中六個年 我鍾意左叫我起身個女仔: 不解

佢走咗之後，我冇返屋企，反而坐咗喺巴士站嘅長櫈到。

我唔明，到底放唔低係咩意思？

佢應該知我哋個問題出喺邊，但係…

佢選擇唔解決。

明明簡單講返咩事就得，但佢選擇逃避。





照咁計，佢應該係唔想繼續落去，但而家又話放唔低。

定係…

佢等緊我開口？

根據慣性，女人係唔會認錯，亦唔會做主動。

霸氣啲由佢走，定係認衰仔？





我覺得…

霸氣從來都冇喺我身上存在過。

另外就係，我最鍾意搵真相。

我拎電話出嚟Send咗個Whatsapp比佢。

「如果我講咗嗰日發生咩事，你係咪都會講點解你要扮醉？」我問佢。





「關我咩事？」

「咁我講架喇喎？」

「你咪講嚟聽下。」

然後，單剔。

喂，咩料啊？

又叫人講，然後又Block咗人。

唔得，我決定要召喚小巴大師。

我打咗個電話比龍哥，一響佢就聽咗。





「做咩啊武仔？」佢問我。

「你今日得唔得閒？」我估佢唔得閒。

「你問得真係好合時，我今日唔打算開工。」佢繼續講：「想點啊武仔？」

「想搵你傾啲嘢。」

「老地方等。」

Cut線之後，我嚟到佢朋友開嘅酒吧出面，過咗無耐龍哥都到步。

「洗唔洗急到衫都唔換就嚟啊？」





「Sor，心急得滯。」我拍咗拍佢手臂。

「唔緊要。」佢推門：「有冇房啊老細？」

「依家有啊，不過晏啲要讓返出嚟架喎。」佢朋友喺裡面嗌出嚟。

「行啦武仔。」

我跟住龍哥嚟到酒吧最裡面嘅一間房，佢朋友過咗陣都拎咗一壺Mix好咗嘅Black Label入嚟。

「咁耐冇見，我請大家飲少少啦。」

講完，佢朋友就行咗返出去。

龍哥拎包煙出嚟，自己拎咗一枝：「你要唔要？」





我拎咗一枝之後，佢就收返埋包煙。

我幫佢點火，然後再幫自己點。

「煙酒齊備，可以開始講。」佢望住我：「你呼啲煙都有形狀架喎。」

「咩形狀？」我唔知佢想講咩。

「大大個問號喺到。」

「係呀。」我苦笑。​​​​​​​