我在英倫身兼數職的日子: 第八章： 心繫祖國，決戰台灣？
英國team 同台灣team 既對立愈來愈明顯， 我老細本身title 大過台灣， 也想慢慢轉移台灣所負責的過來呢邊負責， 但台灣team 本身做得比較耐， 好多野都唔放手比我哋去接， 佢哋要做成好多野其實都仲要依賴台灣既假象， 當中攪到好混亂， 好多政治手段，但其實做左咁耐野我老細都足夠經驗同佢地玩，總之就係佢哋霸住唔放仲不斷請人好似好多野做咁。 之前我老細在英國呢邊愈做愈有起色（加上我既幫忙麻 XD), 大老細係一個英國白人， 佢話唔喜歡本地人效率太慢， 加上亞洲人計數快啲， 叫我老細直頭經香港agent 請香港人經BNO 過嚟呢邊做， 所以得到指示下擴充到成條英國data team 都係香港人， 圍爐取暖之下我好似返咗香港工作咁， 一星期三日返office， 食lunch 時都會買外賣返去食， 公司有Pantry 食飯地方， 慚慚地我哋被人投訴太大聲圍爐得太勁， 可能太多香港人圍爐講廣東話太揚了。 感覺公司其他人都開始邊緣化我哋。
另外，在家工作既日子會比較輕鬆， 其中有一個香港人可能在家工作太得閒， 去咗行山（懷疑）， 因為我老細話收到投訴，公司網上保安team check 到那位同事全日隻mouse 都無動過， 換言之公司係有監控每個同事， 我後來查到原來公司安裝左類似spyware 既監控軟件去monitor 住每部電腦既mouse, keyboard 同internet 流向， 基本上你係部電腦打任何字都會查到， 令我心寒既地方係點解遠在西方都會有呢啲監控？ 我唔知公司咁樣做犯唔犯英國法律， 也唔會懷疑英國人玩法律條文既能力，但咁樣令我更加感受到我已心繫祖國，富有新時代特色主義既工作環境下做野，真心感覺唔好。令到我開始有種當年法國仔問我係唔係每個香港boss 都係咁bossy 既感覺，係唔係間間英國公司都咁樣監控員工呀？ 要每日身處監控之下做嘢，咁我做咩咁辛苦去英國？ 早在我既出生地已經擁有啦。有時原則問題下收入已經唔重要，有啲嘢我接受唔到就係接受唔到， 去到邊一個國家都一樣， 當一刻已經產生去意，如果唔係我上司仲係度做， 我真係有種沖動遞信， 反正咁早返工又咁長途車程， 返得耐身心都累。
公司針對香港人圍爐既情況愈來愈明顯， 開始好似工廠咁每次返office 要打卡監控進出時間， 老闆娘（台灣婆） 開始對我老細有微言， 唔知係因為圍爐事件定我地決戰台灣佢唔like, 另外更安排internet security team 坐正我哋後面， 我都試過幾次忘記lock 電腦比人投訴， 那種監控法真係好離普， 我起身去廁所， 行出去半路中途記起未lock screen 行返去lock, 過程應該一分鐘內， 咁就被人投訴， 十足十big brother is watching you 英倫版， 唔通圍爐既代價就係被祖國式監控？
本身全條team 本身得我一個engineer, 老細話由香港請多一個engineer幫手跟project, 公司本身做埋房地產生意， 公司會安排住屋housing allowance(我上司都係住housing), 所以新請返黎既engineer 一家三口就先落腳公司housing, 初黎報到感覺佢份人幾nice, 佢叫保怡Bowie, 佢就係咁在未知情既情況下加入呢條兵荒馬亂既data team...