中六個年 我鍾意左叫我起身個女仔: 是誰(七)

巴士離站，喺呢十分鐘車程面，我決定要試探下佢。

「你食咩煙架？」我問佢。

「紅雙喜囉，做咩？」佢偷偷地拎咗包煙出嚟：「你要啊？拎去囉。」

「唔係啊，問下啫。」

「屌你曬鳩我時間。」佢收返埋包煙。





「咁你幾時開始食架？」我直接轉移話題。

「冇呀，十二、三歲就食到而家。」

「咁細個食唔會咳咩？」

「有少少哮喘，不過冇咩事。」

呢個我知。





「咁你帶幾多藥出街？」

「跟身一枝，袋裡面一枝。」佢搲咗搲頭：「但唔知點解今日個袋多咗枝，可能係出門口嗰陣唔小心擺多咗枝落去。」

「可能係啦。」我擰轉面，避免露出破綻。

我得到我想要嘅線索，而架車就就到站。

車停低，我再見都冇講就急急腳衝落車，然後即刻打比啊晴。





一響，佢就即刻聽咗。

「喂，做咩？」佢把聲有啲頹。

「你喺邊？」

「喺大埔中心準備上車。」

「唔好上住！」我有啲激動咁講：「我而家過嚟，你等我。」

我Cut線，然後向住大中狂奔。

唔知係我啱啱嗰句講得太大聲定係無啦啦有條友喺到狂奔，成條街嘅人都停喺到注視住我。

尷尬就的確係尷尬嘅，但係唔理咁多喇…





照跑啦！

因為，我今日一定要問到點解。

我跑到差啲斷氣咁濟，終於嚟到大埔中心巴士站。

啊晴坐喺巴士站嘅長櫈上面一手撳電話，一手拎住哮喘藥喺到吸。

我嚟到佢面前：「你做咩唔同我講？」

「講咩？」佢繼續耷低頭撳電話。

佢啲演技，果然係有返咁上下。





「我咩都知道曬。」我踎低。

佢擰轉面：「知道咩？」

「叉油雞飯、哮喘藥。」

「係我做嘅又點，唔係我做嘅又點？」

「咁點解？」

「冇咩點解，純粹放唔低。」

「咁…」我想問落去。

「唔講，我走先。」但佢唔允許。





講完，佢就行去另一邊上咗去太和嘅巴士。

我個心想追上去，但係我雙腳阻止咗我。