中六個年 我鍾意左叫我起身個女仔: 你很好，我不好(四)

訓導主任向我哋呢邊行過嚟：「你兩個去嗰邊寫咗遲到紀錄紙先，之後再過嚟搵我。」

「好…」我兩個死死地氣咁講。

我哋兩個企喺接待處填好遲到紀錄紙，之後就拎住張紙行過去搵訓導主任。

訓導主任拎走我哋嘅紀錄紙睇咗睇：「遲到原因呢？」

「Sor，手快唔記得咗。」我伸手拎返兩張紀錄紙：「佢都係。」





「做咩幫人答？你邊位？」佢拎返啊晴嗰張。

「我都係手快唔記得。」啊晴伸出右手。

個訓導有啲唔啹，但係都比返張嘢啊晴。

我哋寫完遲到原因，再一次將佢交比訓導。

佢拎住兩張紀錄紙嘆咗啖氣：「遲咗起身呢啲例牌架喇，都懶得鬧。」





「咁即係行得啦？」我問佢。

「未。」

又嚟喇佢，又發癲啦。

「啊晴，你揹呢個袋返嚟係咩事？」佢指住向晴個唐老鴨袋。

啊晴完全唔知點兜，而訓導已經醞釀緊情緒，準備鬧鳩佢。





「佢書包洗咗未乾。」我搶喺佢嚟料之前開聲。

「問你咩？」佢睥住我。

「咁係咪呀？」我望住啊晴。

佢冇開聲，只係默默咁扤咗扤頭。

「見到啦？」我喺心裡面向訓導比咗個中指。

「咁你有書喺上面Locker架嘛？」訓導已經無視咗我。

「嗯。」啊晴扤咗下頭。

「咁你返上去先啦。」訓導行埋樓梯邊嘅角落：「啊武你企喺呢到。」





我行過去企喺角落頭，而啊晴就沿住樓梯行咗上去。

「人哋好女仔嚟，你個MK仔要溝女就躝返落Club啦！」訓導用下巴對住我，明顯想大我。

「我同佢冇關係，唔好同我喺到用你對我嘅固有印象批判我。」我一直望住佢，眼神冇半點閃避。

「我點都唔信你架喇，你理得我！」

我將塊面貼近佢：「我錄咗音啦，夠曬拎去投訴你。」

講完，我就伸手入褲袋扮撳電話。

佢吞咗啖口水，褪後咗步：「你上去啦。」





我喺佢身邊行過，心諗：我出嚟玩嘅，點會比你大到？

傻仔，我根本冇錄過。

上到一樓，我見睄到佢喺轉角位等緊我，但我扮睇唔到直接向上行。