我想喺夜場搵真愛，你陪唔陪我癲？: 四十.

小巴進入zone狀態，速度能力值增加一百，好快就嚟到九龍灣。

我哋兩個喺巴士站頭嘅櫈坐低，以兩個獨立個體嘅方式坐喺到。

即係冇挨住、冇攬住，乜鳩都冇。

我開始有啲攰，想搵啲嘢挨下。

我望住佢隻手臂，心諗：其實都唔係唔得。





然後，我攬住佢手臂，將個頭擺落去。

佢摸咗摸我個頭：「小狗狗。」

車到，我翹住佢上車。

上車之後我繼續攬住佢瞓，做一個十八歲嘅小朋友。

我喺佢面前淨想做一個小朋友，或者咁講…





只有喺佢面前，我先有勇氣做返一個小朋友。

喺呢架通宵巴士嘅上層，只有坐喺最後排嘅我同佢。

簡單嚟講，我雙手想幾曳幾鹹豬都得。

但係喺呢一刻，我只係想享受佢嘅懷抱，聆聽佢每一下心跳，感受佢嘅體溫。

因為…





我唔知我可以留住佢幾耐。

應該係話，我唔知我有咩值得佢一直陪住我。

車到站，我落車送完佢返屋企就原路折返。

喺巴士上面嘅我就嚟瞓着，然後我部電話響起咗Whatsapp通知聲。

拎出嚟睇，係Clover。

「你上咗車未？」

「上咗喇。」我覆佢。

「咁你返到去講聲啦。」





「知道。」

簡單兩句，但係我已經好開心。

我成日關心人哋返到屋企未，但係關心我返到屋企未嘅人，好似…

真係冇幾個。