中六個年 我鍾意左叫我起身個女仔: 一日女友

我完全閃唔切，或者係…我冇諗住閃。

佢就咁錫咗落嚟，我即刻推開佢。

「你搞咩？」我問佢。

「冇呀。」佢伸咗伸脷：「雖然只係一日女友，咁都要比下福利你架嘛！」

講完，佢就咁喺我身邊行過咗，得我企喺原地呆咗，同埋…回味啱啱嗰一下錫。





「行啦，爛瞓狗！」佢擰轉頭嗌我。

我跑上去：「知啦。」

佢向後伸出右手揈咗揈，我諗咗吓，之後就拖咗落去。

我就咁樣拖住佢，一直喺後面跟住佢行。

嚟到巴士站，個站一張櫈都冇，咁代表我哋只可以企喺到排隊等。





「幫我睇仲有幾耐，懶得拎電話。」佢同我講。

唉，而家啲女人真係好撚懶，但係…鬼叫我鍾意佢咩。

我拎咗部電話出嚟，開咗九巴個App。

「想去邊到食？」我問佢。

「最近邊到有嘢食？」





我指住對面間燒烤場，然後望住佢。

佢反咗個白眼：「呢個我都見到，我就係唔想燒烤，同埋燒烤場收咁撚貴。」

好似又係，一路行過嚟成條街都係燒烤，佢要食嘅話一早就入咗去。

「咁返大埔啦。」我睇咗睇個App：「75K，十八分鐘。」

「啱啱走咗架？」佢問我

「明顯。」

「無計，等陣囉。」我突然醒起樣嘢：「搭小巴都OK嘅。」

「唔啦，咁攰搭小巴一間搖到頭暈。」佢捽咗捽眼：「我可唔可以挨住你抖一陣。」





「Sure。」

佢挨咗落我到，我原本想攬住佢，但又覺得好似唔太好，只係輕輕拍下佢背脊。

喺呢個時候，我嘅奇怪癖好引導咗我去做一樣好奇怪嘅嘢。

我耷低咗個頭，然後…索佢啲頭髮。

明明行咗成日，點解佢個頭仲可以咁香？我有合理理由懷疑佢好似啲法國女仔咁向住個頭噴香水。

我嘗試忍住攬佢嘅衝動，但最後都係攬咗落去，然後…架車就到咗。

巴士嘅車頭燈喺夜晚特別耀眼，佢一駛埋嚟就照醒咗向晴，而我都即刻縮手。





上車之後我跟住佢嚟到上層最後一排，我坐低喺左邊靠窗位，而佢就坐咗喺我隔離

佢拎咗部電話出嚟撳咗陣，然後就咁坐喺到訓着咗。

見架車搖嚟搖去，佢又好似就嚟跌咁，我就輕輕力將佢個頭撳落我膊頭到。