

「不如今日Lunch一齊食？」我收到曉盈嘅message

「邊個咁早WhatsApp你啊？」嘉澄俾鈴聲嘈醒
「無…無啊，客咋嘛」
「邊有客咁早起身啊？神神化化咁，到喇，今晚再講。」
「拜拜」

終於送嘉澄到學校了，感覺好似送老婆返工咁。

「好啊，老地方等。」