我喺迪士尼識咗個女仔: 5

五分鐘，部的士駛出禁區，我上返車。

「先生原來你送女朋友返屋企啊？無禁區紙咩？」司機問
「er…我唔係佢男朋友，普通朋友咋。」我答
「點睇都唔似喎，你落車後佢係咁望住後面喎，仲叫我一定一定要送你出地鐵站。」
「係咩…佢傻啫。」

我諗起緣路山旮旯入面阿厚猶豫申請禁區紙嗰度。

「佢傻係因為你傻咋。山長水遠，佢仲同我講你住小西灣叫我車你返去打八折，但係我綠的愛莫能助。呢啲女仔真係要珍惜。」司機繼續講




「係…係咩？」

諗返起以前送曉盈返屋企，無論幾夜返佢都唔會要求坐的士，寧願同我搖巴士或者行路返屋企。

「咁大洗點娶我啊？」佢成日話
「好好好，聽女朋友話。」

宜家，嘉澄係唔會為我銀包著想，但係佢會為我著想。

「靚仔到喇，可以落車喇。」司機話




「我未俾錢喎。」
「頭先你女朋友臨落車俾左齊頭二百五，呢度錶顯示二百五十四，我收二百五得喇。」
「哦…」

落車打開電話，見到嘉澄嘅信息。

「今日你都辛苦喇( ^ω^ )幫班細路仔影相
又陪我玩左成個下午 仲要送我返屋企
請你坐返的士出去啦😼 早啲休息！」00:30
「收到妳🫡 等緊N車出去」我影左張無車嘅自拍 00:35




「呢個角度好似我老豆啲自拍🤣」00:35
「唔係掛…妳早啲訓啦，好夜了😵‍💫」00:36
「咁你呢？😿」00:36
「仲有20分鐘就有車，兩點前應該返到屋企🥹」00:38

佢已讀我信息，然後打電話俾我。

「點啊馬嘉澄，仲唔訓覺？」
「訓㗎喇，敷緊mask」
「咁chill，可憐我一個人等巴士過海」
「咁下次唔好送我囉，我又無要求過」
「咁又唔好，係我問題」
「當然」

上左巴士我就訓死左，起身已經過左紅隧，一點半。灣仔落車，好彩地即刻有車轉，兩點終於返到屋企。





返到屋企，老豆原來睇緊波仲未訓。

「咁夜返嘅，做賊啊？」
「今日出job多野搞咪遲左返。」
「阿媽話下星期搵曉盈過黎做冬喎。」
「吓…我問吓啦，佢未必得閒。」我一時之間唔知點答

入到房，我潛意識抬頭見到我同曉盈三週年嗰陣去迪士尼嘅合照。

「又有邊個估到，我地會走唔到最後？」我心諗

這戀愛遺物終需棄置。

之後嗰幾日，我都係返公司執吓相咁，渾渾噩噩咁又冬至。





「今日早放喎，爽。」富哥話
「咪都係Lonely Christmas…」我話
「屌，你有Catherine嘛」
「咪玩啦我同佢清白㗎…」
「係係係你最清白，走先」

我留多陣就返屋企，一早同老母講左曉盈唔得閒。

「返黎喇～」
「咁遲嘅今日？」老母問
「塞車嘛。」
「曉盈真係唔得閒？」老豆問
「咁人地做護士好忙㗎嘛…」
「講真話啦。」老母話





我將分手成件事和盤托出。

「我地分左手。」
「咁有無嘢啊？」老母問
「我ok啊…和平分手」
「我話曉盈啊，都唔知你地點搞嘅。人地一個好女仔無啦啦分手。」
「咁相處越耐一定越多問題，只係睇下解唔解決到。」我解釋
「問題唔係你地分手，係我同左嫲嫲講佢八十大壽你會帶女朋友俾佢睇…」老豆出聲

嫲嫲期待左好耐見曉盈，如果依家話分手佢肯定爆血管都似。

「本身你地後生仔離離合合無問題，但係下次早少少講啦。」老豆講
「得啦…我諗諗佢，仲有兩個星期。」我苦笑





我即刻搵三劍俠求救，與其話係求救不如話係放鬆下自己。

強哥：「咁大鑊？你嫲嫲幾好記性我地都知…好難呃喎」
阿龍：「搵ptgf？」
曦：「屌唔要啊」
強哥：「咁你有咩辦法，你唔帶女仔你嫲嫲鏟死你都似😅」
曦：「所以咪問你地…」
阿龍：「咦，馬嘉澄咪得囉🤔」
強哥：「係喎，搞撚掂」
曦：「唔好又打搞人啦…」
強哥：「你嫲嫲爆血管定欠馬嘉澄人情你自己諗」

最後我都係硬住頭皮約左嘉澄出黎食餐飯再講呢個請求。

「點啊，無啦啦咁好死請我食飯，又有咩要我幫？」眼前嘅嘉澄食住雲吞麵問我
「嗰啲嘢後話啦，妳有無乜想做㗎？今日全日我都得閒喎。」
「肯定有古怪，不過我恭敬不如從命。」

食完lunch，我俾嘉澄拉左去睇戲。

望住睇卡通片睇到同班細路一樣大笑嘅嘉澄，我都不禁俾佢感染左。

「真係咁好笑咩？」我問
「都幾㗎，你唔明㗎喇。」佢望住個screen話

你以為睇完戲就完，非也。嘉澄拉左我去一田買左兩大袋嘢，仲要有好多貴嘢。

「又燕窩又花菇，妳都啱㗎咩呢啲嘢？」我問
「咪八卦啦，再八卦叫你再買埋iPad。」無錯，頭先啲名貴藥材都係我埋單

又行左兩個鐘，望吓隻錶已經六點幾，咪問下嘉澄去邊度食飯，順便提出我的請求。

「點啊小姐，今晚想食乜？」我問
「我揀左地方喇，你跟我去就得。」佢一路行去的士站
「又水我去邊度啊…」雖然走過沙頭角和小西灣的距離，但係面對眼前呢個迷一樣嘅女仔真係哭笑不得
「司機唔該新田圍邨。」

吓，屋邨有咩好食啊？

「撳鐘啦！」轉眼間我俾人帶左去一個單位嘅門口
「嚟緊喇～咦，你係？」開門嘅係個中年女人
「媽！佢係我男朋友阿曦啊。」嘉澄用手掙撞我

屌，想搵人救駕嗰陣反而幫左人救駕。

「婆婆～睇下呢個男仔，佢係阿曦啊，我男朋友！佢仲專登買左啲補品俾妳啊」
「婆婆你好啊，我係阿曦，嘉澄男朋友，呢度係我小小心意。」我遞上我嘅禮物
「哎唷好啊好啊，我地澄澄終於有男朋友喇。」婆婆好開心咁講
「幫手開飯喇，食住講！」嘉澄阿媽話

不得不說，嘉澄媽媽煮飯真係有一手。

「妳個衰女有男朋友都唔同我地講。」嘉澄阿媽話
「一陣我有你地又會緊張大師上身㗎啦。」嘉澄話
「阿曦食多啲啊，唔夠仲有飯。」婆婆不停夾菜俾我，差啲食唔到飯

成餐飯無見家長嘅緊張，反而似屋企人食飯。

「阿曦飲兩杯吖。」全程沉默嘅嘉澄爸爸出聲
「哦…好啊uncle」

嘉澄望住我，暗暗俾左個加油手勢。

「你鍾意我個女啲咩啊？」
「我鍾意佢…鍾意佢夠傻。佢可以為少少嘢笑一餐，又好有童真。至於佢個樣，咁就梗係靚啦。」

成個單位靜左5秒。老實講，仲驚過我第一次見工。

「辛苦你喇。」無啦啦佢老豆爆左呢句
「吓？」
「我個女咁惡頂你都可以讚到天花龍鳳咁，我真係放心，你一定係真愛。唔好令我失望啊準女婿。」

嘉澄一家人都幾可愛。臨走前，佢地話今晚喺度訓，叫嘉澄送我去地鐵站。

「妳屋企人都幾可愛。」我話
「都係㗎，我老豆有無嚇親你啊？」
「咁又無，不過妳婆婆封利是俾返妳啦，始終我又唔係真係妳男朋友。」

唔知點解，講完呢句氣氛開始有啲奇怪。

「係呢，你係咪有求於我㗎？」
「其實我想妳扮我女朋友，同妳情況一樣。」我話
「考慮吓啦，如果你請我食飯都有得諗嘅。」
「咁鍾意食嘅妳…」我好無奈
「講下笑咋，俾個日期我，我睇下得唔得閒啦。」

兩個人行吓行吓，竟然行左去沙田市中心。

「我地唔係去緊地鐵站咩，點解過河…」嘉澄話
「我點知妳，我跟住妳咋。」
「咁你上車啦，到屋企WhatsApp我。」
「嗯…我走喇。」今次終於係嘉澄送我
「頭先你講嗰封利是…都係你keep住先啦」嘉澄俾返婆婆俾我封利是我
「唔好啦，唔係太好喎。」
「或者有一日你真係可以收到呢封利是呢…」
「妳講乜啊，好啦咁我多謝妳婆婆喇，走喇。」

其實我又點會聽唔明，只係唔想聽得明。太快了，相處左短短幾日發現嘉澄同曉盈真係好似，超級似，根本分唔到係我真係對佢有feel定抑或我將對曉盈嘅感情投射左落去…

「咁咪試左先囉，感情無分對錯。」強哥話
「我驚糟蹋左個女仔咋…」
「向前望啦…你同曉盈已經分左手㗎喇。」阿龍補充
「得啦，盡量俾自己唔好諗咁多呢啲…」
「飲啦屌你～」

解唔到心結嘅我搵左班契弟出黎啤啤佢，其實同佢地傾一定解唔到，只不過求快慰。一杯落肚，叫做麻木自己思緒，放鬆自己。

渾渾噩噩又半年，同嘉澄又friend左，一個月都食一次飯，令到我開始有少少錯覺。不過好彩十二月終於到，亦都係我最忙嘅日子。job接job，除左係公司生意好，同樣係我想用工作麻醉自己。

「哇曦哥你個schedule咁密嘅？」富哥見到我檯頭全紅嘅日曆問
「搵多啲錢嘛，同埋都唔係好多job咋，有啲同你地一齊出㗎。」我一路執相一路講
「痴線你連星期日都出去做嘢？」肥波問
「咁我星期日都係一個人，不如出去搵錢啦」我話
「咁你星期日做乜？」富哥問
「兼職的士佬囉，順便如果有人約星期日影相都可以方便嘛」我話
「咁你小心啲喇…」

起初頭2個星期都還好，習慣左食無定時同日曬雨淋，無論係學校團體照、公司個人形象照、家庭照我都有做，仲未計星期日的士錢同出面啲單，真係日日訓5個鐘都無。後來習慣左，肚餓食個麵包繼續開工，放工有時索性喺公司訓。

結果咪出事。連續幾晚通頂嘅我又食唔夠嘢，結果喺公司暈低左。到我醒返嗰陣，淨係聽到周圍好多器材嘅聲響，先發現自己入左廠。

睡眼惺忪之間，我見到一個女仔伏喺病床旁，無論係打扮定身形都好似曉盈。

「曉盈…」我不禁輕輕叫喚
「你…你終於醒喇？嚇死我喇…」我先發現原來係嘉澄
「喔…點解係妳黎嘅？」我好驚訝，嘉澄會出現打點我呢個虧佬
「你屋企人去左旅行喎，跟住佢地聯絡唔到，輾轉之間師姐搵到我而我又得閒」
「哦，唔該晒…阻到妳唔好意思。」

醫生入左黎，都係叫我準時食飯唔好過勞嗰啲廢話，然後又走了。畢竟醫院都算係多菌嘅地方，嘉澄又成日要接觸小朋友，我諗住開口叫佢走，點知佢攞左盒飯出黎食。

「妳走啦，我無乜事自己搞得掂，況且呢度咁多菌一陣有乜事就唔好啦」我話
「咁都等我食埋先啦，定你睇唔過眼我無買你嗰份？哎呀三哥呢啲嘢太油，我仲要食辣，唔適合病人」
「晚餐。」呢個時候護士放低一份黯淡無光嘅晚餐，真係睇見都唔開胃。

嘉澄喺隔離幸災樂禍。

「唉得喇，知妳有三哥食好開心。」我無奈
「講笑咋，清湯過橋俾你。」

唔知點解，我有啲開心，好耐無人試過咁樣關心我。

「多謝妳碗米線喎，飽晒。」我話
「你又爭我多一個人情㗎喇，嘿嘿」嘉澄講笑咁講
「好啊，慢慢還。」

探病時間夠了，嘉澄走嗰陣放低左幾個蘋果話我可以自己食，搞到我好似長住咁。

「得喇，我聽日都出院點食得晒4個蘋果…」
「一日一蘋果醫生遠離我無聽過？你一日食四個隨時可以做埋醫生。」嘉澄話
「好好笑喎馬嘉澄…」
「喲，無叫錯我曉盈喇咩？」估唔到佢聽到
「呃…sorry囉，真係無心，啱啱醒睇唔清楚」

嘉澄行到病房門前，然後回眸一笑。

「我似咁小氣咩，走喇。」