我喺迪士尼識咗個女仔: 1
「分手啦。」
就喺一個夜晚，我同拍拖五年嘅女朋友分左手，因為兩個人之間實在太遙遠，即使我幾努力維繫呢段關係，始終都係修補唔到。
我一個人行喺海旁，手中揸住嗰張因為佢鍾意迪士尼而買嘅白金卡，想掟落海嗰陣，我突然諗起dllm我用三千幾蚊買返來就咁糟蹋左就真係對唔住自己啲錢。畢竟就算無左個女朋友，張卡都係屬於我。
「吓，你諗住一丁友去迪士尼？」
「咪撚玩啦，毒到搞唔撚掂咯。」
以上係我兩個死黨嘅回應。第一個係阿龍，標準毒撚一個；第二個係強哥，睇佢牙刷刷咁，其實係個老婆奴。雖然佢地好唔支持我，但我心意已決，反正個人都柒柒地，一個人去迪士尼都唔係啲咩大問題。
上網預約左個入園日期，然後就兩手揈揈入去了。
首先入去梗係玩Space Mountain，之前陪Ex玩過無數次，其實除左快入面乜都睇唔到，唔明點解可以咁長青。由於係平日，就算無卡都係排5分鐘，跟住就出事。
分流嘅職員無留意我同前面個女仔係分開，指左我去同個女仔同一卡。
「唔好意思…」「先生請坐好。」
見隔離個女仔無咩反應，咁我又無謂搞咁大件事。其實點解，玩迪士尼完全無驚過嘅我有啲緊張。
有玩過Space Mountain都知，其實只不過不停轉轉轉，無乜嘢好驚，但係我隔離個女仔由開始轉到完都不停大嗌，全車得佢咁樣做，個個都以為係我女朋友驚到咁都要帶佢玩…
冤枉啊，我連佢係邊個都唔知道。
不過，又令到我諗起以前最初識Ex嗰陣，玩Space Mountain佢有幾驚，不過我拖住佢之後就無再叫，漆黑中都會見到佢對住我笑。只不過一年又一年過去，玩Space Mountain排隊我地唔再打情罵俏，玩嗰陣我地唔再拖手，出黎會一個行前一個行後，形同陌路人。
等我仲回味緊五味雜陳嘅回憶嗰陣，原來已經玩完。
「喂，下次玩Space Mountain唔好再叫咁大聲，有少少柒。」雖然我唔識佢，但係我的確忍唔住串佢因為呢個game連三歲小朋友都未必會驚。
「你…其實你係邊個？」係喎，點解我會無啦啦同佢講嘢嘅。
我意識到柒嗰個原來係我，即刻跑走有幾遠得幾遠。
求其入左小小世界度，斷估佢點都唔會估到一個大男人玩小小世界掛。點知我錯了，正當我上左船輕鬆撳緊電話嗰陣，突然見到個女仔原來一直喺我後面。
「我屌你老母…」好彩啱啱開門未有好多細佬
「你無啦啦串我先㗎」
「對唔住咯小姐，妳想我點賠罪？」
「陪我玩一日。」我真係估唔到會有咁無理嘅要求
「唔得，我黎呢度就係散心，俾妳跟住仲得了。」
「咁我同人講你非禮我。」
我屈服了，散心搞到好似湊囡咁。
玩完小小世界，佢拉左我去小熊維尼冒險之旅。
「呢個好玩啊。」佢話
我又諗起最初同Ex拍拖嗰陣，佢都好鍾意玩小熊維尼。曾經我地合照album入面都有好多同維尼嘅合照，不過已經全部成為歷史。直到依家，我都唔係好懂得欣賞呢個遊戲，畢竟現實真係好殘忍。
唔知點解，我眼眶越黎越濕，玩完出黎變埋坤哥。
「哇你做乜啊？」呢個妹釘仲問咁多野
「無事，有沙入眼啫。」
「咁我地去玩灰熊山谷個過山車啦。」
「嗰個叫極速礦車啊！唔係灰熊山谷！」我強調
「有咩唔同喎？」
「灰熊山谷係成個區名，極速礦車先係個遊戲。」我解釋
「其實咪一樣！唔好咁執著。」
「唔得，極速礦車先係個名。」
當年，我就係咁樣同Ex拗左好耐，最後我都俾佢搞到改口。我同呢個細佬女拗咗20分鐘，等到玩得先停低紛爭。
「啊啊啊啊啊啊啊啊啊～」個女仔喺度鳩叫。其實我覺得除左倒後比較有離心力其實呢個game真係好虧。
想當年我地第一次拍拖，灰熊山谷先啱啱起好，妳就嘈住要玩，我地排左成個鐘先玩得一次。我未頂得順當時而言咁勁嘅過山車，妳就嘈住要再玩一次。
五年過去，我已經對過山車免疫之時，妳已經不再屬於我。
「喂八卦佬落車喇。」嗰個細佬女拉住我
「哦。」
話咁快已經中午，係時候要補充能量。
「妳食唔食嘢？」我問，其實我諗住借食飯擺脫佢
「好！去火箭食啦。」佢直接答我
我叫左個漢堡包，佢叫左炸雞。
「share一個餐好喇，呢度啲嘢太貴喇。」佢話
「我驚妳唔飽喎。」我望住佢講
「我好細食咋，加埋肚空都好過銀包空！」
「果然迪士尼除左價錢牌同人類乜都係童話。」
「仲有我地都係童話！」
嗰陣係妳真係細食定精打細算已經無從考究，但係嗰陣小情侶嘅互動真係令依家嘅我痛不欲生。
「喂，你Ex好鍾意迪士尼？」
「吓…咁妳都知？」我真係好surprised我一個咁收埋自己情感嘅人會俾人睇穿
「見你玩乜都眼濕濕咁，又唔係驚，即係睹物思人啦。」
「妳都唔好咁八卦，其實我都唔識妳，食完嘢就唔好跟住我。」我話，因為我的確需要沉澱吓。
「好，同埋我有名，我叫馬嘉澄。」
「妳叫阿儀都唔關我事。」
下午嘅迪士尼真係好撚熱，唯有睇下musical嘆冷氣，又會咁啱，馬小姐都睇緊。Musical內容十年如一日，同Ex不知睇過幾多次，調轉背都得，不過每次Ex睇都總會笑得好開心。
我發現，場內笑聲來源，主要來自馬嘉澄。呢個女仔咁好笑嘅，乜都誇張過人。
睇完迪士尼音樂劇，我去咗Antman嗰個射擊game。一條友玩呢啲game真係好尷，雖則我真係以爆分屌打，但係無得同佢手把手射槍，感覺差少少。
我發現成個迪士尼都係我同佢嘅回憶…
五點幾，回憶不停湧上心頭，已經無心機再玩，又或者最初我唔肯了結張白金卡，就係因為我仲未放低，而唔係張白金卡好貴。
我坐喺城堡前，等睇我同佢睇唔到嘅煙花。
「喂，霸到靚位啊？」嘉澄又無啦啦出現
「小姐我咪同妳講左分開行咯…」我無奈
「你呢個位咁靚，share俾我啦。」佢一支箭企左埋黎。
為左煙花，我忍。
「哇…」見到馬嘉澄嘅驚嘆，我抬頭望一望重建後嘅城堡。配合燈光同音樂，感覺煙花又昇華左另一個層次。
相比重建前，加入左好多光影元素，同埋感覺音樂更加觸動人心了。城堡大左，反而顯得無咁空虛，可能就恰巧填補到失去佢嘅空虛。
「Woooo…」響起”Times always moving we can slow the hands”呢句，真係煙花最靚一刻。我諗起以前Ex睇煙花真係好專心，望住佢水汪汪眼眸入面煙花嘅倒影，真係好靚。
“I can show you the world, Shining, shimmering, splendid”
“Cause You’ll be in my heart” 去到呢度，我真係忍唔住喊。原來五年感情，曾經諗過嘅永恆係咁脆弱。或者無人做錯，但係就算有人錯又如何？
遙遠嘅距離始終遙遠。
「希望下次，可以唔使自己黎了。」我暗自祈禱
「喂，又喊？」馬嘉澄問我
「關妳咩事…」
「好心你啦，過左去就唔好再留戀啦。就算邊個錯都好，感情嘅嘢好難彌補。學我，失敗後要闊達面對。」
「妳咁鬼細個講呢啲大道理妳唔覺得好笑㗎咩？」我忍唔住笑
「你唔好理，笑返咪好咯。」
行出去地鐵站嗰陣，我見到佢自拍po story。
「全日都唔po story臨走先po？」
「就係唔想撞到熟人。」佢一路po佢story，我一路睇IG，先見到原來Ex今日都去左迪士尼…
黃曉盈…妳係咪咁死心不息地要喺我生活出現？
「喂，做乜無啦啦向前行咁快，我未影完相啊。」我拉住嘉澄撞開人群向前走
我無出聲，直到青衣站。落車一刻，我舒一口氣，然後一個大男人喺月台好唔爭氣咁喊左，好彩依家疫情無乜機場快綫。
「唉好喇好喇唔好喊喇，紙巾抹吓眼淚先啦，好柒。」估唔到嘉澄無拋棄我
「唔該…」
我調整下自己心情，然後坐低喺機鐵站無人嘅長凳，娓娓道來我同黃曉盈五年嘅愛情故事。
「就咁睇，你定情於迪士尼，情逝又喺迪士尼。」嘉澄一臉頭頭是道咁講
「都可以咁講…」
「所以你去迪士尼就係想正面克服呢樣嘢？」
「唔係…」
「吓？咁你入去做乜？」
「我純粹唔想蝕張白金卡…」
「哈哈哈哈哈哈咁撚戇鳩嘅，為左唔蝕錢而辛苦自己。」嘉澄完全如入無人之境咁大笑
「喂…好柒啊細佬女。」我無奈
「得啦，喊過就會無事，好似我咁，一個人都可以盡興。」嘉澄好自豪咁講
最後，我送左個細佬女去紅磡站，奇蹟地被佢開導，更奇蹟地我地無再有任何交集。我繼續返工，得閒約吓阿龍同強哥，直到呢一日…