中六個年 我鍾意左叫我起身個女仔: 澄、晴(十三)

「你洗唔洗瞓多陣？」佢問我。

我輕輕扤咗扤頭，然後個肚「咕」咗一聲。

「係咪肚仔餓啊？」佢當我小朋友咁同我講嘢，但我好鍾意咁。

「嗯。」我有啲尷尬咁搲咗搲頭。

「我都有啲餓同眼瞓，一間食完嘢一齊瞓啦。」佢坐咗起身：「你屋企有冇嘢可以煮啊？」





「做咩啊？你想煮？」我問佢。

佢扤咗扤頭：「我得架，你信我啦。」

「唔係啊，我諗緊有咩可以煮。」

我唔係質疑緊佢，我真係諗緊，因為我好耐冇出過手煮嘢食。

我醒起琴日我啊媽有講過雞蛋同麵包呢四個字：「你睇下雪櫃係咪有雞蛋，然後再睇下雪櫃後面張枱有冇麵包。」





「好啦，咁你瞓陣先啦。」

講完，佢就爬咗落床，而我就合埋眼諗住繼續瞓。

我都仲未瞓返着，就聞到有浸淡淡嘅…

燶味。

燶味？





仆街，佢煮燶嘢！

我起身跳落床，然後直衝去廚房，一手就熄咗個火，而佢就拎住個鑊鏟企喺我後面。

「你搞咩煮燶嘢啊？」我有少少大聲咁問佢。

「你咁惡做咩喎…人哋屋企用易潔鑊架嘛，點知你嗰隻唔係。」佢扁住嘴咁講。

佢唔講我都唔記得有易潔鑊呢樣嘢，易潔鑊煮嘢的確係可以唔洗落油。

「對唔住啊，啱啱語氣重咗。」我行返去佢後面，從後攬住佢：「你唔好嬲嬲啦好冇？」

佢擰個頭過嚟，個嘴對住我耳仔。

等陣，點解要對住我耳仔？





當我意識到唔對路嘅時候，一切都已經嚟得太遲喇。

佢撳住我塊面，個嘴貼住我耳仔慢慢咁向裡面「呵」咗啖氣。

我即刻打曬冷陣，仲升埋半旗。

我推開佢：「我煮啦，你出去等陣。」

佢從後攬住我：「唔要，我要陪你煮。」

我摸咗摸佢個頭：「好啦好啦，咁你企我後面啦，驚一間彈油。」