中六個年 我鍾意左叫我起身個女仔: 好人(六)

喺我哋就嚟落車嘅時候，佢岳高頭用一種鄙視嘅眼神望住我。

我拎開隻手：「做咩呀？」

「你話呢？」佢反左個白眼。

「我點撚知姐？」我真係懵撚咗。

「你摸到呢…好似摸貓毛咁，你當我係貓呀？」





我沉默咗幾秒，諗緊點樣兜返，但係…好似兜唔返。

唉…是但啦。

「係呀。」我補咗句：「但係貓好得意架啵。」

佢托住下巴諗咗諗：「好似又係，我都好鍾意貓貓。」

「咁就掂啦，落車喇。」





我拉住佢落車，直接行咗去買飛機到。

「喂！」

「做咩？」

我答佢嘅同時，冇停過手上買飛嘅動作。

我拎出跌出嚟嘅兩張飛，將其中一張遞比佢：「行得。」





佢接過我張飛，之後就拍卡入閘，而我就跟喺佢後面。

我哋兩個企喺月台等車，諗起佢啱啱叫過我。

「係啵，你啱啱叫我做咩？」我問佢。

「其實我有八達通。」佢喺銀包拎咗學生八達通出嚟：「得你唔記得申請咋。」

我望住佢張八達通，佢望住我，空氣突然安靜。

「唔緊要啦，你當我請你搭車啦。」我比出一個尷尬而不失禮貌嘅笑容。

「Er…都好姐。」

我相信佢係為咗唔令我尷尬落去先咁答我，冇其他可能。





車到，一大班人湧咗上車，而我同佢就只可以等到最後先上車。

佢企咗喺車門隔離嘅凹位，我企喺佢面前，雙手撳住兩邊扶手，好似個肉盾咁擋喺佢前面。

佢就咁樣好安穩咁企咗喺到，然後…瞓着咗。

我摸住佢個頭，搖咗搖頭：「原來你先係睡魔。」

車到站，我輕力咁拍咗拍佢手臂，佢撥咗撥頭髮，然後抬頭：「到站喇？」

我扤咗扤頭，然後拉住佢手臂行出車廂。