中六個年 我鍾意左叫我起身個女仔: 你很好，我不好(五)

「喂，佢同你講咗咩？」向晴行咗嚟我隔離。

「冇咩，都係例牌嘢。」我冇望住佢。

「哦…」

我哋兩個就咁一前一後，咩都冇講咁行到返六樓。

我哋呢條落到去近大門嘅就係一號梯，我哋會叫呢邊係走廊頭，咁走廊尾就有條二號梯同埋男女廁，而我哋個班房就喺二號梯隔離。





喺我哋諗住行返班房嘅時候，有個光頭啊叔喺我哋班房行咗出嚟。

佢一定係嗰個好撚憎我嘅副校，因為全校得佢一個光頭。

更大鑊嘅係，佢向住我呢邊行緊過嚟。

我推開啊晴：「你落去行第二邊上。」

佢企喺原地呆咗幾秒，然后後就衝咗落去。





光頭副校停喺我面前：「做咩叫人走？驚呀？」

「係又點？唔係又點？」我問佢。

「最好唔係啦。」

「心照啦。」

「你話點就點啦。」





講完，佢就雙手擺喺後面，喺我身邊行過，經一號梯落返去。

我望返班房方向，啊晴企咗喺女廁門口等我。

我行過去，佢行過嚟，我哋兩個同時推門行入班房。

成個班房瞬間充斥住咄聲同歡呼聲，咄聲嚟自女仔，而歡呼聲嚟自男仔。

女神喺隔離，所以歡呼，毒撚喺隔離，所以咄。

「你兩個做咩一齊遲到嘅？」班主任坐喺教師枱前面笑淫淫咁望住我哋。

「唔好諗多咗，咁啱好啫。」我衝返埋位擺低袋。

「哦…好啦好啦，返位準備上堂喇。」班主任喺黑板角落頭畫咗個細細粒嘅心心。





我行去班主任身邊細聲講：「唔該，保密。」

佢喺枱底先比咗個「Good」手勢，然後轉咗做「OK」手勢。

我轉身行返位，邊行邊嘆氣。

雖然佢比咗個OK我，但我可以好肯定喺佢離開呢間房之後嘅幾個鐘，全校都會知呢件事。

唔係我唔信佢，係佢出曬名係大喇叭。

我雙手擺上枱，然後將個頭埋落去。

一間發生嘅所有嘢，我唔想知亦都唔想理。





我同佢…

根本都唔係同一個世界。

我爬上去唔會令我個位變高，只會將我嘅差放大。