我喺迪士尼識咗個女仔: 3

「哥哥哥哥，我要玩呢個！」
「王子哥哥快啲陪我玩咖啡杯！」

成個下午，我地幾乎玩晒咁多個機動遊戲。兩個細佬放電咁玩，我就放血咁陪佢地玩，係得小小世界可以稍息。

玩埋迷離莊園，所有機動遊戲終於玩完了。我同嘉澄拖住樂芯樂熹行返去咖啡杯隔離啲長凳休息下。

「呼～陪佢地玩仲攰過自己玩。」嘉澄話
「我見妳好似幾enjoy咁喎。」我遞咗枝水俾嘉澄
「咁呢啲係我學生，我當佢地係親生嘛。再講你唔介意我真係多謝你就真，無啦啦要陪我湊仔。」





我同嘉澄望住專心注目喺魔術師街頭表演嘅樂芯樂熹，再望吓周圍絡繹不絕嘅遊人。我好少咁平靜咁細看迪士尼內嘅一舉一動，多數都係同曉盈蹦蹦跳跳咁玩。再擰轉頭去嘉澄嗰邊，佢一直都注視緊兩個細佬仔。

「係喎，妳做老師都仲要拍呢啲一日男友咩？」我好奇問
「吓，其實係樂欣師姐叫我幫手，佢話係你要參加個比賽喎。」

仆街，強哥真係玩鳩我。

「啊…係啊，今日真係唔該晒妳就真。」我唯有咁講
「咁你要請我食飯啦。」佢望住我




「好啊，得閒咪約。」

嘉澄上前拖返住兩個細路，十足十母愛爆棚嘅媽媽。我都唔執輸，拖返樂芯小公主手仔。

嘉澄話樂芯樂熹家長睇完煙花先接返佢地，所以我地都去左城堡附近霸靚位。估唔到坐地下個幾鐘班細路都頂得順，陪佢地猜吓皇帝同傾吓卡通片時間都好快過。

「我睇唔到喎…」樂芯啱啱俾前面個高人遮住左
「上黎王子膊頭度，唔知公主肯唔肯呢？」我伸出手，十足十童話故事入面嗰啲王子。

我未來一定係個慈父。





由於嘉澄係無咩可能俾樂熹騎足20分鐘，所以樂芯樂熹每隔10分鐘就互換。激動的細路們除左騎膊馬，仲要加啲weewa鬼叫，搞到膊頭重上加重。煙花當然靚，但係同嘉澄拖住兩個細路睇，就好似同老婆帶住仔女去迪士尼玩咁幸福美滿，而呢種感覺喺曉盈身上真係搵唔到。

歡樂的時光過得特別快，煙花匯演完左我同嘉澄還返一對仔女俾人，終於可以鬆一口氣。此時此刻，我諗起一句歌詞：「今天只有殘留的軀殼」

「行唔行吓啲舖頭？」佢問我
「我無所謂啊，好似有sale。」反正你都有白金卡唔使r我著數
「你好似唔多掂喎？」佢望住我不停敲自己個膊頭
「估唔到啲細路咁重，我無事啊。」唔通同你講我虧咩

見到嘉澄一支箭咁跑入舖頭，眼光光咁望住啲紀念品，然後毫不猶豫咁掃晒佢。講真，今日又要佢扮我女朋友，又要佢湊仔女，我都有一定責任嘅…

「我俾錢啦，當係多謝你。」
「咁恭敬不如從命，我男朋友俾啊，請。」





果然講錢就順攤…買完出來先發現原來已經九點半，啲人都散得七七八八。佢問我使唔使喺城堡前影張合照交功課，佢唔講我都唔記得，本來想推卻，但係一個職員行過問我地係咪要影，又唔好意思阻人收工，快手影左張相。

行到地鐵站，見到夜媽媽一個女仔攞咁多嘢返屋企又真係好麻煩，所以我自告奮勇話送佢返去。

「咁夜喇，我送你返去啦，話晒我今日都係妳條仔。」我話
「唔使送啦，公主住迪士尼城堡㗎。」佢揈捉佢自己個頭箍一下
「…」
「講笑咋，你係咪送㗎？」
「送，梗係送。」

佢不懷好意咁笑，然後我地坐巴士去左青馬轉車站。

「你住新界？」
「係啊，北區附近。」我心諗咁都好啲，可以坐地鐵轉隧巴。





同佢坐A43，成個鐘終於到粉嶺站。

「送到呢度得喇，我轉多程巴士就到。」佢話

我心諗，最多咪聯和墟或者沙頭角公路，點知係我諗得太簡單。

見到嘉澄上左目的地係沙頭角嘅78K，然後安然咁訓著左。我全程都唔夠膽訓，一來咁夜全車得我地兩個，二來我上網search左好似坐到總站要禁區紙。

「嗯…依家到邊度啊？」嘉澄俾顛簸震醒
「er…新村。」
「下個站你要落車喇，再過就禁區。」
「哦…咁妳返到去WhatsApp我？」
「好…多謝你今日陪我，我好開心。」

然後我就喺一個唔知咩名、荒山野嶺嘅巴士站落左車。





等左陣，又係頭先架巴士，今次真係得我一個。準備戴上耳機進入一人之境嗰陣，一聲咕～打破寂靜。

「我返到去喇，多謝你今日陪我。」
「我多謝妳就真，妳記得食嘢喎。」

佢offline了，我都就到粉嶺站。唔記得講，我住小西灣。

沙頭角去小西灣，其實唔係好遠啫：78K轉東鐵轉118，兩個半鐘。

到大埔墟嗰陣，收到嘉澄send左幅相俾我，係開左嘅杯麵。

「食緊啦，邊使你提🤪」
「肥死妳😒」





覆完呢句，我就徹底訓死了，去到紅磡已經十二點，好彩咁啱有車，返到去即刻訓覺，都未試過玩迪士尼玩到咁攰。


第二日我差唔多中午先起身，就收到三劍俠嘅WhatsApp。

強哥：「📷照片」10:05
龍：「哇，手仔都拖埋」10:24
強哥：「曦哥徹底擺脫情傷陰霾，可喜可喜」10:27
我：「我都仲未同你計你呃晒我同嘉澄單嘢🙄」11:46
強哥：「即係你承認你冧人地啦」11:48
龍：「食左先講啦👍🏻」11:51
我：「尋晚送佢返去原來住沙頭角」11:57
強哥：「哇上埋屋企有無上床？」12:00
我：「沙頭角要攞禁區紙…我送到關口咋」12:04
龍：「so9sad無得即刻上😢」12:06

我都費時理班仆街，但奇怪在第二次同嘉澄去迪士尼，我個腦無再不停諗起曉盈。

又過左幾個星期，有套叫《緣路山旮旯》嘅戲上畫，一見到係毒撚戲我就心思思想睇，即刻問下有無人陪。

我「緣路山旮旯，太古城戲院有無人有興趣？」
強哥「同老婆買左飛入場睇😚」
龍「約左女仔入場睇」
我「吓😱阿龍約到女？」
龍「屌你」

如事者，我又做左condom，唯有一個人入場睇。

本身想買飛嗰陣，又見到嘉澄po story搵人睇喎，把心一橫就dm問下佢。

「好啊，新城市睇好唔好啊？」
「我遷就吓偏遠居民無乜所謂。」
「🥹咁你咪好好人」

強哥講過，約到女仔單獨睇戲，其實都成功左一半，或者個女仔嗒你糖，因為佢同阿嫂都係咁樣識。

「當年，我靠荷里活UA啲濕鳩冷氣先溝到你阿嫂。」強哥話

當年荷里活仲係UA年代，強哥已經約阿嫂去睇戲，主要係佢地兩個好鍾意睇鬼片，完全唔驚，但係我同阿龍都驚到仆街，所以佢地就被迫一齊睇，久而久之咪日久生情。

「唔係咁簡單，係有一次鬼片無晒位，我地被迫睇愛情小品，跟住佢竟然覺得冷氣凍。」強哥補充

其實根據當事人即係阿嫂話，當時佢無話凍，只不過強哥格硬要佢著外套，而後來強哥可能係愛情嘅勇氣驅使，覺得阿嫂仲凍就索性拖住手睇戲。

「套愛情小品係乜嘢？」阿龍問
「格雷的五十道色戒。」Wltf??????

終於我約左嘉澄一個星期五喺新城市睇。

「sorry啊頭先放工有啲嘢做遲左。」嘉澄小跑步咁過來
「唔緊要唔緊要，仲有好多時間，我攞左幾間餐廳嘅飛，你睇下邊間啱胃口。」
「你話事啦，今日你係金主。」因為上次應承過佢得閒請佢食飯

最後我地去左食意大利粉，我諗女仔應該啱食掛，因為曉盈都好鍾意食呢間…

「下次去食隔離雲吞麵啦，或者好運放題。」完全估唔到一個女仔會鍾意食雲吞麵。
「估唔到妳鍾意食雲吞麵。」我話
「我都知你想捉女仔口味鍾意呢啲日本意粉。抱歉，老娘不吃這一套喔。」佢仲要口邊有啲醬汁一路講呢句，認真好笑
「妳個樣咁滑稽，唔怪得氹到啲細路咁開心。不過，意粉係因為我Ex鍾意食所以先揀呢度，下次我會遷就返妳口味。」

可能係我個樣太認真，搞到我地之間dead air左半分鐘。

「你依家係咪想下次date我？」佢問
「我…咁一定有機會嘅。」我打圓場
「怕醜到你…食嘢啦一陣遲入場。」

終於去到戲院門口，潛意識問吓嘉澄使唔使飲可樂，點知佢話唔抵所以唔買，同曉盈一樣，精打細算。

講返套戲，其實真係幾好睇。拍到香港五個山旮旯地方、五個女仔嘅愛情，尤其第一part沙頭角好深刻，因為嘉澄就係住沙頭角。爺爺喺禁區前巴士站放低蘇麗珊嗰幕真係好有共鳴，加埋荔枝窩靚景同茶果嶺三劍俠抵死對話，呢套輕鬆小品睇得好舒服。

「套戲好好睇啊，呢個半鐘無浪費」
「係，仲好有共鳴，點解妳唔係姓李嘅？」我講笑
「你食屎啦，抵你情路衰過阿厚。」佢自顧自喺新城市跑啊跑

夜晚嘅新城市除左零散人流就只有我同嘉澄，男人老狗追住一個女仔真係羞恥play，但係我對兩個女仔又可以做得出，就係曉盈同嘉澄。

「喂，唔好再跑喇，好攰。」我話
「咁不如去食甜品？」女人是有兩個胃嗎

我就俾佢拐帶左去唔知邊度，反正我唔熟沙田。

「我要心太軟，仲有糖不甩，你呢？」人仔細細食咁多嘢
「一碗合桃露。」
「唔好意思我地呢度無合桃露。」
「桑寄生蛋茶吖。」

Waiter走左，上網一search先知呢邊呢區叫河畔。

「你食嗰啲嘢都幾old school喎。」佢話
「唔得咩，我唔係妳呢啲少女嘛，就快30乜都無。」
「咁又唔好咁講，起碼你有錢買張白金卡。」
「妳究竟係安慰定挖苦我…」我無奈
「試下我呢個心太軟啦，好食㗎。」佢遞左佢碟心太軟俾我
「唔喇，呢啲好甜，留返俾你。」
「叫你食就食啦。」佢直接將心太軟懟入我嘴

Shit，啲朱古力滴撚晒。

「甜得黎都幾好味嘅…」我總結

食完甜品後已經就黎十一點，我同嘉澄行返沙田地鐵站。

「我自己返去得喇，要你送我入去又出返黎都好麻煩。」
「送埋啦，夜媽媽一個女仔都係男仔送安全啲。」我同佢一齊上左往上水嘅東鐵綫。

送女仔返屋企呢個行為對於我黎講係必須。既然女仔應約，將女仔安全送返屋企其實都係約會嘅一部分，呢點都係曉盈教識我。

我同曉盈啱啱拍拖嗰陣…
「喂，你係咪未試過送女仔返屋企㗎？」曉盈問
「係…係啊。」
「今晚俾個機會你，送我返屋企。」

曉盈嗰陣住香港仔，真係好彩唔係好遠。每次送佢返屋企，佢都好鍾意喺海濱長廊行一陣，同我嘻嘻鬧鬧多一陣先返屋企。佢上樓後，仲會閃三次燈代表到屋企。五年感情，去到第四第五年，雖然風雨不改送到屋企，但車程、海濱長廊已經今非昔比。大家各自睇住自己部電話，淨係轉車、到站講一聲，連三下閃燈都無埋。

「下一站，粉嶺。」