中六個年 我鍾意左叫我起身個女仔: 好人(七)

「你帶路？」佢問我。

「梗係得啦，Follow me la。」

我行喺佢前面，而佢就好似幼稚園學生跟住老師咁喺後面跟住我，因為佢真係好矮又童顏。

平時去大尾督架車幾時去都要等返十幾二十分鐘，但唔知點解今日行到去就啱啱好有車。

啱啱上車，佢問都冇問就挨咗落我膊頭到，然後秒速瞓着咗。





我望住佢，佢瞓教個樣真係好得意。

人哋成日話冇電話生存唔到，我今日先知原來唔係。

點解行路搭車要撳電話？就係因為齋行冇嘢做好悶。

我今日冇電話都生存到，因為我有好重要嘅嘢要做，就係睇住你。

睇住你係我想做嘅嘢，但唔係我嘅責任，因為我唔係你邊個，我相信我亦唔會有機會係你邊個。





我依一刻只係你一個好普通嘅朋友，或者可能連朋友都稱唔上，只係一個…同學。

我知道我到最後可能連一個名份都得唔到，但我呢一刻，只係想對你好。

雖然星期日去大尾督條路係好多車，正常人都會預返一、兩個鐘塞車，但我知道小巴從來唔會受限於呢一樣嘢。

「可以踩一百就一百，唔得就八十，塞車就插線，最緊要快，邊個夠膽阻我搵食就拖馬。」 

呢個係我一位揸小巴嘅朋友一同我食飯就會講嘅金句，好癲，但為搵食嘅嘢都無計。





你以為紅綠燈可以阻到佢？

「咁紅燈呢？」

「有人過、有差佬咪停，冇人咪衝。」

「會唔會危險咗少少？」

「屌你啦，睇到就犯法，睇唔到咪唔犯法。」

「好似…」

佢完全無比講嘢嘅機會我：「你含撚啦！大把人屌𡃁妹啦，唔見咁多人比人拉？無人叫你喺大街大巷吉人架嘛！」

「咁點得架…」我無聲無氣咁講咗句。





「你咪又係Form 3就出嚟䈬，唔係你點識到我呀柒頭！」

我係喺老蘭識佢，所以…駁唔到。

「不過你個傻仔都唔識溝女嘅，成撚日喺到諗，都唔知你諗乜鳩，想就去馬啦屌你！」

我到依家都係咁，因為我好驚炒車，我唔係佢。

我摸住佢啲頭髮，望住瞓着咗嘅佢。

「都係再諗下先啦。」我細細聲同自己講。