中六個年 我鍾意左叫我起身個女仔: 你很好，我不好(三)

我哋好快就返到屋企，好彩全部人都已經出曬門口，如果唔係真係比人屌到飛起。

「你坐陣先，我去拎校服。」我推開房門。

佢行咗入去，而我就行去我家姐間房出門個衣櫃搵校服。

我拎住套校服行返去，見到佢拎住我嗰個上面有馬賽克圖案嘅正方形杯墊。

「你連杯墊都有興趣咩？」我問佢。





「唔係呀，你都買咗Ikea個扣枱杯架，仲留個杯墊嚟做咩？」

「可以擺落個架裡面架嘛。」

佢諗住將個杯墊擺落去，然後…

根本就擺唔落。

「你肯定？」佢努力咁忍笑。





仆街，呢個大家我講完自己都笑。

我搶走個杯墊，陪佢一齊忍笑：「唔好搞咁多喇，換衫啦。」

其實…個杯墊係我EX送架。

我將個杯墊收埋喺衣櫃，然後就拎咗套校服走去廁所。

我換完衫返嚟之後，諗住敲門睇下佢搞掂未，但係諗諗下…





都係唔好。

我輕輕力推咗個門罅出嚟，然後攝咗個頭入去。

佢兩隻手擺喺背後開始拉嗰條由腰開到去頸嘅拉鍊，而我就喺後面靜靜咁望住佢。

呢個動作喺我眼中，真係好令人有遐想而且仲迷人過全裸。

我就係啲咁奇怪嘅人，人哋鍾意扎頭髮個動作都噏得出點解，你問我嘅話我真係會啞咗咁企喺到。

佢拉完拉鍊轉身，而我完全反應唔切，就咁比佢斷正。

「痴線，你行路無聲架喎。」佢有少少嚇親：「你幾時企喺到架？」

「冇呀，啱啱先換完行過嚟。」我推開曬道門：「咁你搞掂未呀？」





佢睇咗睇電話：「係喎，而家七點啦。」

「咁行得未？」我揹起書包。

「行啦行啦。」佢拎袋。

我哋兩個喺返學路上跑下停下，因為我唔掂。

「跑快啲啦！」佢喺前面催我。

「得…得啦。」我撳住身邊個欄桿。

嚟到拍卡機前面，我哋兩個一齊掹個銀包出嚟。





喺張學生証準備拍落去嘅時候…

「叮咚！」

仆你個街，輸嗰一秒。