中六個年 我鍾意左叫我起身個女仔: 是誰(三)

「大家揀好位喇，準備開始喇。」跑道側邊嘅工作人員有大聲公講。

另外四個已經一早霸曬四條內線，我唯有去第五條起跑。

雖然起跑之後都會切返入內線，但係多個動作都係麻煩咗。

「各就位。」

「Ready。」





「Set。」

「咇！」

槍聲嗚起，另外四位即刻爆衝咗出去，而我就喺後面慢慢切返入內線先。

呢個可能係佢哋嘅均速，不過因為快過我，所以我覺得佢係爆衝。

佢哋繼續喺前面爆衝，而我就繼續保持住我自己嘅均速，成件事頗有一種「眾人皆醉我獨醒」嘅感覺，當然都有可能係「眾人皆醒我獨醉」





跑成七圈半，我就唔信你哋可以Keep住呢個速度跑到尾。

經過三圈，我依然同佢哋保持住一樣嘅距離，大概二十米左右。

佢哋冇降速，當然我都冇，情況可以話係樂觀，但如果呢個情況持續到最後，我就會包尾。

如果我格硬喺呢個時候發力追上去，雖然我而家追平，但後段我一定會冇力又冇氣。

呢個世界有一招係好賤，但又好有效，叫做「趁你病攞你命」





經過五圈半，前面四位開始有輕微減速。

「機會嚟啦飛雲。」我深吸一口氣，細聲同自己講：「上佢。」

我開始稍微加快步距同步速，慢慢收窄同前面四位嘅距離。

嚟到最後一圈半，我同佢哋嘅距離都收窄到五米左右，但係…

仲未夠。

「爆衝四百米」，呢個係我嘅諗法。

我交叉腳跳咗一下，呢我係我準備爆衝嘅招牌動作。

咁耐未型過，係時候型返次！





我喺佢哋身邊跑過，佢哋見我爆氣都即刻爆氣。

原本講求耐力嘅三千米賽跑，瞬間比我變咗做講求爆發力嘅六百米短跑。

嚟到最後一百米，我哋五個人近乎平排，而我略略落後少少。