我喺迪士尼識咗個女仔: 7
呢一吻足足夠我回味成個車程，我可以肯定，我已經沉左嘉澄船。但係我擔心嘅係我當左佢係曉盈，而非馬嘉澄，我唔想傷害一個無辜嘅女仔。
「我地依家播出K先生嘅點歌。佢想送以下呢首歌俾A小姐。A小姐，你好嗎？自從嗰次我同你講有女仔同我表白我接受左，令到我地之間嘅空隙越黎越大，我地已經兩個月無FaceTime傾計喇，妳最近仲有無偷偷地食凍嘢？曾經我以為我地之間嘅友情可以天長地久，但係原來有啲嘢做左就返唔到轉頭。直到今日，個女仔同我講佢只係逢場作愛攝時間，我終於明當日妳同我講，或者最愛嘅就喺身邊我會後悔少左一個好知己，一個喺我心目中嘅最佳女朋友。我唔知挽唔挽救到，亦都唔知妳會唔會原諒我。不過，我嚟緊下年四月就會去澳洲喇，無論如何，好多謝你出現喺我青春入面，希望妳可以搵到妳愛的人，K先生上。」
「或者好多聽眾朋友都唔明，K先生最初同另一個女仔分手後搵A小姐吐苦水。我相信K先生或多或少都對A小姐有好感，不過到最後無疾而終，因為有另一個女仔主動表白，結果A小姐黯然離場。一場戀愛注定有主角配角，主角當然係情侶啦，配角咪就係失敗嘅人。唔係，佢地先係最成功，受傷越多，對愛情會更加成熟，但同時會更加對愛情卻步。希望K先生同A小姐生活愉快，各自找到對的人。為大家送上今晚最後一首歌，漂流教室…」
電台播出一個點歌節目，正中我心所想。我依家嘅處境同K先生有咩分別，都係分手後同另一個女仔曖昧，但我好驚會傷害到曉盈…
其實我係咪一個壞左嘅人，先會分手後即刻對另一個女仔心動，定抑或一直以來我對嘉澄嘅感覺都係建立喺佢似曉盈身上？
越諗越唔明，越諗越糾結。
「你呢個問題好撚複雜喎，我勸你唔好諗咁多，好似我咁，食得就食先。」呢句出自火速同嘉澄同事一齊嘅富哥，睇黎佢仲未知人地想結婚
「我都想，但可以點做。依家昇華好似未有一個觸發點」
「攞出你看家本領迪士尼囉，平安夜約人去迪士尼玩返日」富哥輕描淡寫咁講
「講就簡單，到時咪又係deadair」
「都幾簡單㗎，你又有白金卡，佢又有」
「唉得喇得喇做埋嘢先啦」
終於到平安夜，其實我要返工，所以約唔到去迪士尼。本身諗住早收工返屋企訓覺，點知啱啱走處studio已經見到馬嘉澄。
「點解你知道我喺呢度返工嘅？」
「師姐同我講㗎，行啦去食飯」
「你有無諗過我想唔想…」
我返九龍東，所以順理成章地嘉澄帶左我去黃埔。
「冒險樂園啊！」嘉澄話
「仲玩呢啲細路嘢…」
「玩啦玩啦～」嘉澄撒嬌個樣真係頂唔順
「唉好啦好啦，換代幣啦」
望住眼前蹦蹦跳跳嘅嘉澄，佢喺我腦海入面又同曉盈分返開了，因為曉盈從來都唔會玩呢啲倒錢落海嘅遊戲，反而時時刻刻都為未來著想。如果要一句概括，同曉盈一齊係細水長流過日子，同嘉澄一齊係享受拍拖談戀愛。
傻啦，嘉澄都唔係我女朋友住。
「陪我玩呢個啦～」嘉澄指住籃球機話
「妳得唔得啊？」我質疑
「我梗係得啦，搵你陪我咋」
結果呢個傻妹不停唔入靠我carry。
「喂快啲啦，射唔切啊」
「你又話好勁，等我黎啦」我話
我企後兩步，諗住展示我三分波嘅技術。頂，唔入。
「哈哈哈哈笑死我喇哈哈哈哈」
「使唔使咁誇張啊，又唔係唔中框」
「連隔離個小朋友都笑你喇」
「係喇係喇我柒晒得未」
跟住嘉澄話要夾公仔、擲彩虹、推銀仔，最後玩嗰個超級氣墊球。
「要四個人玩喎…」我話
「你見唔見到遠處有個男仔同女仔啊？叫佢地一齊玩啦」嘉澄雀躍咁講
「咪玩啦，又唔識佢，仲要都唔知個女仔肯唔肯」
「妖，好明顯個男仔鍾意個女仔啦，你睇下佢望住女仔個眼神有光㗎」
「唉係喇係喇，我試下問人地啦」
結果，意外地個女仔一口應承，一問先知原來兩個人都係中學生，平安夜女仔肯同男仔出街應該有啲嘢啦，男仔就死都話唔係拍拖，真係青澀。
「喂痴線點解咁多飛碟嘅？」
「妳唔知咩，呢部嘢最好玩就係中間會無啦啦出好多飛碟㗎」我大聲講
「係咩，咁我要出盡全力先得喇」
說到尾，我都係睇嘉澄嘅興奮，輸定贏又有乜所謂。到最後，又真係我地輸喎…
「Yeah～贏左喇！」對面個女仔竟然開心到同個男仔擁抱
「都係多謝對面嗰pair情侶讓我地咋。」
「客咩氣啊，平安夜最緊要大家玩得開心，我地走喇，你地…唔好玩咁夜喇」然後嘉澄就拉住我走左
「喂，點解咁快走嘅？」我問
「俾啲時間人地相處下啦，我地已經做左神助攻喇」
「咁又係，無啦啦擁抱喎點都有啲嘢啦」
「真係好啊，我地平安夜成功撮合一對情侶，食返餐好個慶祝先～」
「又唔係妳拍拖，關妳咩事啊」我哭笑不得，因為即係我又要請食飯
嘉澄揀左去食台灣嘢，只不過都係食麵。
「妳都幾鍾意食麵喎」我話
「係㗎，我屋企成個櫃都係麵，去旅行買嘢都係麵」
「咁誇張…旅行都買咁多手信」
我俾曉盈訓練到去旅行可以買好少手信，佢話手信係昆遊客錢，咁其實呢啲錢咪俾人賺，畢竟旅行都應該紀念下。
「吓，你去旅行唔買手信咩？」嘉澄略顯驚訝
「俾Ex訓練到唔買手信都得，用眼睛睇嘅就係最大嘅手信」我盡量輕描淡寫
「對唔住啊…聖誕無啦啦提起你Ex，我請你食飯啦」
「咁我又無乜hard feeling嘅，不過妳餐飯多謝晒」
「食屎啦呃我感情。」
嘉澄追住我係商場打鬧，呢一刻真係好有拍拖嘅感覺，話無心動真係呃人。只不過，有啲人你唔搵佢，佢都會自己搵上門。
食完飯，嘉澄話想睇戲，又睇戲啊，雖說睇戲係唔使諗嘅活動，不過都唔使太密吖… 仲要又睇卡通片。
「套戲好好睇啊，你記唔記得個主角游繩過對面嗰下，真係好勁」
「係啊係啊，食甜品啦好唔好？」其實我完全無留意套戲
「你請又無所謂啊」
最後我地去左鮮芋仙，點知見到頭先同我地玩氣墊球對未係情侶嘅男女share緊一碗冰，含情脈脈咁。
「睇黎我地真係幫到人」我同嘉澄講
入座咁啱我地坐佢隔離，女仔去廁所，氣氛一度尷尬，不過個男仔率先開口多謝我地。
「真係多謝你啊靚仔，唔係你拉我地一齊玩根本無可能進展咁快」個男仔向我投以感激嘅眼神
「咁又唔好咁講，中學生拍下拖不知幾青澀，所以嘢都係對面呢個姐姐諗㗎」我指向嘉澄
「你有呢個姐姐做女朋友就幸福啦～雖然我嗰個一定係最好」
我同嘉澄相視一笑，大家都知道事實，但係大家都唔想戳破眼前呢個男仔對談戀愛嘅期待。
食完後，我一如既往送嘉澄返屋企。
「啊…今日幫到人感覺真係唔錯」嘉澄話
「咁容易滿足真係…」
「啊！」嘉澄無啦啦大叫
「點啊？」點解可以咁傻妹
「我地係咪應該去尖東行下，依家好似無乜節日氣氛」
「吓？我無所謂啊，估你唔到」
行到去尖東，只係見到人頭，少少燈飾都睇唔清楚。
「夠晒節日氣氛啦，人頭湧湧」我話
「唉，住新界真係無呢啲㗎…」
「咁又唔係嘅，你地可以放煙花喎」
「我係唔會做犯法嘢㗎」
入到麼地道開始人頭湧湧，好多人積聚喺帝國中心個路口度影燈飾。
「影唔影啊？難得出城」
「咪串我啦，快啲幫我影相」
「妳真係搵啱人喇」
畢竟我都係攝影師，呢啲嘢簡直駕輕就熟。
「知我咩料啦～」我話
「係喇係喇，過黎一齊影啦」
「哦…」
「企近啲啦，又唔係唔識我」
「企埋啲啦，又唔係唔熟。」
「哦…」我嗰陣好怕醜
「哎呀你揸機喇。」
「一二三，笑！」
「好啊。」我膊頭已經掂到佢膊頭
「一二三～」呢張相真係永世難忘
十二點，周圍響起歡呼聲，聖誕節快樂。
「喂，聖誕節快樂～」我話
「你都係，聖誕節快樂啊！」佢成個人壓落我膊頭
「送份禮物俾妳喇」我攞出一條手鍊
「我自己整㗎，小小心意啦」
「哇～從來都無試過有男仔送禮物俾我，多謝你啊」
嘉澄即刻戴起條手鍊，然後舉高同燈飾合照。佢唔知嘅係，我都整左條一模一樣嘅手鍊俾自己，不過仲未係時候戴上。
喺尖沙嘴食埋甜品，我就送嘉澄返屋企。
「如果攰就訓陣啦，有排都未到」我話
「咁又唔好，同你傾吓計仲好啦」
「話說，你Ex點樣㗎？」
「我個Ex？咪普通女仔一個囉」
「唔係啊，有無相啊？」
「吓？有係有，但係要等價交換囉」
「你俾我睇左先啦」敵不過嘉澄嘅渴求，我都係俾左佢睇
我都估到嘉澄睇完會有比較大嘅反應。
「哇…哇…哇～」
「哇夠未啊…」我好納悶
「都幾靚啊，笑容好甜喎～」
「係啊，仲好顧家，賢良淑德」
「不過呢…你覺唔覺得佢有啲似我？」
靈魂拷問？好彩我識答。
「妳同佢點會似啊，妳成個傻大姐咁，人地不知幾斯文啊」
「即係話我唔斯文啦～食屎啦雷諾曦」佢扭住我隻耳仔
「好痛啊…」
「呢個係痛的覺悟，等你知道你把口唔識講嘢嘅後果」
雖然好痛，但係我好開心，就係咁膚淺。過得耐細水長流，即使每年乜乜紀念日有咩驚喜都好，都唔會敵得過新鮮感。可幸嘅係，我仲有一絲理智，無逾越條界線禍害一個咁好嘅女仔，不過條線越黎越模糊，我真係唔知我自己可以理性多幾耐…