我喺迪士尼識咗個女仔: 2
又過左一個月，約左兩條契弟敘舊。
「喂雷諾曦，我要同你阿嫂去迪迪尼，不如你幫手影相？」強哥話
「我屌你啊，無鳩啦啦做你阿四？」
「你入場都唔駛錢，最多我請你食飯。」
「係咯，迪迪尼咁多女，溝返幾個就唔使掛住黃曉盈啦。」連阿龍都出聲
「…我考慮吓啦。」
最後因為Annual都要清，加埋阿嫂好似好想搵人影靚相，咁就算啦。
「柒頭到未？」
「等一陣…飛緊的入黎。」我又唔知醒，同以往去迪士尼前一晚訓唔著，一早起身陪曉盈食早餐真係大相徑庭。
我屌，原來坐的士入迪士尼成三舊水。見到的士佬笑得咁撚開心我已經知道今日嘅迪士尼之旅一啲都唔童話。
「喂呢度啊！」強哥喺美國小鎮大街中間大叫
「好柒啊屌…」我同阿嫂同時心諗
強哥其實都揸金卡，只不過阿嫂今次想買好多周邊所以叫我呢個白金卡入黎攞多啲折扣。
「今日自閉麻煩晒喇雷諾曦。」強哥喺臨玩Space Mountain之前同我講
「屌你啦。」我舉中指問候佢
迪士尼黎黎去去都係玩嗰啲嘢，只係睇住強哥同強嫂恩愛搞到我有啲無奈。
「喂，薯條就唔好喺我面前餵啦。」我望住強哥同強嫂卿卿我我
「唔好意思，結婚三週年嘛。」強哥一啲愧疚之心都無，用我張卡r折仲要放閃。
「唔使咁傷心喎阿曦，我安排左份小禮物俾你。」強嫂話
「咁大鑊…？」我苦笑，因為次次強哥送嗰啲禮物都好伏。
中五嗰年，強哥送左張明將任食兌換卷俾我，我食到入廠；Year2嗰年，強哥送左次同「靚女」獨處嘅機會俾我，然後發現嗰個就係佢肥到仆街嘅表妹。
「我老婆有個師妹想搵人幫手拍條短片參加嗰啲唔知乜鬼選秀。」強哥話
「係啊，見阿曦你影相拍片咁勁咪想搵你幫手咯，順便你可以識吓人地。」強嫂嘅請求我又好難拒絕。
「好啦，幾時拍？」我應承左佢地，無謂掃興
強嫂俾左個女仔contact我，睇profile點解有啲似馬嘉澄…
下午陪強氏夫婦玩左沖天遙控車仲有無數次極速礦車，影左幾十張相，然後去大街買左起碼二十隻公仔，最緊要睇埋個煙花。雖然睇完無幾耐，每一次睇都會覺得好感觸，一來迪士尼本身喺我心入面已經好深刻，加埋情逝都喺呢度。
“Just live the moment and love the memory”
但願我都可以放低過去。
「咁你自己聯絡吓人地喇，我師妹前途就拜託你了。」強嫂話
「咁大頂高帽戴落我度，壓力好大喎。」我講笑
「個師妹好似都幾靚㗎，細你一年啫。」強哥一講，即刻俾強嫂扭耳仔。
直到呢刻，我只不過係懷住幫人嘅心態。
「hi你係樂欣拍片好勁嗰個朋友？」夜晚我收到msg
「係啊…叫我阿曦得喇。聽日妳想邊度拍？」
「迪士尼得唔得？」又會咁巧合
「都得，十點正門等？」反正我有annual pass
「ok」
今次我真係要起到身，仲要執靚自己個樣。畢竟係同曉盈一齊之後第一次同其他異性單獨出街。
未夠九點半，我已經喺迪士尼門口出現。今日著左為第一次同曉盈去迪士尼而買嘅Champion Hoodie，同埋帶左部好耐無用嘅相機。
一切彷彿返返去五年前嘅秋天。
「Hi…曉盈？」
「喂，雷諾曦咁遲先到㗎，請食飯啊。」
「無問題，請靚女食飯有咩所謂？」
「口甜舌滑啦你。」
「等左好耐？」有把女聲問我，我擰轉頭望吓強嫂口中嘅靚女
點解…點解會係馬嘉澄？？？
「吓，妳就係樂欣個師妹？」
「吓，妳就係樂欣師姐講嗰個諾曦？」
兩個人僵持喺驗票閘前，唔講仲以為係情侶臨入場鬧交。
「咁妳仲拍唔拍？」我問
「拍，我點解要怕你？」佢蹦蹦跳跳咁入左園
首先我同佢喺美國小鎮大街搵左幾個位，諗埋啲pose，拍左幾個素材，今日陽光咁好所以效果都不錯。
「埋位啦。」我較好啲器材然後叫喺陰影下休息緊嘅嘉澄埋位
「你呢？」佢問
「我？關我咩事？」
「你唔知個主題係一日男友咩？」
「wtf？我聽都無聽過喎？」
仆你個街，強氏夫婦直頭靠害。
「我都未介意你介意啲乜，快啲啦。」
我求其笑左幾張，但係效果好似唔係咁好。
「你咪成碌木咁啦，邊有男女朋友企成尺遠。」
我諗起第一次同曉盈去迪士尼張合照。
「企埋啲啦，又唔係唔熟。」
「哦…」我嗰陣好怕醜
「哎呀你揸機喇。」
「一二三，笑！」
我好記得張相，到依家我仲擺喺銀包。
「喂，行啦快啲玩機動遊戲。」嘉澄叫我
「哦。」我仲未返得切現實，已經俾佢拉左去Space Mountain。
「一陣記得要拖實我喎，我會驚㗎。」佢望住我講。佢真係越黎越似曉盈，定抑或係我開始有幻覺？
「吓…」我一時反應唔到
「都話你係我一日男友，做戲做全套啦。」佢反白眼
仆街，根本呢個就係馬嘉澄自肥項目。
「wohoo…」佢完全投入喺呢個遊戲入面，但係都不忘捉住我隻手。
「…」我完全無語，入唔到呢個一日男友嘅局。
玩完Space Mountain，我地去左玩蟻俠。
「你要carry我喎，阿曦！」佢對我單單眼
「儘量啦…」聽到阿曦呢句，啲回憶真係返晒來
「巴斯光年嗰個妳得唔得㗎？」我問曉盈
「勁過你添啊，我成日七十幾萬分。」曉盈話
「吓，我次次爆分喎。」我摸摸佢個頭
「咁你carry我咯，阿曦！」曉盈望住我，認真咁講
「好啊，我可以肯定曉盈公主今次可以爆分。」
我手把手同佢玩，一時又撳掣轉吓方向，一時又笑吓佢唔準，咁樣笑吓笑吓原來已經五年，巴斯光年都已經變左蟻俠。
「前方嘅危機已經解除，可以繼續開火！」
「喂射啦，我要爆分！」嘉澄攞住把雷射槍鳩射
「咁虧㗎妳，等我教妳。」
一切彷彿返返去當年嘅巴斯光年。
「喂啊，你出貓嘅。快啲俾返把槍我。」我攞左嘉澄支槍，然後自己單手繼續輸出
「我就係唔俾喎，吹咩。」
突然，嘉澄哄埋黎想搶把槍，點知一跌就跌左喺我胸膛度。我同佢都呆左，一秒後佢搶返把槍然後繼續笑鳩我，繼續刷分。
嗰一跌，搞到我完全心不在焉，同曉盈一齊嘅悸動竟然電光火石之間搵得返，但我又覺得咁樣動心嘅我好仆街。
最後我竟然得五十幾萬分，輸左俾嘉澄。
「喲，又話次次爆分，估唔到都係咁上下。」嘉澄笑一笑然後影左張相
「最衰都係妳無啦啦撞埋黎搞到我心神恍惚。」我賴佢
「係喇係喇你最勁，雷諾曦。我去廁所啊，等我一陣。」
佢行開左，我嗱嗱臨打俾強哥。
「仆街啦你又話拍嘢又唔講主題，人地係要一日男友啊，你叫我點拍啊？」我屌鳩強哥
「咪益左你咯，靚女陪你去迪士尼仲唔夠？」
「我驚啊屌你。」
「驚俾人見到唔係拖曉盈去定驚沉船啊？如果係後者就咪撚怕啦，情情愛愛都係你沉我沉大家沉啫。」強哥一臉輕鬆
「屌你啦。」我見嘉澄行緊返來，快手收線。
「邊個搵你？」嘉澄問
「哦無，詐騙電話啫。」事實上，強哥真係詐騙我
「俾我知道你偷偷地搵其他女仔你就死硬。」使唔使咁入戲。
然後我地去左玩極速礦車，同女仔玩就係聽佢地尖叫，嘉澄都不例外，倒後嗰度直情玩到舉晒手。
「好好玩啊！次次都玩到好爽！」
「係咩？不如食嘢啦，都十二點幾。」我提議
「好啊，男朋友話事啦。」佢翹住我講
唔知點解，我覺得毛管棟之餘有啲愧疚，好似背叛左曉盈咁。
又係火箭餐廳，因為窮。
「你食唔食薯條啊？」佢問我
「無所謂啦，妳食先。」我仲執緊頭先啲相
「我喂你吖，擘大口。」嘉澄隊條薯條埋我嘴唇邊，啱啱我就發現呢個moment好有女友feel，即刻攞機影低左。
「呢張夠做，攞硬冠軍。」我自信咁講
嘉澄望完幅相，再望過黎，隊左條薯條入我口。
「妳咀邊有茄汁。」
「你幫我抹啦，我隻手唔方便。」佢指住張紙巾
「呃…」呢個動作除左曉盈我完全無對其他人做過。
我輕輕咁用紙巾抹一抹佢唇上嘅茄汁，生怕破壞佢清秀嘅臉龐。近睇先發現，原來佢同曉盈真係有幾分似，眼仔細細但係戴副圓框眼鏡，乜都可以無所謂但係玩就玩到好放。
「望夠未啊…鹹濕雷諾曦。」嚇到我即刻鬆手
「唔…唔好意思。」
「咁…男朋友望多女朋友幾眼都唔係唔得嘅。」嘉澄若有所思咁講
死…我係咪真係有幻覺。
下午，當然要去睇每次入園必睇嘅音樂劇。入場嘅好多都係小朋友，而我同馬嘉澄化身怕熱的小孩入場睇吓唐老鴨點俾人撚。
其實睇左咁多次我都好疑惑究竟陣嘢食味係乜，真係好鬼香。
臨出劇場，見到嘉澄俾個細佬拉住左，本身以為係認錯老母呢啲，諗住幫佢解圍。點知原來係我諗多左，個細佬係馬嘉澄啲學生。
「馬老師！！！」兩個細佬即刻撲埋嘉澄度
「哎唷，樂芯同樂熹，你地都黎迪士尼玩啊？」嘉澄即刻母愛上身
「係啊，我地同爸爸、媽媽一齊去迪士尼！」嘉澄望望兩個細佬身後嘅家長打左個招呼。
「咦，呢個哥哥係邊個啊？」樂芯拉住我問
「Hi，我呢就係馬老師嘅男朋友喇，唔…即係馬老師嘅王子。」我靈機一動，解釋到呢個對細佬複雜嘅概念
嘉澄望住我，笑咗下。
「爸爸媽媽，我想同馬老師玩啊。」
「我都要我都要！仲要同王子哥哥玩！」兩個細佬拉住我同嘉澄。
家長就好不好意思，但嘉澄就話無乜所謂。
「會唔會打搞到你地拍拖啊？」
「唔會嘅，我男朋友都唔會介意㗎。」嘉澄望住我，實際上我又真係唔介意嘅。
「放心二人世界啦，黃生黃太，你地對仔女交俾我地就可以。」我拖起樂熹
睇住兩個家長手拖手享受二人世界，我覺得今日湊仔都好嘅。
至於我喎，就快俾班細佬榨乾…