我想喺夜場搵真愛，你陪唔陪我癲？: 三十九.

小巴再次開車，車速喺深夜冇車嘅馬路上面高速爬升，行完一條直路已經嚟到九十幾，同我嘅心跳一樣。

點解小巴限速八十但係可以上到九十幾？呢樣嘢我決定交返比我揸小巴嘅朋友嚟解釋。

…

..

.





「喂，啊金。」我擺低酒杯。

「做咩啊？」佢飲曬淨低嗰半杯：「你一擺低杯，通常都係有嘢要問我。」

「醒目。」

「想問咩啊死仔？」

「我想問點解小巴明明限咗速八十，你哋仲可以踩到九十、一百？」





「唔比你直接踩過八十啫，可以拎起隻再踩過架嘛傻仔！」

「吓？」

「屌你！人哋都冇話唔比你踩油，係唔比你直接踩上去咋嘛。」

「唔明。」

「個世界可以格硬嚟架嘛，如果唔係點會用強姦犯。」





「大概明，但係有冇個好少少嘅例子？」

「我初頭以為小巴限咗速會好撚苴，點知後尾發現限完速仲勁咗。」佢揸住個空氣軚盤：「轉個彎，仲有得玩二段變速。」

「你好似又有第二個道理想講。」

「梗係啦屌你，我好撚有文化架大佬。」

「你讀好高書嘅咩？」

「做人，最緊要唔撚係讀書，最緊要係有做嘢，同埋比啲自信。」佢拎多杯啤酒，然後繼續講：「凡事都兩睇架，好似限速咁，向差嗰邊睇就慢咗，但向好嗰邊睇嘅話，有得玩埋變速咪仲刺激。」

「得，明曬。」

雖然我把口話明，但事實上都唔係好明，不過我知重點有兩個。





兩睇同自信。