中六個年 我鍾意左叫我起身個女仔: 是誰(二)

我嚟到看台正對面嘅帳篷，呢邊個報到處由一個女體育老師負責。

「啊武，好耐冇見啊！」佢向住我揮手。

「係啊，好耐冇跑喇。」我扤頭以示禮貌。

「今年做咩又返嚟跑啊？」

不如你問下點解今年一定要報一個項目？





「冇呀，最後一年想留返個回憶啊嘛。」我決定比一個公廁答案佢。

「好啦，咁你加油喇！」佢都還一個公廁答案比我：「你等我一陣，揀個靚號碼比你。」

「好啊。」

佢喺堆好似垃圾咁嘅號碼衫到搵咗一陣，然後拎咗其中一件出嚟。

佢揚開件號碼衫：「就呢件啦！」





我望住件號碼衫，有少少無奈。

點解…

又係「67」

「我想問…」

我諗住問佢可唔可以換過件，但佢已經將件號碼衫塞咗落我到。





「唔好問喇。」佢拍咗拍我膊頭：「加油啊！」

我加你老…

唉，算。

我死死地氣著上件號碼衣，然後摸咗摸佢，唔知點解感覺好熟悉。

係喎，我都未睇過今年三千米有咩人參加。

「我想問有冇參加者名單？」我問佢。

「有啊。」佢喺堆號碼衫底到拎咗本簿出嚟：「喺最後嗰頁啊。」

我接住本簿，然後直接揭去最後一頁。





「得五個嘅？」

除咗我，另外四個都係中五。

得四個都唔係重點，重點係佢哋我全部都唔識，以往跑得唔錯嗰啲都冇喺名單上面。

「我都唔知點解今年特別少，以往都有七至八個。」

你問我我都唔知架。

「唔該曬。」我比返本簿佢。

我都唔知呢件係好事定壞事。





跑過兩個就頭三，但係佢哋我全部都唔識，都唔知勁定廢，一間我跑第尾就柒到核爆。

「上跑道拉下筋先啦，差唔多開始啦。」女體育老師用大聲公講。

我行去起點，呢個時候我都終於知另外嗰四位咩樣。

高我成個頭呢啲就唔講啦，畢竟我得嗰米六。

我拉筋嘅同時順便摸下自己對腳，後腿啲肉鬆拋拋咁，似肥肉多啲。

再望下另外四位對腳，後腿個肌肉線條幾咁明顯。

睇嚟今次…兇多吉少。