我喺迪士尼識咗個女仔: 4

落左地鐵，我同嘉澄一路行去巴士站。

「你係咪又要送到去禁區口啊？」佢問我
「係啊，費時一陣妳有咩冬瓜豆腐。」我同佢喺巴士站等78K
「你出黎應該無巴士㗎喇喎，你可能要坐小巴。」
「得啦，我識點走。」

當我送完之後我就知中伏。

落左巴士，我企返過對面巴士站，望住頭先部巴士變左暫停載客，然後得我一個傻更更等車，沿路仲要搵部的士都有困難，說好的小巴20分鐘都唔見影。





最後等左25分鐘頂唔順直接call的士，結果加左$20先有人肯接，埋單三百幾。

「到屋企未？🤣」嘉澄WhatsApp我
「啱啱上吐露港🥹」
「唔係坐火車咩？」
「妳部小巴都呃人嘅🥲等咁耐都無車」我覆

我跟住就訓著左了…直到出東隧先醒。





「邊個叫你咁堅持送我🤪」
「妳值得我堅持。」我都唔知點解我會咁樣覆

然後佢已讀了我，日子繼續如常度過。

本身以為呢個女仔只係個過客，拍片係俾人做，睇戲係偶然，點知緣份真係好搞笑。

一個月後…
「喂阿曦，公司接左個幼稚園photo project，俾你跟。」我係做photo嘅，除左拍外景多數做後勤嘢。
「哦。」做幼稚園photo project係一等一苦差，因為多數都係出trip做，好大機會去迪士尼或者海洋公園呢啲暴曬位，仲要周圍走幫人影。





Project嗰日，我同兩個Partner晨咁早就到左幼稚園門口，因為要同幼稚園finalize啲details，見到百幾個學生同埋家長真係頭都痛。

「唉屌呢啲project就搵啲新人做啦。」我partner富哥話
「咪係咯，雖然冬天但係都好曬。」我附和
「聽講呢個job個客出到成萬蚊都要派senior做…」另一個partner肥波話

等到班老師帶住小朋友上旅遊巴，肥波同富哥兩個毒撚即刻望到眼甘甘。做過十幾次幼稚園戶外拍攝，都未見過有幼教好似呢間咁靚，即刻獻殷勤係咁狂撳快門，連啲gear都唔理。可憐我自己一個搬晒上車，仲要佢地上左前一部旅遊巴溝miss，得我一個承受細路們嘅噪音轟炸。

到迪士尼之後，跟rundown喺正門影大合照然後就入場再去埋城堡影第二張大合照。同班細路排位真係好辛苦，佢地又不停走黎走去，有啲又熱到weewa鬼叫，我地三個cam man揹住啲gear著長褲咪仲熱。

富哥同肥波執企位嗰陣我就set機，順手放大睇下佢地口中所講嘅靚女miss咩料。正當想放大嗰陣，富哥就話ready。

「阿曦企好可以影。」
「屌你，差少少就zoom到靚女miss度。」




「屌你好撚熱啊，快少少啦。」肥波無奈

終於用左成個鐘影完兩張團體照，跟住啲相就係靠我地三個cam man喺園內不斷遊走見到就影，聽落好匪夷所思，但班家長出到五位數字以上，再辛苦都要做㗎啦。

「咁我地食飯再見了。」我同富哥講
「難啲，可能我同靚女miss一齊食。」

趁班細路未走遠，梗係影多幾張相打底，尤其行路嗰啲scene。我跟住班細路入小小世界，呢啲慢速遊戲最適合影相，最緊要係啱啱開始班細路仲有mood啲相都靚啲。

咁又hea到lunch，啱啱想行去火箭餐廳又俾富哥同肥波截住。

「又話分開食…」我話
「班miss話要去大街餐廳，你有白金卡嘛，咁唔爭在同我地一齊食啦。」富哥勁誠懇咁講
「咪住，我有白金卡同你地去大街餐廳好似無直接關係。」
「屌你老母咪扮聽寫障礙啦，即係話借你張卡r折咯」肥波補充





最後我俾人夾左去佢地個「飯局」，兩個miss對三個毒撚。咪住，點解富哥同肥波會換左衫嘅？以前我同佢地出外景都未見過佢地咁整潔。

富哥一埋黎就講左幾句諷刺時弊嘅笑話氹到班miss一笑，然後肥波又share佢自己IG啲靚風景相，得我一個摺摺地等食飯。

見到佢地毒撚有女圍都開心嘅。

「唔好意思，頭先陪樂熹玩space mountain玩耐左。」本身以為得兩個miss，點知原來仲有一個姍姍來遲。但咪住，把聲咁熟嘅？

我擰轉面，係馬嘉澄。

「咦，原來你係今日攝影師。」佢坐喺我對面，我隱約感覺到剩下4對眼睛注視住我同嘉澄。
「有幾出奇？搵食係咁㗎啦。」我話
「你個餐好似幾好味喎，等我試下先～」嘉澄直接夾起我塊切好嘅牛扒
「喂…」我好無奈，但四對眼睛令我更加無奈





等到嘉澄去廁所洗手嗰陣，富哥即刻拉住我。

「呢個女仔你識㗎？」富哥問
「我frd啲frd，做乜？」
「Catherine出名男性絕緣體喎，點解你可以同佢咁close。」一個miss問
「係咩，我都係同佢去過兩次迪士尼咋，唔係好清楚。」我話

等埋嘉澄食完，我地一行人就去左排Space Mountain。

「我之前聽過有男仔驚玩Space Mountain。」富哥開始鳩吹
「唔係掛？我玩沖天遙控車都未驚，Space Mountain都驚？」其中一個miss答
「咦，咁我可以同妳玩喎，估唔到妳咁勁…」下刪幾百字

另一邊，嘉澄原來戴返上次買嗰個頭箍。





「咪扮可愛啦。」我話
「咁你一齊戴咯。」
「我都無買…」
「上次我買左兩個，所以請吧！」佢遞左個米奇頭箍俾我

玩完Space Mountain，富哥佢地決定分道揚鑣，話就話驚我地玩唔慣機動遊戲，實情係想溝miss。

「咁依家點？」我問嘉澄
「玩咯！難得平日得閒入黎，快啲玩灰熊山谷。」佢拉住我去左排隊
「好好好，妳話事。」反正我都唔想再影相了

排左一陣，我醒起今日部機靚過我自己部機好多，係偷拍嘉澄好時機。

「喂，擰轉頭吖。」我同企我前面嘅嘉澄講
「咩事啊？」就喺佢擰轉頭一刻，我撳下快門
「又偷拍？哼！」

我望返幅相，其實我撳快門嗰下係佢鼓起泡腮嬲嗰刻。

「馬老師！！！！」我認得把聲，係樂芯樂熹
「咦！樂芯樂熹你地無同其他同學玩咩？」嘉澄踎低問
「唔好意思啊…呢兩個百厭仔死都話要搵馬老師玩，周圍跑周圍搵。」樂芯媽媽話
「哦～咁我地一齊玩啦，俾媽媽休息下好唔好？」
「好～」

結果我同嘉澄又回歸湊仔湊女行列。

「點解今日王子哥哥又會喺度嘅？」樂芯問
「王子住喺城堡㗎，知道樂芯公主光臨咪出黎迎接妳，hehe」我嘗試搞搞氣氛
「多謝你啊，王子哥哥，不過我想玩小熊維尼，可唔可以幫我問下小熊維尼喺唔喺屋企啊？」樂芯問
「小熊維尼今朝打俾我，佢話知道樂芯樂熹要探佢就全日唔出街等你地過去。」嘉澄入戲

玩完space mountain，我同嘉澄帶左班細路去玩antman。今次我同樂熹一隊終於無失手，爆分完勝嘉澄同樂芯。跟住我地去左旋轉木馬，個人覺得最夢幻嘅遊戲。

「喂你睇住樂芯啊。」嘉澄見到我單手抱起樂芯嗰陣擔心咁講
「得啦，王子點會俾樂芯公主有事。」
「咁你抱埋樂熹上去喇。」

安頓好兩個細路，旋轉木馬終於啟動。

「幫妳影幾張喇，反正今日有pro機。」我話
「咁就差唔多～」

好多人話玩旋轉木馬嗰陣嘅女人係最charming，至少曉盈同嘉澄係。佢地兩個都好鍾意無啦啦望住我笑，然後叫我影相。

「雷諾曦望鏡頭啦！」呢句話，今日喺馬嘉澄口中說出，但係我喺曉盈口中聽過無數次
「得啦，叫埋樂芯樂熹先！」四個人對準鏡頭微笑，影低一張「全家福」

樂芯樂熹家長大約五點幾就接走左佢地，而富哥佢地大概已經有下文，所以都無覆WhatsApp。

「越睇越似全家福。」我話
「係咩？你咁講又好似係。」嘉澄淡淡一笑
「如果係真就唔好喇，生一個四百萬，兩個咪八百萬。」我話
「呢幾年好似六百萬喇，都係玩人地仔女好。」嘉澄話

我同佢去左睇迪士尼音樂劇，明明已經睇過好多次，嘉澄都仲可以睇到笑。

「保留一份童心係咪幼教必備㗎？」睇完後我忍唔住問
「都唔一定嘅，但了解小朋友點諗就必須。」嘉澄話
「但係似乎妳自己唔係好了解自己點諗喎。」我話
「點解？啊！」原因就係佢掛住諗嘢撞左囉燈柱度

笑咗我十五分鐘。

嘉澄同我去左睇煙花，雖然係平日但係靚位都無晒，但俾我見到富哥拖住個女仔喺靚位度卿卿我我喎。

「喲，富哥咁快得左嘅？」我問
「哦，Jennifer恨出pool好耐喇，希望富哥對佢好啦。」
「富哥梗係好仔，不過睇Jennifer個樣佢都應該唔缺仔啊？」我問
「佢想結婚啊…話30歲前最好生返個」
「有啲似緣路山旮旯個阿花。」我笑
「咪笑人啦，我咪都係咁諗，我都想有人寵我。」嘉澄若有所思咁講
「妳點睇都唔缺仔。」我話
「係，好多男仔追我，不過追到手就嫌我保守喇，無得咩就即刻分手，又成日叫我去佢地屋企過夜。」
「大佬，妳住咁遠又無得送到門口梗係唔想送啦…」我話
「咁你又送？」嘉澄問，我無言以對

「星夢光影匯演即將開始…」廣播救左我

果然煙花使人著迷，嘉澄無再追問。睇完煙花後收到富哥WhatsApp，屌佢吖偷拍嘉澄同我拖住樂芯樂熹，水洗都唔清。

富哥：「放心曦哥，一定唔會同你爭🫡」
肥波：「男人的肩膀總是重的💪🏻」
我：「完全唔係你地諗嘅咁樣…」
富哥：「明白嘅，需要一點空間🙏🏻」

屌，點解成日俾人誤會。

「你仲未答我，點解要送我嘅？」我本身以為嘉澄已經攰到唔記得左，點知一上地鐵佢就問
「得閒咪送咯。」我尷笑
「認真答我！」嘉澄望住我

唔知點解，我feel到自己心跳好快。

「以前我次次都有送ex返屋企嘛，始終女仔一個人夜媽媽唔係太好。」我話
「你ex都係住山旮旯咩？」
「都唔算嘅…香港仔咯。」
「我出世到依家應該淨係去過南區2次咋…」
「妳都知道答案啦，所以我都係繼續送妳返屋企。」我同佢喺南昌轉車去紅磡
「如果係咁，不如食埋宵夜先啦。」

我同佢去左旺角篤魚蛋。

「妳唔驚俾啲家長見到咩？」
「十一點幾咁夜都見到抵我俾人投訴啦。」嘉澄一邊加辣一邊講
「妳都幾貼地，啲人仲話幼教多數活喺童話世界入面。」我話
「淨係收人工已經唔係童話啦…」

篤完魚蛋，我陪佢坐東鐵返上水。

「今次真係送唔到妳入去，如果唔係我又要坐的士走㗎喇。」我話
「得啦，你真係以為我三歲細路仔咩？」
「我驚妳路都唔識行咋，喺迪士尼撞燈柱嗰個唔知係邊個呢？」

上車無幾耐，嘉澄就訓左，我都估到今程車係做枕頭㗎喇，畢竟今日唔係純粹玩，要面對家長，又陪樂芯樂熹放足一日電，我同佢都好攰啦。

「喂到喇，唔好訓喇。」列車緩緩駛入上水站
「嗯…你送到我去呢度就得喇，快啲坐返對頭車出去啦。」
「妳訓到咁我點放心啊大佬，都唔知妳平時點返屋企…」我幫佢攞住佢件外套，一路行一路講。
「我好少出夜街㗎！乖乖女。」佢瞬間醒晒
「得喇得喇，上車啦。」我截左部的士

「師傅沙頭角，再返粉嶺站。」
「師傅臨入禁區俾我落，我喺度等你。」
「哦…」
「咁我走喇，妳返到屋企wts我。」
「得啦，細路仔咩…」

唔止嘉澄，連的士佬都唔係好明我係咩玩法。