中六個年 我鍾意左叫我起身個女仔: 鏡頭下的你（三）

女仔影相除咗曬長腿、大波仲有個樣之外，佢哋最鍾意Po上IG嘅就係男友視角。

「不如影男友視角？」佢問我。

「預咗你會咁講啦。」我擰轉面：「不過我係唔會同你影架，我又唔係你男朋友，一間佢哋個個喺到問你點算？」

「好似又係。」佢搲咗搲下巴：「我有辦法！」

「咩辦法？」我完全估唔到佢諗緊咩。





「一就係我Tag你做攝影師。」

合理，常見操作。

「咁另一個方法呢？」

「比你做我一日男友。」佢擘大眼望住我。

「收唔收錢先？聽講包日好貴。」我講咗個笑。





「咁你要定唔要？」佢睥住我，仲出咗右手。

正嘢餵到嘴邊，冇唔食嘅原因。

我一手拖埋去，另一隻手就舉機撳快門。

我根本冇睇個畫面，但影出嚟嘅相意料之外地好有Feel。

我哋就咁一路行一路影，執朵花又影，拎條樹枝扮下可愛又影。





我相信身邊見到嘅人有九成都覺得我哋喺白癡，但我哋完全好似喺另一個世界咁，一直影到個天黑曬。

我諗呢啲，就喺學生時代拍拖最唔物質嘅快樂，唔洗咩名貴禮物，都唔洗咩驚喜，就咁兩個人鳩下鳩下就已經夠。

補充一下，拍拖呢兩個字只限於今日。

我再一次撳快門，但係就冇彈出新一張相。

我望咗望個Mon右上角，有個紅色嘅圖案彈咗出嚟。

我撳入去睇，原來喺張SD卡冇曬位。

我撳入張SD卡個Storage到：「有冇邊張Del得？張卡冇曬位。」

佢聽到之後即刻解開個頸帶扣，搶走部相機；「你做咩唔問就睇人Storage？」





其實我有哨到Storage裡面有佢同另一個男仔嘅合照，但我選擇扮睇唔到，除咗係因為我同佢嘅關係，仲有我都唔想令佢難堪。

「Sorry。」我道咗個歉：「咁我哋去吃夜晚同糖水？」

「好啦！」佢扤咗扤頭。

喺我諗住轉身行嘅時候，佢塊面就咁貼咗埋嚟。