我喺迪士尼識咗個女仔: 6

其實我只不過住左一晚，第二日強哥就黎接我出院。

「屌你住一晚攞四個蘋果，牛頓咩？」幫我攞袋嘅佢話
「嘉澄攞黎㗎，人地一片好心啫。」
「屌，唔係你攞梗係口響響，不過佢會黎都幾驚訝，同佢好熟咩？」強哥問
「本身唔係嘅，不過前排去迪士尼做幼稚園job估唔到係佢教嗰間。」
「真係冥冥中自有主宰，去馬啦。」

然後全程車強哥都係不停灌輸叫我去馬嘅信息。





「屌唔係返屋企咩？」
「見你咁精神咪叫埋你打牌，三缺一啊。」
「今日星期三喎，屌…」

上到樓已經見到阿嫂同阿龍喺度。

「屌快少少啦，差你一個，三番起糊，每番一舊。」阿龍話
「痴撚線…」最後我輸左五舊水

打完牌已經六點幾，佢地諗緊去邊度食飯嗰陣我碌陣IG，發現嘉澄po story話「人在新蒲崗無人陪食飯」，即刻覆佢。





「咁慘嘅無飯食？」
「係啊我屋企今晚無人煮飯🥺」
「同我食？」

我send出去後先發現呢個語氣好似有少少問題。

「淨係我同你？」
「同埋師姐佢地」
「好啊，你地定好地方同我講😆」





我即刻同強哥講嘉澄都食飯，跟住阿龍又叫埋佢女朋友一齊，組成呢個世紀飯局：強氏夫婦、龍氏情侶、我同嘉澄。

「師姐～好耐無見喇！」嘉澄一見到阿嫂就撲埋去
「Hi，我係阿龍女朋友Jasmine…」嗰頭聚舊，呢頭就第一次帶女朋友見我地

唔夠三分鐘，班女仔已經混熟晒，男仔就自己傾自己嘢。

「唉，養車真係好貴。」富哥開左頭，今日嘅主題係車
「係咁㗎啦，學我坐的士咪仲好。」我話
「屌，咁第時我老婆有左點算…」

我同阿龍都咳左一下。

「係…我地呢排開始無用dom」富哥話




「喔…我地就快做契爸喇，有細路撚了」
「我都想講…我準備買樓。」阿龍講完，呢單野仲爆
「Wtf完全無聽你講過嘅？幾時嘅事啊？」
「最近睇啱左喺深井嗰度，近Jasmine返工」阿龍把弄住玻璃杯講
「大壓力喎，嗰陣我啱啱買樓都計左好耐。」強哥話
「還好啦，首期我同Jasmine一齊儲，依家都夠嘅」

望住一班出生入死嘅兄弟成家立室，既感動又忐忑。一方面為青春乾杯，畢竟大家都長大了；另一方面，我都差唔多三十，女又無樓又無，少不免迷惘。

食完飯，阿龍送Jasmine返荃灣屋企，強氏夫婦返香閨造人，得返我同嘉澄。

「行啦，又係我送妳返去㗎啦。」漸漸地，嘉澄都唔再抗拒我嘅自告奮勇

上左巴士，我同嘉澄本身諗住聽歌，點知佢又問題兒童上身。





「你覺得Jasmine點啊？」呢啲問題好危險喎
「吓？都幾好啊…談吐都幾貼地吖」我都唔知點答好
「你鍾意佢嗰type？」呢啲靈魂拷問點答啊…
「咁又唔係嘅…我覺得佢唔夠可愛…即係無嗰種傻氣，同埋比較靜囉。喂，點解無啦啦講人地女朋友㗎？」我問返佢
「咩啊…問吓啫，聽歌啦。」

旺角返上水，先係百年樹木，然後櫻花樹下，跟住俏郎君、只是太愛你，全部都係張敬軒嘅？

「有無其他歌手啊？全部都係張敬軒喎…」
「我係鍾意張敬軒㗎喇，唔鍾意自己聽囉～」
「咁我又無話唔鍾意…」聽聽下嘉澄咪都係訓著

十點幾，我送嘉澄送到返禁區前，然後坐車返屋企。

「返黎喇～」下意識叫左句，發現自己唔記得老豆老母去左旅行，笑咗





平時夜晚無人，我會叫曉盈去我屋企…煮飯仔(咁你地諗嗰啲嘢都有做嘅)，兩個人玩下玩下啲時間好快過，不過依家無呢隻歌仔唱了。

呢一刻，我對同曉盈嘅感情係惋惜多過悲傷，係咪差唔多走出陰霾？

強哥造人，阿龍又準備買樓，好似得我無乜目標咁，心入面有啲空虛寂寞冷的感覺，去雪櫃攞罐藍妹啤啤佢先。

「喂邊個打黎？」無啦啦有電話入
「咁你都唔知？在下馬嘉澄小朋友。」耳邊一把刺耳嘅聲音傳出
「咁夜都唔訓覺，又食宵夜？」我問
「俾你睇下囉，食蘋果咋。」佢轉左去FaceTime
「妳仲好講，四個蘋果我點食得晒…」
「依家食囉。」

結果我同佢FaceTime食蘋果。呢種戇鳩但係可愛嘅感覺應該淨係喺曉盈身上試過，搞到我意亂情迷，好亂好亂…





「喂，你ex叫曉盈？」
「喂？」失晒魂嘅我完全聽唔到佢講嘢
「哦…係啊，妳又知嘅？」
「屌，你嗰日訓醒叫錯我個名啊，係咁曉盈曉盈。」
「對唔住囉…真係分唔到。」我話，因為佢地個樣真係有啲似
「唉都唔知係咪處心積慮想搵我扮，講明先啊，唔包錫㗎。」
「屌依家ptgf咩，我先唔係啲咁嘅人…」

呢晚FaceTime到一點幾我就訓左，完全意識唔到下星期其實就係冬至，見嫲嫲嘅日子。

我：「仆街原來後日就係冬至」
強哥：「曦哥終需見家翁🥜」
阿龍：「你無同嘉澄講咩？」
我：「我自己都唔記得…🤦🏻‍♂️」
強哥：「你快啲問啦，可能人地都約左屋企人食飯」

富哥所言甚是，所以我即刻打俾馬嘉澄。

「啱啱放工就打黎，又有咩要本小姐幫手啊？」
「我唔記得同妳講，後日食飯…妳得唔得閒？」

呢一刻，我祈禱佢一定無約屋企人食飯。

「可以啊，我屋企今晚做節，到時你接我去？」
「無問題，妳send幼稚園地址俾我啦」

謝天謝地謝嘉澄。喺父母再三叮囑下，我同嘉澄講唔使太緊張，自然啲就可以。點知最緊張嗰個係我，一來係第一次帶曉盈見嫲嫲，二來今次係扮唔係真。

「哇！做乜個人好似做賊咁嘅？」啱啱走出幼稚園嘅嘉澄問
「好緊張嘛…又係第一次又係做戲」我手心已經出曬汗
「咁你當我同妳唔係做戲咪得囉，行啦男朋友，抹下啲手汗先拖我」嘉澄一臉輕鬆

臨到嫲嫲屋企樓下，嘉澄係都話要去商場買啲嘢。

「妳嫲嫲鍾意乜啊？」嘉澄認真咁望住貨架問我
「無所謂啦，都係生果海味嗰啲大路嘢」
「咁我求其買㗎喇」嘉澄買左個$400嘅果籃，我俾錢…

真係撳門鐘之前，嘉澄再攔住我。

「點啊馬嘉澄…」
「你半踎先，我唔夠高」
「吓？」
「你頭髮亂左啊，幫你撥返好佢」

嘉澄臉龐同我臉龐只有一個硬幣嘅距離，我忍唔住望住佢，佢真係有種魔力吸引住我嘅思緒，同曉盈一樣。

「仲望，入去啦！」

深呼吸，入戲，見家長飯局，我來了。

「嫲嫲～冬至快樂，身體健康！」
「乖喇曦仔，呢位係？」
「嫲嫲你好，我係阿曦個女朋友，我叫嘉澄啊」嘉澄個笑容真係可以融化人心，氹到嫲嫲幾開心

轉個頭，老豆老母就圍住嘉澄問佢嘢，本身諗住解圍，點知同上次迪士尼一樣，嘉澄自己拆彈仲勁過我。唔止添啊，嘉澄仲要同我幾歲嘅堂弟傾得埋，根本就係氣氛組黎。

「嘉澄食多啲餸吖～」
「嘉澄食唔食雞啊？」
「嘉澄添湯嘛？」

成餐飯好似嘉澄先係佢地個女，我係執返黎嘅。

終於等到班親戚食飽打牌，我同嘉澄可以耳根清靜一陣。

「你屋企都幾熱鬧喎。」嘉澄話
「妳喺度先係咁咋，頭先佢地當晒妳係女咁，今次真係多謝妳幫手做呢場戲。」我話
「咩做戲啊，今晚12點前我都係你女朋友囉。」嘉澄話

好好好，最好妳一直都係我女朋友，但係我做唔到。

「仔、嘉澄，點啊今晚會唔會太嘈啊？」我老豆呢個時候問
「唔會啊，我覺得幾熱鬧幾好喎，況且第一次見到嫲嫲。」嘉澄真係好識講嘢
「咁就好喇，不過班長輩打牌一定打到好夜㗎，不如妳同阿曦出去行下啦」我老豆係咁對我打眼色
「啊係囉，呢度周圍都幾多野睇㗎。」我附和
「咁好啦，等我去個廁所先。」嘉澄行開左

「喂掂喎，呢個女仔幾錢一個鐘啊？」
「屌你老豆，我朋友黎㗎…」
「真係？溝得過喎，同當年曉盈差唔多」
「又唔可以咁比較嘅…」認真講，曉盈係初戀地位已經上左神檯
「唔知你喇，總之唔好無啦啦搞個孫出黎。俾條車匙你出去同嘉澄兜個圈啦」

我同嘉澄落樓之後真係周圍行，但係周圍乜都無。大佬，秀茂坪夜晚可以有咩睇…

「不如出去兜個圈？」我問
「你有車咩？」
「老豆有，我有鑰匙。」

秀茂坪出發，搵一個可以傾到計又有景睇嘅地方，我淨係諗到飛鵝山。

「哇西貢，你想溶左我啊？」
「邊度有，帶妳去睇風景咋」好彩我手車都算好無失禮自己，二十分鐘就到飛鵝山。

出於我所料，飛鵝山冬至都係咁撚多車。

「啲人唔使做冬㗎咩…」我心感不妙
「咁睇風景又有咩問題？」嘉澄問
「無問題…梗係無問題」太純真了

兩個人鳩揈揈咁企喺度，嘉澄包到成隻粽咁，時不時搓吓兩隻冰冷嘅手。

「凍啊？咁不如返去啦」我話
「睇多陣先啦，睇下啲萬家燈火，好璀璨」果然女人都是喜歡美麗的風景線

我回頭，見到泊喺我地隔離部車避震好似有啲問題，睇怕無一時三刻都唔可以離開。

「係呢，講下你同你ex啲嘢吖～」嘉澄話
「吓，都講到三幅被啦，上次咪喺機鐵站講過」
「你地點識㗎？」
「嗰陣去迪士尼玩，但係同富哥佢地失散左，然後咪自己玩嗰陣見到佢，傾左兩句睇埋煙花先分開。我地互相發現對方興趣差唔多，我膽粗粗約人去迪士尼得左，跟住咪順理成章一齊。」
「我仲以為有啲咩特別事添」

我地又將目光放返去眼前風景。

「咁妳呢？妳有無試過拍拖？」我試探咁問，因為根據情報佢係男性絕緣體
「一次咋，仲要係中學個陣，都唔知算唔算拍拖。」
「嗰陣有個男仔話鍾意我同我表白，情竇初開咪應承左，點知唔夠一個禮拜佢就話性格不合要分手，放學見到佢拖住隔離班個校花走」
「咁佢都幾仆街喎。」
「係㗎，所以我好驚主動再識男仔。」咁我咪好特殊？
「不過，依家都幾好吖，一個人生活無拘無束」

我又望返去隔離車，痴撚線半個鐘仲未屌完。

「都夜喇，不如落山啦。」嘉澄一路講一路行過去
「啊！不如我兜出黎上啦」
「唔使啦，咁近。」

結果，行到埋車就聽到隔離嬌喘嘅聲音。嘉澄先係疑惑，然後紅都面晒。

「妳知點解我叫妳唔好上車住先啦～」我忍唔住笑
「唔好諗到我咁純啦，我都有DIY㗎」
「哇，轉話題咁快我接受唔到咁多信息喎」
「講真話又唔得，男人真係煩」
「咁妳繼續講妳平時點DIY囉哈哈哈哈」我忍唔到笑
「屌你啦，平時唔講粗口都俾你逼返晒出黎」

車到落山腳，老豆老母話佢地自己返左屋企，叫我送嘉澄返去。

「鑽石山地鐵站放低我就得喇。」
「我老豆話要車埋妳返去啊」

又一程大長途，我照常random播歌，點知今日不停係張敬軒。

「咁多張敬軒嘅？」嘉澄問
「random咋，唔關我事」
「睇過，哇playlist咁多張敬軒仲唔係fans？」而事實上，我又真係唔算fans
「都係好聽咪加落去，KPop嗰啲都有㗎」
「都好，起碼係張敬軒。」

今次係第一次有女仔坐我車，連曉盈都無試過。

「點解你揸車都可以出汗嘅？」
「冷氣唔夠嘛，呢部車舊」我作個藉口
「吓，22度喇喎，你緊張啊？」
「無…無啊，邊度有」

就喺呢一刻，我出錯路口去左馬鞍山…

「仲話唔係緊張，路都行錯。」
「少去呢頭啫，前面都可以落返吐露港啦」

最後將嘉澄安全送到禁區前。

「我落車喇，都唔知點解你咁鬼緊張」
「第一次單獨車女仔…」
「即係我幫你破處喎，真係榮幸」
「可唔可以用一個好少少嘅詞語…」
「求其啦，我走喇，拜拜」

距離禁區仲有兩百米距離，望住嘉澄遠去嘅背影，我追前。

「做乜唔走啊？」
「同妳行埋去閘口啦，唔爭在。」
「哦。」

呢兩百米，好似行左兩公里咁。

「今日…多謝妳，嫲嫲好開心，多謝妳。」
「傻啦，咁friend幫手有乜所謂，況且之前你都幫過我一次啦」
「係…妳戴好條圍巾啦，呢度凍。」
「唔使啦，都習慣，就快到屋企喇，晚安。」
「晚安。」

我準備轉頭走嗰陣，嘉澄突然衝前嘴對嘴咁吻落我度。

「晚安，男朋友。」

我望望手錶，十一點五十九分。